ބޯޑާ ކޮންޓްރޯލް ބަލަހައްޓާ ޕައިސިސް އަޕްގްރޭޑްކޮށް، ސަލާމަތީ ފިޔަވަޅު ވަރުގަދަކޮށްފި
ހާޑްވެއާރ އެއްކޮށް އަޕްޑޭޓެޑް ކޮށްފައިވާ ކަމަށް ވިދާޅުވި
އިންޓަނޭޝަނަލް ހުރިހާ އެއާޕޯޓެއްގެ ޕައިސިސް ސިސްޓަމް ވަނީ އަޕްގްރޭޑް ކޮށްފައި
ރާއްޖޭގެ އިމިގްރޭޝަންގައި ބޭނުންކުރާ ޕަރސަނަލް އައިޑިންޓިފިކޭޝަން ސެކުއަރ އެންޑް އިވެލުއޭޝަން ސިސްޓަމް (ޕައިސިސް) އަޕްގްރޭޑްކޮށް ނިމިފައިވާ ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީން މަލީހު ޖަމާލް ވިދާޅުވެއްޖެއެވެ.
ޕައިސިސް ސިސްޓަމަކީ ގައުމުތަކަށް އެތެރެވެ ބޭރުވާ މީހުންގެ މައުލޫމާތު ހޯދުމަށް ބޭނުންކުރާ ސިސްޓަމެކެވެ. އެ ސިސްޓަމް މެދުވެރިކޮށް އެތެރެވާ މީހާގެ ޕާސްޕޯޓަކީ ސައްހަ ޕާސްޕޯޓެއް ކަމާއި، ރެޑް ނޯޓިސް ނެރެފައިވާ މީހެއްތޯ އާއި ކުށުގެ ރެކޯޑަށް ބަލައި، އެ މީހަކީ ނުރައްކާ ތެރި މީހެއްކަން ދެނެގަނެވޭނެއެވެ. އެމެރިކާގެ ބޫޒް އެލެން ހެމިލްޓަނުން ފަރުމާކޮށްފައިވާ ޕައިސިސް ސިސްޓަމް މެދުވެރިކޮށް ގައުމުތަކަށް ހަމަލާދޭން މަސައްކަތް ކޮށްފައިވާ ބައެއް މީހުންގެ މައުލޫމާތު ދެނެގަނެފައިވާ ކަމަށް އެމެރިކާގެ ސްޓޭޓް ޑިޕާޓްމެންޓުން ބުނެއެވެ.
ރާއްޖެއެމްވީއާ ވާހަކަ ދައްކަވަމުން ކޮމިއުނިކޭޝަން، ސައިންސް ޓެކްނޮލޮޖީ މިނިސްޓަރު މަލީހު ވިދާޅުވީ، އެމެރިކާ ސަރުކާރުން ހަދިޔާ ކޮށްފައިވާ ޕައިސިސް ސިސްޓަމް ރާއްޖޭގައި ބޭނުން ކުރަމުންދާތާ އަހަރުތަކެއް ވެއްޖެ ކަމަށެވެ. މަގާމާއި ހަވަލުވެވަޑައިގެންނެވި އިރު އެ ސިސްޓަމް އޮތީ ވަރަށް ބޮޑަށް އައުޓް ޑޭޓެޑް ވެފައިކަމަށް ވިދާޅުވިއެވެ.
ސޮފްޓްވެއާގެ އިތުރުން ހާޑްވެއާއަށް ވެސް ގިނަ މައްސަލަތަކެއް ކުރިމަތިވެފައިވާކަން މިނިސްޓަރު ފާހަގަކުރެއްވިއެވެ.
އެކަމަށް ހައްލެއް ގެނައުމުގެ ގޮތުން އެމެރިކާ އިން ފަސް ބޭފުޅުންގެ ޓީމެއް ވަޑައިގެން އެ ސިސްޓަމަށް ބޭނުންވާ ސްފޮޓްވެއާ އާއި ހާޑްވެއާ ވަނީ ފޯރުކޮށްދީފައެވެ.
