ތޮއްޑޫ ދަނޑުވެރިންގެ ދަނޑުތައް ބަލާލުމަށާއި، އެ ރަށު ދަނޑުވެރިންނަށް ދިމާވެފައިވާ މައްސަލަތައް ދެނެގަނެ އެކަމަށް ހައްލު ހޯދުމުގެ ގޮތުން އެސްޓީއޯގެ މެނޭޖިންގ ޑިރެކްޓަރު ހުސައިން އަމްރު އެ ރަށަށް ވަޑައިގަންނަވައިފިއެވެ.
އެސްޓީއޯގެ ޓީމަކާ އެކު ހުކުރު ދުވަހު އަމްރު ތޮއްޑޫއަށް ވަޑައިގެންފައި ވަނީ ތޮއްޑޫ ދަނޑުވެރިންގެ ކަންބޮޑުވުންތައް ރައީސް އިބްރާހިމް މުހައްމަދު ސޯލިހާ މިދިޔަ ހޯމަ ދުވަހު އެ ރަށު ކައުންސިލުން ހިއްސާކޮށްފައި ވަނިކޮށެވެ.
ރާއްޖެއެމްވީއަށް މައުލޫމާތު ދެއްވަމުން އަމްރު ވިދާޅުވީ، ތޮއްޑޫއަށް ވަޑައިގެންނެވީ ދަނޑުތަކަށް ގޮސް އެ ދަނޑުތަކުގެ ހާލަތު ދެނެގަތުމަށާއި ދަނޑުވެރިންނާ ބައްދަލުކުރުމަށް ކަމަށެވެ. އެގޮތުން ހުކުރު ދުވަހުގެ ރޭ އެ ރަށު ހުރިހާ ދަނޑުވެރިންނާ އެކު ބާއްވާ ހާއްސަ ބައްދަލުވުމެއް ހަމަޖެހިފައި އޮތް ކަމަށް ވެސް އަމްރު ވިދާޅުވިއެވެ.
އެސްޓީއޯގެ ފަރާތުން ތޮއްޑޫއަށް ކުރަމުން ގެންދާ ދަތުރުގައި، ދަނޑުވެރިން އުފައްދާ ބާވަތްތަކަށް އެންމެ ރަނގަޅު އަގެއް ހޯދައިދިނުމާ ބެހޭ ގޮތުން ވެސް ދިރާސާތަކެއް ހެދިގެން ދާނެއެވެ. އެގޮތުން މާލޭ ބާޒާރުގައި ވިއްކުމަށް ދަނޑުވެރިންގެ ގޮވާން ވިއްކާ އަގުތަކާއި، އެތަކެތި މާލޭގައި ވިއްކާ އަގުތައް ދެނެގަނެވޭނެއެވެ. އަދި މި ދިރާސާއިން ލިބޭ މައުލޫމާތުގެ އަލީގައި އެސްޓީއޯ މެދުވެރިވެގެން ދަނޑުވެރިންނަށް އެކަށީގެންވާ އަގެއް ހޯދައިދޭން މަސައްކަތްތަކެއް ކުރާނެ ކަމަށް ވެސް އަމްރު ވިދާޅުވިއެވެ.
ބާޒާރުގައި ވިއްކާ އަގުތައް ދެނެގަނެ، ދަނޑުވެރިންގެ އާމްދަނީ އިތުރުކުރުމަށް މަސައްކަތް ކުރެވިއްޖެ ހާލަތެއްގައި ދަނޑުވެރިކަމުގެ ދާއިރާގައި މަސައްކަތް ކުރަން ބޭނުންވާ މީހުން ވެސް އިތުރުކުރެވޭނެ ކަމަށް އަމްރު ވިދާޅުވިއެވެ. މިއީ ސަރުކާރުން އެގްރި-ވިޔަފާރި ކުރިއެރުވުމަށް ކުރާ މަސައްކަތުގެ ތެރެއިން ކުރެވިގެންދާ މަސައްކަތެކެވެ.
ދިވެހިރާއްޖޭގައި އެންމެ ފުޅާ ދާއިރާއެއްގައި ދަނޑުވެރިކަން ކުރަމުން އަންނަ އެއް ރަށް ކަމުގައިވާ ތޮއްޑޫއަކީ ޒަމާނުއްސުރެން ވެސް ދަނޑުވެރިކަން ކުރަން މަޝްހޫރު ރަށެކެވެ. އެގޮތުން މި އަހަރުގެ ރޯދަ މަހަށް ހާއްސަކޮށްގެން އެރަށުގެ ފަސްބައިކުޅަ ތިންބައި ދަނޑުވެރިކަމަށް ދޫކޮށްފައިވާ އިރު، ރޯދަ މަސް ނިމެންދެން އެ ރަށުން އުފައްދާ ދަނޑުވެރިކަމުގެ ބާވަތްތައް ހުސްނުވެ ބާޒާރުން ލިބެން ހުންނާނެ ކަމަށް ވެސް އެ ރަށު ކައުންސިލުން ވަނީ ބުނެފައެވެ. ކަރާ އުފެއްދުމަށް މަޝްހޫރު ތޮއްޑޫއިން އުފައްދާ އެހެން ބާވަތްތަކުގެ ތެރޭގައި ފަޅޯ، މިރުސް، ބަށި، ކިއުކަމްބާ އަދި ފަތްޕިލާވެލީގެ ބާވަތްތައް ހިމެނެއެވެ.
