ޕެޕްސީކޯގެ ވިޔަފާރީގެ ހައްގަށް އަރައިގަތްކަމަށް ބުނެ، އެ ކުންފުނިން އިންޑިއާގައި އަލުވީގެ ދަނޑުވެރިކަންކުރާ 9 ދަނދުވެރިއަކާއި ދެކޮޅަށް ކުރި ދައުވާތައް އަނބުރާގެންގޮސްފިއެވެ.

ޕެޕްސީކޯއިން ދަނޑުވެރިންނާއި ދެކޮޅަށް ދައުވާކޮށްފައިވަނީ، އެ ކުންފުނިން އުފައްދާ ލޭސް ބްރޭންޑްގެ އަލުވި ޗިޕްސް އުފެއްދުމަށް ބޭނުންކުރާ FC5 ބާވަތުގެ އަލުތްވަކީ އެ ކުންފުނީގެ ވިޔަފާރީގެ ހައްގެއް ކަމަށާއި، އެ 9 ދަނޑުވެރިން އެ ބާވަތުގެ އަލުވި ހެއްދުމަކީ އެ ކުންފުނީގެ ވިޔަފާރީގެ ހައްގަށް އަރައިގަތްކަމަށް ބުނެއެވެ.

ޕެޕްސީކޯގެ ތަރުޖަމާނަކު ބުނީ އެ މައްސަލަ ނިންމަން ބޭނުންވަނީ ކޯޓުން ބޭރުގައި ކަމަށާއި، ސަރުކާރާއި އެކު ކުރެވުނު މަޝްވަރާތަކަށްފަހު ދައުވާތައް އަނބުރާ ގެންދިއުމަށް ނިންމާފައިވާ ކަމަށެވެ.

ޕެޕްސީކޯއިން ދައުވާތައް އަނބުރާ ގެންދިއުމަށް ނިންމާފައި މިވަނީ، އެ ކުންފުނިން ދަނޑުވެރިންނަށް ބިރުދައްކާކަމަށް، އިންޑިއާގައި ވެރިކަންކުރާ ބީޖޭޕީ އާއި ގާތް ގުޅުމެއް އޮންނަ ހިންދޫ ނޭޝަނަލިސްޓް ގްރޫޕަކުން ބުނެފައި ވަނިކޮށެވެ. އަދި ޕެޕްސީކޯގެ ދައުވާތަކާއި ގުޅިގެން އިންޑިއާގެ އިދިކޮޅު ކޮންގްރެސް ޕާޓީންވެސް ވަނީ އެ ކުންފުންޏަށް ފާޑުކިޔާފައެވެ.

ޕެޕްސީކޯއިން ކުރި ދައުވާގައި ބުނެފައިވަނީ، އާންމުކޮށް އަލުވީގައި ތެތްކަން ހުންނަ މިންވަރަށްވުރެ ކުޑަކޮށް ތެތްކަން ހުންނަ FC5 ބާވަތުގެ އަލުވި އުފައްދައި އެ ކުންފުނިން އެއީ އެ ކުންފުނީގެ މުދަލެއްގެ ގޮތުގައި ރެޖިސްޓަރ ކުރީ 2016 ވަނަ އަހަރު ކަމަށެވެ. ދައުވާގައި ޕެޕްސީކޯއިން އެދިފައިވަނީ އެ ކުންފުނިން ހުއްދަ ދީފައިވާ ދަނޑުވެރިން ފިޔަވައި އެހެން ދަނޑުވެރިން އެބާވަތުގެ އަލުވި ހެއްދުން ހުއްޓުވައިދިނުމަށެވެ. އަދި އެއިން ކޮންމެ ދަނޑުވެރިއެއްގެ އަތުން 10 މިލިއަން ރުޕީޒް ހޯދުމަށްވެސް އެ ކުންފުނިން ވަނީ އެދިފައެވެ.

ޕެޕްސީކޯއިން އިންޑިއާގައި އަލުވި ޗިޕްސް އުފައްދަން ފައްޓާފައިވަނީ 1989 ވަނަ އަހަރުއެވެ.