އަނިޔާއިން ސަލާމަތްވުމަށް ރޮހިންޖާގެ ރަޚައިން ސްޓޭޓުން ބަންގްލަދޭޝަށް ދަތުރު ކުރަމުންދިޔަ  ބޯޓެއް ބަންޑުން ޖަހާލައި 60 އަށް ވުރެ ގިނަ މީހުން ބުރާސްފަތި ދުވަހު މަރުވެއްޖެއެވެ.

އދ އިން ބުނެފައިވަނީ ރޮހިންޖާގެ 60 އަށްވުރެ ގިނަ މީހުން މަރުވެފައިވަނީ ބަންގްލަދޭޝަށް އެތެރެވުމަށް ދިޔަ މަގުމަތީގައި ރާޅުތައް ބޮޑުވެގެން ބޯޓު ބަންޑުން ޖަހާލައިގެން ކަމަށެވެ.

އދ.ގެ ސްޕޯކްސްޕާސަން ވިދާޅުވެފައި ވަނީ 23 މީހަކު މަރުވެފައިވާކަން ޔަގީން ކުރެވިފައިވާ ކަމަށާއި 43 މީހަކު ގެއްލިގެން ހޯދަމުންދާ ކަމަށެވެ. އެ 43 މީހުން ފެންނާނެ ކަމުގެ އުއްމީދެއް ނެތްކަމަށާއި އެމީހުން މަރުވެފައިވާ ކަމަށް ވަރަށް ޔަގީން ކުރެވޭ ކަމަށް އޭނާ ވިދާޅުވެފައިވެއެވެ. 

އޮގަސްޓް މަހުގެ 25 ވަނަ ދުވަހުން ފެށިގެން ރޮހިންޖާ މުސްލިމުންނަށް މިޔަންމާގެ ސިފައިން ދެމުންދާ ހަމަލާތަކާ ގުޅިގެން އެތަކެއް މުސްލިމުންނެއް ވަނީ މަރުވެފައެވެ. އެ މުސްލިމުން ދަނީ  ސަލާމަތަށް ބަންގްލަދޭޝްއަށް ކަނޑުންނާއި އެއްގަމު މަގުން ދަނީ ހިޖުރަކުރަމުންނެވެ. މީގެ ކުރިންވެސް ވަނީ ބަންގްލަދޭޝަށް ކަނޑުމަގުން އެތެރެ ވާން އުޅެނިކޮށް ބޯޓު ބަންޑުން ޖަހާލާ ރޮހިންޖާގެ އެތަކެއް މުސްލިމުންނެއް މަރުވެފައެވެ. ރޮހިންޖާއިން ބަންގްލަދޭޝަށް އެތެރެވެފައިވާ މުސްލިމުންގެ އަދަދު ބައި މިލިއަނަށް އަރާ ކަމަށް ރިޕޯޓްތައް ބުނެއެވެ.