ރާއްޖޭގެ ޑިމޮކްރަސީ އަށް އައިސްފައިވާ ހެޔޮ ބަދަލާއެކު އެމެރިކާގެ ޓެރެވެލް އެޑްވައިޒަރީ މުރާޖާކޮށްފި
ބަދަލު ގެނައީ ރައީސް ޔާމީންގެ ސަރުކާރުގައި ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން ނެރުނު ޓެރެވަލް އެޑްވައިޒަރީ އަށް
އެމެރިކާގެ ސަފީރު އެލައިނާ ޓެޕްލިޒް އެކަމަނާގެ ސަފީރުކަމުގެ ފަތްކޮޅު ރައީސް އިބްރާހީމް މުހައްމަދު ސޯލިހަށް އަރުވަނީ
ކުރީގެ ރައީސް އަބްދުﷲ ޔާމީންގެ ވެރިކަމުގައި ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން އެމެރިކާ އިން ނެރުނު ޓްރެވެލް އެޑްވައިޒަރީ މުރާޖާކޮށް ބަހުރުވައަށް ބަދަލު ގެނެސްފިއެވެ.
އެމެރިކާގެ އެމްބަސީން ކުރި ޓްވީޓެއްގައި ބުނެފައި ވަނީ ފާއިތުވި ދުވަސްތަކުގައި ރާއްޖެ އަށް އައިސްފައިވާ ހެޔޮ ބަދަލުތަކާ ގުޅިގެން، 2018 ވަނަ އަހަރުގެ ޖެނުއަރީ މަހު ނެރުނު ޓްރެވެލް އެޑްވައިޒަރީ އަށް ބަދަލުތަކެއް ގެނެސްފައިވާ ކަމާއި ބަހުރުވަ އަށް ހެޔޮ ބަދަލުތަކެއް ގެނެސްފައިވާނެ ކަމަށެވެ.
އެމެރިކާއިން ނެރުނު ޓްރެވަލް އެޑްވައިޒަރީގައި ބުނެފައި ވަނީ، ދިވެހިރާއްޖެއަށް އެއްވެސް އިންޒާރަކާ ނުލާ ހަމަލާއެއް ދީފާނެކަމުގެ ބިރު އެބައޮތް ކަމަށެވެ. އަދި މި ހަމަލާތައް އަމާޒުވެދާނެ ތަންތަނުގެ ތެރޭގައި ފަތުރުވެރިން އާންމުކޮށް ގޮސް އުޅޭ ސަރަހައްދުތަކާއި ދަތުރު ގިމަތަތަކާއި ޝޮޕިން މޯލްތަކާއި ސަރުކާރުގެ ވުޒާރާތަކުގެ އޮފީސްތަކަށް ހަމަލާދީފާނެ ކަމުގެ ބިރު އެބައޮތް ކަމަށެވެ.
މީގެ އިތުރުން ދުރުގައި ހުންނަ ރަށްތަކަށް (ބެލެވެނީ ރިސޯޓުތަކާއި ގެސްޓްހައުސްތައް ހުންނަ ރަށްތަކަށް) ވެސް ހަމަލާ ދިނުމުގެ ފުރުސަތު އެބައޮތް ކަމަށެވެ. އަދި މިއިން ތަނަކަށް ހަމަލާ ދީފިނަމަ ރާއްޖޭގެ ކަމާއިބެހޭ ފަރާތްތަކަށް އެހީއެއް ފޯރުކޮށް ދިނުމުގައި ލަސްވާނެ ކަމަށް ވެސް އިލްތިމާސްކޮށްފައެވެ. އެމެރިކާއިން ނެރުނީ ލެވަލް ދޭއްގެ ޓްރެވަލް އެޑްވައިޒަރީއެކެވެ. އަވަށްޓެރި ލަންކާއަށް ދިން ހަމަލާތަކާއި ގުޅިގެން އެ ގައުމަށް ނެރެފައިވަނީ ލެވަލް ތިނެއްގެ ޓްރެވަލް އެޑްވައިޒަރީއެކެވެ.
