އެސްޓީއޯގެ ދަށަށް މިފްކޯ އައުމުން މިއަހަރާއި ހިސާބަށް 450 މިލިއަން ރުފިޔާގެ ގެއްލުންވެފައިވޭ: އަމްރު

އެސްޓީއޯގެ ދަށަށް މިފްކޯ އައުމުން މިއަހަރާއި ހިސާބަށް 450 މިލިއަން ރުފިޔާގެ ގެއްލުންވެފައިވާ ކަމަށް އެސްޓީއޯގެ މެނޭޖިން ޑިރެކްޓަރ ހުސައިން އަމްރު ވިދާޅުވެއްޖެއެވެ.

ޖަޒީރާ ހޮޅުއަށި ސިލްސިލާގެ ދަށުން ބޭއްވި ތިން ވަނަ ބައްދަލުވުމުގައި ވާހަކަ ދައްކަވަމުން އަމްރު ވިދާޅުވީ މިފްކޯ އެސްޓީއޯގެ ދަށަށް ބަދަލު ކޮށްފައިވަނީ އެސްޓީއޯ ބޭނުންވެގެން ނޫން ކަމަށެވެ. އަދި މިފްކޯ އެސްޓީއޯގެ ދަށަށް ބަދަލު ކޮށްފައިވަނީ މިފްކޯ ބަނގުރޫޓުވެގެން ހަދާނެ ގޮތެއް ނެތިގެން ކަމަށް ވެސް އޭނާ ވިދާޅުވިއެވެ.

އެސްޓީއޯ އިން ފިއުސް ސަޕްލައި މޯލްޑިވްސް މެދުވެރިކޮށް މިފްކޯ އަށް ތެޔޮ ގެންގޮސް މިފްކޯ އިން މަސްވެރިންނަށް ތެޔޮ ވިއްކަމުންދާއިރު އެއްވެސް ފައިސާއެއް އަނބުރާ އެސްޓީއޯއަށް ނާންނަ ކަމަށް އަމްރު ވިދާޅުވިއެވެ.

މަސްވެރިންގެ ދޯނިފަހަރުތައް 150 ފޫޓަށް ބޮޑުވެގެންދިޔައިރު މިފްކޯގެ ބޯޓުތައް ވަރަށް ކުޑަކަން ފާހަގަކުރައްވާ އަމްރު ވިދާޅުވީ އެކަމަށް އެއްވެސް ކަމެއް ކުރިން ކޮށްފައިނުވާ ކަމަށެވެ.

ފެލިވަރުގައި މަސް އަދިވެސް ބަންދުކުރެވެނީ ދުވާލަކަށް 50 ޓަނު ކަމަށާއި އެކަމަށް ވެސް ހައްލެއް މީގެ ކުރިން ހޯދާފައިނުވާ ކަމަށް އަމްރު ވިދާޅުވިއެވެ. އަމްރު އިތުރަށް ވިދާޅުވީ ސަރުކާރުން މަސައްކަތް ކުރަމުންދަނީ މިފްކޯ އަކީ ގެއްލުން ނުވެ ހިންގޭނެ ކުންފުންޏަކަށް ހެދުމަށް ކަމަށެވެ.

މިފްކޯ ނުހިންގި ބަނގުރޫޓުވުމުން، އެ ކުންފުނީގެ 300 މިލިއަން ރުފިޔާގެ ދަރަންޏާ ސަރުކާރުން ހަވާލުވެ އެތަން އެސްޓީއޯގެ ދަށަށް ބަދަލުކުރަން ނިންމީ 2016 ވަނަ އަހަރުގެ ސެޕްޓެމްބަރު މަހުގެ 26 ވަނަ ދުވަހުއެވެ. އޭގެ ފަހުން އެސްޓީއޯގެ ދަށުން މިފްކޯ ހިންގަމުން އަންނަތާ ތިން އަހަރު ވަނީއެވެ.