އިމިގްރޭޝަންގެ ސަސްޕެންޝަންގައި މިހާރު ހުރީ ޒިންމާދާރު ވެރިޔާ އެކަނި
4 މެއި 2019 | ހޮނިހިރު 04:51ހާމިދުގެ ސަސްޕެންޝަން އިތުރު ކުރީ ތަހުގީގު ނިމެންދެން
އިމިގްރޭޝަންގެ މުއައްޒަފުންތަކެއް. އެ އިދާރާގެ ޒިންމާދާރު ވެރިޔާ އަދިވެސް ހުންނެވީ ސަސްޕެންޝަންގައި
މޯލްޑިވްސް އިމިގްރޭޝަންގެ ސަސްޕެންޝަންގައި މިވަގުތު ހުންނެވީ އެ އިދާރާގެ ޒިންމާދާރު ވެރިޔާގެ ގޮތުގައި ހުންނެވި ހާމިދު ފަތުހުﷲ ކަމަށް އެ އިދާރާއިން ބުނެފިއެވެ.
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ރާއްޖެއެމްވީއަށް ވިދާޅުވީ ތަހުގީގުގައި ސަސްޕެންޑް ކުރި ދެމުއައްޒަފުންގެ ތެރެއިން މިހާރު ސަސްޕެންޝަންގައި ހުންނެވީ ޒިންމާދާރު ވެރިޔާގެ މަގާމުގައި ހުންނެވި ބޭފުޅާ ކަމަށެވެ.
ސިވިލް ސާވިސް ކޮމިޝަން (ސީއެސްސީ) އިން ބަލަމުން ދާ މައްސަލައަކާ ގުޅިގެން އިމިގްރޭޝަންގެ ދެ ވެރިއަކު ސަސްޕެންޑް ކުރީ އެއް މަސް ދުވަހަށެވެ. ސަސްޕެންޑް ކުރި ދެ ބޭފުޅުންގެ ތެރެއިން ސަސްޕެންޝަން އުވާލާފައި ވަނީ އެސިސްޓެންޓް ކޮންޓްރޯލާ މަގާމުގައި ހުންނެވި އަބްދުﷲ ވަހީދެވެ. އެދެބޭފުޅުން ސަސްޕެންޑް ކޮށްފައިވަނީ ތަހުގީގު ފެށި ހިސާބުންނެވެ.
ހާމިދުގެ ސަސްޕެންޝަން އިތުރު ކުރީ ތަހުގީގު ނިމެންދެން ކަމަށް ހަނަފީ ވިދާޅުވިއެވެ.
ސިވިލް ސާވިސް ކޮމިޝަން(ސީއެސްސީ)އިން ވަނީ ހާމިދުގެ ބަދަލުގައި އިމިގްރޭޝަންގެ ޒިންމާދާރު ވެރިޔާގެ މަގާމަށް އެތަނުގެ ޗީފް ޕްރިންސިޕަލް އިމިގްރޭޝަން އޮފިސަރު މޫސާ ރަމީޒު އައްޔަން ކޮށްފަ އެވެ.
އިމިގްރޭޝަނުގެ ތަހުގީގެއް ސީއެސްސީއިން ފަށާފައިވަނީ އެ އިދާރާގެ އެދުމުގެ މަތިންނެވެ. އިމިގްރޭޝަންގެ ކޮންޓްރޯލަރ ކަމާއި ހަވާލުވެވަޑައިގެން މީޑިއާއަށް ދެއްވި ފުރަތަމަ ނޫސްވެރިންގެ ބައްދަލުވުމުގައި ހަނަފީ ވިދާޅުވީ މިދިޔަ ސަރުކާރުގައ ކަންކަން ކުރެވިފައި ހުރީ އެންމެ އެކަށީގެންވާ އުސޫލުގެ ތެރެއިން ނޫން ކަމަށާއި އުސޫލެއް އޮތް ކަމުގައި ވިޔަސް އުސޫލަށް ބެލުމެއް ނެތި ކަންކަން ހިނގާފައިވާ ކަމަށެވެ. އިމިގްރޭޝަނަށް ދިމާވެފައިވާ ގޮންޖެހުންތައް އޮޅުން ފިލުވުމަށް ގިނަ މަސައްކަތްތަކެއް ކުރަން ފަށާފައިވާ ކަމަށް ވެސް އޭނާ ވިދާޅުވިއެވެ.