އެމެރިކާގެ ބިއުރޯ އޮފް ކޮންސުލަރ އެފެއަރޒްއިން ބުރާސްފަތި ދުވަހު ނެރުނު ފުރަތަމަ އެޑްވައިޒަރީގައި ރާއްޖެގައި މަދަނީ ހަމަނުޖެހުންތައް އޮތް ކަމަށައި ކުއްލި ހާލަތު އިއުލާން ކޮށްފައިވާ ކަމަށް ބުނެފައި ވެއެވެ. ނަމަވެސް ފަހުން އެމެރިކާ އެމްބަސީއިން ވަނީ އެ ކުށް ރަނގަޅު ކޮށްފައެވެ.
އެމެރިކާއިން ފުރަތަމަ ނެރުނު ޓްރެވަލް އެޑްވައިޒަރީއާ ގުޅިގެން ރާއްޖޭގެ ޚާރިޖީ ވަޒީރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ އެމެރިކާ އިން ނެރުނު ޓްރެވަލް އެޑްވައިޒަރީގައި ނުބައި މައުލޫމާތުތަކެއް ހުރުމާ އެކު އެކަން ރަނގަޅުކުރަން މަސައްކަތް ކުރަމުންދާ ކަމަށް އެމެރިކާ އެމްބަސީން ބުނެފައިވާ ކަމަށެވެ.
އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އެލެއިނާ ޓެޕްލިޓްޒް އެ ޓްވީޓާ ގުޅިގެން ކުރެއްވި ޓްވީޓެއްގައި ވިދާޅުވެފައި ވަނީ ޓްރެވަލް އެޑްވައިޒަރީގައި ނުބައި މައުލޫމާތުތަކެއް ހިމެނުނީ އެއީ ކުރިން ތައްޔާރު ކޮށްފައިވާ ލިޔުމަކަށް ވުމުން ކަމަށެވެ. އަދި އެއީ އޮޅުމަކުން ކުރެވުނު ކަމެއް ކަމަށާއި، އެކަން ވަރަށް އަވަހަށް ރަނގަޅު ކުރައްވާނެ ކަމަށެވެ. ފަހުން ނެރުނު އެޑްވައިޒަރީގައި ކުއްލި ހާލަތުގެ ބައި ވަނީ އުނިކޮށްފައެވެ. އަދި ބަހުރުވައަށް ވަނީ ބަދަލުތަކެއް ގެނެސްފައެވެ.
އެމެރިކާ އިން ރާއްޖޭގެ ހާލަތު މުރާޖާކޮށްފައިވާއިރު އެ ގައުމުން ރާއްޖެ އަށް ނެރެފައި ވަނީ ލެވެލް 2 ގެ އެޑްވައިޒަރީއެކެވެ. އެމެރިކާގެ ޓްރެވެލް އެޑްވައިޒަރީ ހަތަރު ބަޔަކަށް ބެހިފައިވާ އިރު ގައުމުތައް ގިންތިކުރަނީ ހާލަތު ގޯސްވާ ނަމަ ލެވެލް މަތިވާ ގޮތަށެވެ. އެ ގޮތުން ރާއްޖޭގެ އިތުރުން ޔޫރަޕްގެ ގައުމުތައް ކަމަށްވާ ޖަރުމަނާއި ފްރާންސް އަދި ބެލްޖިއަމް އަށް ވެސް ހިމެނެނީ ލެވެލް 2 ގައެވެ. މެދުއިރުމަތީގެ ހަމަނުޖެހުން ބޮޑެތި ގައުމުތައް ކަމަށްވާ ސީރި އާއި އިރާގާއި އީރާން އަދި ގިނައިން ހަމަލާތައް ދޭ އަފްޣާނިސްތާނު ފަދަ ގައުމުތައް ހިމެނެނީ ލެވެލް 4 ގައެވެ. އެއީ ދަތުރު ނުކުރުމަށް އަންގާ ލެވެލްއެވެ.
އޭޕްރީލް 21 ވަނަ ދުވަހު ސްރީ ލަންކާ އަށް ދިން ޓެރަރިސްޓް ހަމަލާ އަށް ފަހު އެމެރިކާ އިން އެ ގައުމަށް ނެރެފައި ވަނީ ލެވެލް 3 ގެ ޓްރެވެލް އެޑްވައިޒަރީއެކެވެ. އެއީ ދަތުރުނުކުރުމަށް ވިސްނުމަށް ލަފާދީ ނެރޭ ޓްވެލް އެޑްވައިޒަރީއެކެވެ.
