އެސްޓީއޯއިން ވިއްކާ ތެލުގެ އަގު ބޮޑުކުރަން ނިންމައިފިއެވެ.
އެ ކުންފުނިން ނެރުނު ބަޔާނެއްގައި ބުނެފައިވަނީ ޕެޓްރޯލް ލީޓަރަކުން 70 ލާރި އަދި ޑީސަލް ލީޓަރަކުން 50 ލާރި ބޮޑުވާނެ ކަމަށާއި ޝެޑް ތަކުން ޕެޓްރޯލް ލީޓަރެއް ލިބެން ހުންނާނީ 11.49ރ އަށް އަދި ޑީސަލް ލީޓަރެއް ލިބެން ހުންނާނީ 12.11ރ އަށް ކަމަށެވެ.
ކުރިން ޕެޓްރޯލް ލީޓަރެއް 10.79ރ ވިއްކަމުން ދިޔައިރު ޑީސަލް ލީޓަރެއް ވިއްކަމުން ދިޔައީ 11.61ރ އަށެވެ.
އެސްޓީއޯ އިން ބުނީ ތެލުގެ އަގު ބޮޑުވެފައިވަނީ ތެޔޮ އުފައްދާ ގައުމުތަކުގެ އިއްތިހާދު (އޯޕެކް) އިން ތެޔޮ އުފައްދާ މިންވަރު ދަށްކުރުމާއި، އީރާނުން އުފައްދާ ތެޔޮ ގަންނަ ފަރާތްތަކަށް ކުރިމަތިވެފައިވާ ދަތިތަކުގެ ސަބަބުން ދުނިޔޭގެ ބާޒާރުގައި މާރޗް މަހުން ފެށިގެން ތެލުގެ އަގު އަންނަނީ ބޮޑުކުރުމުން، އެސްޓީއޯއަށް ތެޔޮ ގަންނަން ލިބޭ އަގު ބޮޑުވުމުގެ ސަބަބުން ކަމަށެވެ.
ދިވެހިރާއްޖެ އަށް އެތެރެ ކުރަނީ ސާފުކޮށްފައި ހުންނަ ތެލުގެ ބާވަތްތަކެވެ. ސާފު ކޮށްފައި ހުންނަ ތެޔޮ ބާޒާރުގައި ލިބެން ހުންނަނީ ސާފުނު ނުކުރާ ތެލަށްވުރެ އަގު ބޮޑުކޮށެވެ. އެހެންނަމަވެސް ބެންޗްމާރކް ތަކުގެ އަގަށް އަންނަ ބަދަލުތަކާއި އެއް މިންވަރަކަށް ސާފުކޮށްފައި ހުންނަ ތެލުގެ ބާވަތްތަކަށް ވެސް ބަދަލު އާދެއެވެ.
އެސްޓީއޯއިން ބުނީ ތެލުން ބޮޑު ފައިދާ ނެގުމަކީ އެސްޓީއޯގެ އަމާޒު ނޫން ކަމަށާއި އެސްޓީއޯއިން ތެލުގެ އަގު ބޮޑޮ ކުރަން ނިންމަނީ ގަންނަން ލިބޭ އަގު ބޮޑުވެ، ދިގު ދެމިގެން ދާ ހާލަތުގައި ކަމަށެވެ. އަދި އަގު ހެޔޮ ވެއްޖެނަމަ ވީ އެންމެ އަވަހަކަށް އަގަށް ހެޔޮ ބަދަލު ގެނައުމަކީ އެސްޓީއޯގެ އަމާޒުކަމަށް އެ ފަރާތުން ބުންޏެވެ.
