ކޯޓްތަކާއި ފަނޑިޔާރުންނާ މެދު ނަފްރަތު އުފައްދައި، ރައްޔިތުނަށް ކަމުގެ ހަގީގަތް އޮޅޭ ގޮތަށް ކުރާ އެންމެހާ ކަންކަން ހުއްޓާލުމަށް ސްޕްރީމް ކޯޓުން އިލްތިމާސްކޮށްފިއެވެ.

މިކަމަށް އިލްތިމާސްކޮށް ސްޕްރީމް ކޯޓުން ނެރެފައިވާ ބަޔާނެއްގައި ބުނެފައިވަނީ ފަނޑިޔާރުންނަކީ މުސްތަގިއްލު ބައެއް ކަމަށާއި ފަނޑިޔާރުން މަސައްކަތް ކުރާނީ ގާނޫނު އަސާސީ އާއި، ގާނޫނޫތަކާއި އެއްގޮތްވާ ގޮތުގެ މަތިން ވަކި ފަރާތަކަށް ބުރަނުވެ އަދި ދައްކަފާނެ ބިރަކަށް ޖެހިލުން ނުވެ ތައައްސުބުން އެއްކިބާ ވެގެން ތިބެ ކަމަށެވެ.

މިކަން ދިވެހިރާއްޖޭގެ ޖުމުހުރިއްޔާގެ ގާނޫނުއަސާސީގެ 142 ވަނަ މާއްދާގައި ބަޔާންކޮށްފައި އޮތް އިރު ކޯޓްތަކުގެ މިނިވަންކަން ރައްކާތެރި ކުރުމާއި، ކޯޓްތަކުގެ ހައިބަތާއި ގަދަރު ހިމާޔަތް ކޮށްދިނުމަކީ ދައުލަތުގެ އިދާރާތަކުންނާއި، ދައުލަތުގެ ކަންކަން ހިންގުމ،ާއި ހަވާލުވެތިބި މީހުންގެ މައްޗަށް ގާނޫނު އަސާސިގެ 141 ވަނަ މާއްދާގެ (ރ) އިން ލާޒިމް ކޮށްފައިވާ ކަންތައްތަކެއް ކަމަށް ސުޕްރީމް ކޯޓުގެ ބަޔާނުގައި ވެއެވެ.

މީގެ އިތުރުން އެ ބަޔާނުގައި ބުނެފައި ވަނީ އަމިއްލަ ފަރުދަކުވިޔަސް އަދި ދައުލަތުގެ ކަމެއް ހިންގުމާއި ހަވާލުވެ ހުރި މީހަކުވިޔަސް ފަނޑިޔާރުންގެ މަސައްކަތައް ނުފޫޒު ފޯރުވުމަކީ ގާނޫނުއަސާސީގެ 142 ވަނަ މާއްދާގައި (ނ) ގައި ބަޔާން ކޮށްފައި އޮންނަ ކަމެއް ކަމަށެވެ.

ދިވެހިރާއްޖޭގެ ޖުމުހުރިއްޔާގެ ގާނޫނު އަސާސީގެ 10 ވަނަ މާއްދާގައި ދިވެހި ދައުލަތުގެ ދީނަކީ އިސްލާމް ދީން ކަމަށާއި، އިސްލާމް ދީނަކީ ދިވެހިރާއްޖެގެ ގާނޫނުގެ މައިގަނޑު މަސަދަރުކަމަށް ކަނަޑައަޅައި ބަޔާންކޮށްފައި ވާއިރު އިސްލާމްދީނުގައި ޚިޔާލު ފާޅުކުރުމުގެ މިނިވަންކަން ނަގަހައްޓާ އެ ހައްގު ކަށަވަރުކޮށްދީފައި ވީ ނަމަވެސް އިސްލާމް ދީނުގައި ޚިޔާލު ފާޅުކުރުމުގެ މިނިވަންކަން ދީފައިވަނީ އެހެން މީހުންގެ އަބުރާއި ކަރާމާތް ރައްކާތެރި ކުރުމުގެ ގޮތުން ޝަރިއަތުގައި ކަނޑައެޅިފައިވާ އިންތަކުގެ ތެރެއިން އެ މިނިވަންކަން ޕްރެކްޓިސް ކުރެވޭނެ ހަރުދަނާ އުސޫލެއްގެ މަތިން ކަމަށް ވެސް ކޯޓްގެ ބަޔާކުގައި ބުނެފައި ވެއެވެ.

