ބޭ އޮފް ބެންގޯލްގައި އުފެދިފައިވާ ސައިކްލޯން ފަނި އިންޑިއާގެ އިރުމަތީ އައްސޭރީގެ ސަރަޙައްދުތަކަށް އަރައިފިއެވެ.

އިންޑިއާގެ މޫސުމާ ބެހޭ އިދާރާއިން ހާމަކޮށްފައިވާ ގޮތުގައި ހުކުރު ދުވަހު ހެނދުނު އިންޑިއާގެ އިރުމަތީ އައްސޭރީގައިވާ އޮޑިޝާއަށް މި ސައިކްލޯން އަރާފައިވަނީ ބޯ ވާރެއާއި، ގަދަ ވަޔާއިއެކުއެވެ. ހުކުރު ދުވަހު ހެނދުނު އޮޑިޝާއަށް ގަޑިއަކު 205 ކިލޯމީޓަރު ޞާރުމިނުގައި ވައި ޖެހިފައިވާކަމަށް އެ އިދާރާއިން ވަނީ ބުނެފައެވެ. މި ސައިކްލޯން ގިންތިކޮށްފައިވަނީ ފަސްވަނަ ދަރަޖައިގެ ތޫފާނެއްގެ ގޮތުގައެވެ.

އިންޑިއާއަށް ސައިކްލޯން ފަނި އެރުމާއި ގުޅިގެން އިންޑިއާގެ ނޭޝަނަލް ޑިޒާސްޓަރ ރެސްޕޮންސް ފޯސްއިން ބުނެފައިވަނީ، އޮޑިޝާގެ ބިން ތިރި ހިސާބުތަކުގައި ދިރިއުޅޭ 1.2 މިލިއަން މީހުން ރައްކާތެރި ހިސާބުތަކަކުގައި ޤާއިމްކޮށްފައިވާ 4000 ހިޔާވެއްސަށް ބަދަލުކުރެވިފައިވާ ކަމަށެވެ.

މި ސައިކްލޯންގެ އަސަރު މިހާތަނަށް އެންމެ ބޮޑަށް ކޮށްފައިވާ އޮޑިޝާގެ ސްޕްޝަލް ރިލީފް ކޮމިޝަނަރ، ބިޝްނުޕާޅާ ސެތީ މީޑިއާގައި ވިދާޅުވީ، ތޫފާނާއި ގުޅިގެން ބައެއް ސަރަޙައްދުތަކުގައި މުވާސަލާތީ ޚިދުމަތްތައް މެދުކެނޑިފައިވާ ކަމަށާއި، ނަމަވެސް މީހަކު މަރުވިކަން ނުވަތަ މީހަކަށް އަނިޔާއެއް ޥިކަމުގެ މަޢުލުމާތު މިހާތަނަށް ލިބިފައި ނުވާކަމަށެވެ.

'ސައިކްލޯން ފަނި' އަކީ 1999 ވަނަ އަހަރުގެ ފަހުން އޮޑިޝާއަށް އެރި އެންމެ ބާރުގަދަ ތޫފާނެވެ. 1999 ވަނަ އަހަރު އޮޑިޝާއަށް އެރި ތޫފާނުގައި ދިހަ ހާހަށްވުރެ ގިނަ މީހުން މަރުވިއިރު، އެ ތޫފާނުގައި އޮޑިޝާއަށް ބޮޑެތި ގެއްލުންތައް ލިބުނެވެ.