މަލީހު ވިދާޅުވީ، އެ ޓީމުގެ ފަރާތުން ބޯޑަރ ކޮންޓްރޯލް ގައި ހިމެނޭ ހުރިހާ އެންމެން ތަމްރީން ދީފައިވާ ކަމަށެވެ.
ފަސް މަސް ދުވަހުގެ ތެރޭގައި ރާއްޖޭގެ ހުރިހާ އިންޓަނޭޝަނަލް އެއާޕޯޓް ތަކުގެ އިތުރުން ވިޔަފާރި ބަނދަރު ތަކުގައި ހާޑްވެއާރ އިންސްޓޯލް ކޮށް އަޕްގްރޭޑް މަސައްކަތް ނިމިފައިވާ ކަމަށް މިނިސްޓަރު ވިދާޅުވިއެވެ.
'' މިހާރު މިވަނީ، އިމިގްރޭޝަން އެމްއެންޑީއެފް ޕޮލިސް ކަސްޓަމްސް ހިމެނޭ ގޮތަށް 130 ވަރަކަށް ބޭފުޅުން ޓްރެއިން ކޮށްފައި. އެއީ ގާތް ގަނޑަކަށް އިމިގްރޭޝަންގެ ބޯޑަރ ކޮންޓްރޯލްގައި މިއުޅޭ ހުރިހާ މުވައްޒަފުން ތަމްރީން ކޮށް ނިންމާފަ. ދެން މާލޭ އެއާޕޯޓާ ހުރިހާ ޕޯޓެއްގައި ހަނިމާދޫ އައްޑޫ، އުލިގަމް ، ކުޅުދުއްފުށި މާލެ ސީ ޕޯޓް. އެހެންވީމާ ހުރިހާ ޕޯޓްތަކުގެ ހާޑްވެއާ ތައް އިންސްޓޯލް ކޮށް އެއްކޮށް ނިންމާފައި މިވަނީ'' މަލީހް ވިދާޅުވިއެވެ.
ރާއްޖެއެމްވީއަށް ފޯނުން ދެއްވި އިންޓަވިއު ގައި މަލީހު ވިދާޅުވީ، ކުރިން ހުރި ސިސްޓަމާ ހިލާފަށް މިހާރު ބޭނުން ކުރަނީ ވެބް ބޭސް ސިސްޓަމެއް ކަމަށާއި، ފެންވަރު ވެސް ރަނގަޅުވާނެ ކަމަށެވެ. އަދި ވިދާޅުވީ، އޭރު ހުރި ކަންބޮޑުވުން ތަކަށް ހައްލު ހޯދައިދީފައިވާނެ ކަމަށެވެ.
އެމެރިކާގެ ޓީމުން ދެމުންދާ އެހީތެރިކަން ފާހަގަ ކުރައްވުމަށް ފަހު މިނިސްޓަރު ވިދާޅުވީ، އިތުރަށް ބޭނުންވާ ކަންކަން ފުރިހަމަ ކުރުމަށް ޑިވޮލޮޕަރުންގެ ޓީމުން މަސައްކަތް ކުރަމުންދާ ކަމަށާއި، ރާއްޖެ އަށް އަންނަ މަސައްކަތު މީހުންގެ މައުލޫމާތު އިތުރަށް ހަރުދަނާ ކޮށް ބެލޭނެ ކަމަށެވެ.
ރާއްޖެގައި މިހާރު ބޭނުން ކުރަމުންދާ ޕައިސިސް ސިސްޓަމަކީ ކުރީގެ ރައީސް މުހައްމަދު ވަހީދުގެ ސަރުކާރުގައި އެމެރިކާ އިން ހަދިޔާކުރި ސިސްޓަމެކެވެ. އޭގެ ފަހުން އެ ސިސްޓަމް އަޕްގްރޭޑް ކޮށްފައި މިވަނީ ފަސް އަހަރު ފަހުންނެވެ.