މީގެ އިތުރުން އެކި ފަހަރު މަތިން ބޭރުގެ ފަރާތްތަކުން ރާއްޖޭގެ ޝަރުއީ ދާއިރާގެ ހާލަތު ބެލުމަށް ފަހު، ޝަރުއީ ދާއިރާގެ މައްޗަށް ސިޔާސީ ފަރާތްތަކުން ނުފޫޒު ފޯރުވަމުންދާ ކަމަށާއި އެފަދަ ނުފޫޒުތަކުން މިނިވަންވާންޖެހޭ ކަމަށް ބުނެފައިވާއިރު ފަނޑިޔާރުންގެ މިނިވަންކަމާ ބެހޭ މަބްދައުއަކީ ބައިނަލްއަގްވާމީ މުއާހަދާތަކުގައި ވެސް ކަނޑައެޅިފައިވާ މަބްދައުތަކެއް ކަން އެ ބަޔާނުގައި ވަނީ ފާހަގަ ކޮށްފައެވެ.

އެހެންކަމުން ކޯޓުތަކާއި ފަނޑިޔާރުންނާ ބެހޭ ގޮތުން ހަގީގަތެއް ނެތް ވާހަކަތައް ނުފެތުރުމަށާއި ކޯޓުތަކަށް ރައްޔިތުން ކުރާ އިތުބާރު ގެއްލުވާލަން ކުރެވޭ މަސައްކަތަކީ ދުސްތޫރީ އަދި ޝަރުއީ އުސޫލުތަކާ ޚިލާފް އަމަލުތަކެއް ކަމަށް ވާތީ އެފަދަ ކަންކަން ހުއްޓާލުމަށާއި އަދި އެފަދަ ކަންކަން ތަކުރާރު ނުކުރަން އިލްތިމާސް ކުރާ ކަމަށް ވެސް އެ ބަޔާނުގައިވެއެވެ.

ސުޕްރީމް ކޯޓުން މި ގޮތަށް ބަޔާނެއް ނެރެފައި މި ވަނީ ޝަރުއީ ދާއިރާ އިސްލާހްކުރުމަށް ގިނަ މަސައްކަތްތަކެއް ފަށާފައިވާ ދަނޑިވަޅެއްގައެވެ. އެ ގޮތުން ޖުޑިޝަރީން ވެސް ވަނީ ޝަރުއީ ދާއިރާ އިސްލާހްކުރުމުގެ ޕްލޭނެއް އެކުލަވާލާފައެވެ. އަދި ސަރުކާރުން ވެސް ގެންދަނީ މަސައްކަތްތަކެއް ކުރަމުންނެވެ. މީގެ އިތުރުން 19 ވަނަ ރައްޔިތުންގެ މަޖިލީހަށް އެމްޑީޕީން ކަނޑައަޅާފައިވާ އެޖެންޑާ 19 ގައި ވެސް ޝަރުއީ ދާއިރާ އިސްލާހްކުރުމުގެ ގިނަ ކަންތައްތަކެއް ހިމަނާފައި ވެއެވެ. އަދި ގިނަ ބަޔަކު ޝަރުއީ ދާއިރާ އަށް ފާޑުކިޔައި ބައެއް ފަނޑިޔާރުން މަގާމުން ވަކިކުރަން ވެސް ގޮވަމުންދާ ދަނޑިވަޅެއްގައެވެ.