ނިޝާން ޢިއްޒުއްދީނުގެ ޢިއްޒަތުގެ ވެރިޔާ މަރްޙޫމް މުޙައްމަދު ޒާހިރުގެ ހަނދާނުގައި ތައުބީނުގެ ޖަލްސާ ބާއްވައިފިއެވެ.
ބުރާސްފަތި ދުވަހުގެ ރޭ ދަރުބާރުގޭގައި ބޭއްވި ތައުބީނުގެ ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ.
އެ ޖަލްސާގައި ކަސްޓަންސްގައި 33 އަހަރުގެ ދިގު މުއްދަތަކަށް ޚިދުމަތް ކުރައްވާފައިވާ އެސިސެންޓް ކޮމިޝަނަރ އޮފް ކަސްޓަމްސް ރިޓަޔާޑް އައިމިނަތު ރަޝީދާ ވިދާޅުވީ ކަސްޓަމްސްގައި މަސައްކަތްކުރި 33 އަހަރުގެ ތެރެއިން 11 އަހަރަށްވުރެ ގިނަ ދުވަހު މަރްޙޫމް ޒާހިރުގެ އަރިހުގައި މަސައްކަތް ކުރެވުނު ކަމަށެވެ.
ރަޝީދާ ވިދާޅުވީ ދެ ފަހަރެއްގެ މަތިން 17 އަހަރަށްވުރެ ދިގު މުއްދަތަށް ކަސްޓަމްސްގެ އެންމެ އިސްވެރިޔާގެ މަގާމު މަރްޙޫމް ޒާހިރުގެ ފުރުއްވި ކަމަށެވެ. އަދި ކަސްޓަމްސްގައި މަސައްކަތް ކުރަންފެށި ފުރަތަމަ ދުވަހުން ފެށިގެން މަރްޙޫމް ޒާހިރުގެ ފަރާތުން އެންމެ ފާހަގަވި ކަމަކީ އެންމެ އިސްވެރިޔާގެ އިތުރުން ކަސްޓަމްސްގެ މުއައްޒަފުންގެ އެންމެ ގާތްއެކުވެރިޔާކަން ކަމަށެވެ. އެއީ އެމަނިކުފާނަކީ ކޮންމެ ފަންތީއެއްގެ މުއައްޒަފުންނާ ސީދާކޮށް މުއާމަލާތް ކުރުމަށް ލޯބި ކުރެއްވި ބޭފުޅެއް ކަމަށް އޭނާ ވިދާޅުވިއެވެ.
"ދިވެހިބަހުން ގާތުން ބެލުމޭ ބުނާ ބަހުގެ ހަގީގީ މާނަ އެމަނިކުފާނު ވަނީ އަމަލާ ބަހުން ތަމްސީލްކޮށްދެއްވާފައި. މުއައްޒަފުންނާއި ހަވާލުކުރާ ޒިންމާތައް މުއައްޒަފުން އަދާ ކުރަނީ އެންމެ ފުރިހަމައަށްތޯ ބައްލަވަމުން ގެންދެވި. މުއައްޒަފުންގެ ހާލު ބައްލަވާ ހެއްދެވި. މިހުރިހާ ކަމެއް ވެސް އެމަނިކުފާނު ކުރައްވަމުން ގެންދެވީ ގާބިލް ކަމާއި ނަޒާހަތްތެރިކަމާ މުރާލިކަމާ އާދަޔާ ހިލާފު ނަމޫނާއެއް އަޅުގަނޑުމެން އެންމެނަށް ދައްކަވަމުން." ރަޝީދާ ވިދާޅުވިއެވެ.
ރަޝީދާ ވިދާޅުވީ މަރްޙޫމް ޒާހިރަކީ ކޮރަޕްޝަނަށް ނޫނެކޭ ވިދާޅުވަމުން ގެންދެވި ބޭފުޅެއް ކަމަށާއި، އެކަން ފާހަގަކުރަންޖެހޭ ކަމަށެވެ. އަދި އެމަނިކުފާނަކީ ނަޒާހަތްތެރިކަމާއެކު ކަސްޓަމްސްއަށް އެކި ރޮނގު ރޮނގުން ތަރައްގީއާ ކުރިއެރުން ގެނައުމަށް މުއައްޒަފުން ތަމްރީން ކުރުމަށް ވެސް އެމަނިފާނު ކޮށްދެއްވި މަސައްކަތް ފާހަގަކުރެއްވިއެވެ.
ހެންވޭރު ބުރަވިމާގެ އަލްމަރުހޫމް މުހައްމަދު ޒާހިރު ނިޝާން އިއްޒުއްދީންގެ އިއްޒަތުގެ ވެރިޔާ ދިވެހި ދައުލަތަށްށާއި ދިވެހި ގައުމަށް ކޮށްދެއްވާފައިވާ ޚިދުމަތްތަކުގެ އަގުވަޒަން ކުރުމާއި އެމަނިކުފާނުގެ ޒިކުރާ އާ ކުރުމުގެ ގޮތުން މިނިސްޓްރީ އޮފް ހޯމް އެފެއާޒުން އިންތިޒާމްކޮށްގެން ބޭއްވި ތައުބީނުގެ ޖަލްސާގައި އެމަނިކުފާނުގެ ހަނދާނުގައި އެއްމިނެޓްގެ ސްކޫތެއް ވަނީ ގެނެސްފައެވެ. އަދި ރައީސުލްޖުމްހޫރިއްޔާ، ނިޝާން ޢިއްޒުއްދީނުގެ ޢިއްޒަތުގެ ވެރިޔާ މަރްޙޫމް މުޙައްމަދު ޒާހިރުގެ ހަނދާނަށް ޝަރަފުގެ އައްޑަނައަކާއި ލިޔުމެއް އަރުވާފައެވެ.
އެ ޖަލްސާގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ބައިވެރިވެވަޑައިގެންފާއިރު، ނައިބު ރައީސް ފައިސަލް ނަސީމު ވެސް ވަނީ ބައިވެރިވެވަޑައިގެންނެވިއެވެ. އަދި ކުރީގެ ރައީސް މައުމޫން އަބްދުލްގައްޔޫމްއާއި، އަލްމަރުހޫމްޒާހިރުގެ އާއިލާގެ ބޭފުޅުންގެ އިތުރުން ދައުލަތުގެ ވަޒީރުންނާއި އިސްވެރިން އަދި ކަސްޓަމްސްގެ މުއައްޒަފުނާއި، ސިފައިންނާއި ފުލުހުން ބައިވެރިވެވަޑައިގަތެވެ.
