ސުޕްރީމްް ކޯޓުން ޤާނޫނު އަސާސީ ބަދަލުކުރާ ވާހަކަދެއްކުމަކީ ނުރައްކާތެރި އިންޒާރެއް: މަހުފޫޒް
2 މެއި 2019 | ބުރާސްފަތި 07:43ޤާނޫނު އަސާސީއަށް ބަދަލު ގެންނަންޖެހޭކަމަށް އެބޭފުޅުން ވިދާޅުވެ، އެއްވެސް ފަރާތަކަށް އިލްތިމާސްއެއްވެސް ނުކުރައްވާ
މަހުފޫޒް ސައީދު - އޭނާ ވަނީ މަގުޗާޓުގައިވާ ކަންކަމަށް ވަރަށް ބޮޑަށް ފާޑުވިދާޅުވެފައި
ޖުޑީޝަރީ އިސްލާހް ކުރުމަށް ކަމަށް ބުނެ، ސުޕްރީމް ކޯޓުން ޖުޑީޝަރީ އިސްލާހްކުރާ ވާހަކަދެއްކުމަކީ ނުރައްކާތެރި އިންޒާރެއް ކަމަށް ޤާނޫނީ ވަކީލް މަހްފޫޒް ސައީދު ވިދާޅުވެއްޖެ އެވެ.
ފަނޑިޔާރުގެ އިސްލާހްކުރުމުގެ މަގުޗާޓު ސުޕްރީމް ކޯޓުން އެކުލަވާލައިފައިވާއިރު، އެ މަގުޗާޓުގައި ހިމެނޭ ކަންކަމާއި ގުޅޭގޮތުން ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މަހުފޫޒް ވިދާޅުވީ، މަގުޗާޓުގައި ޤާނޫނު އަސާސީއަށާއި، ޤާނޫނުތަކަށް ބޮޑެތި ބަދަލުތަކެއް ގެނައުމަށް ހިމަނާފައިވާ ކަމަށެވެ. އެގޮތުން ޖުޑީޝަލް ސާރވިސް ކޮމިޝަން އެކުލެވިގެންވާގޮތް ބަދަލުކުރުމަށް މަގުޗާޓުގައި ހިމަނާފައިވާއިރު، އެކަމަކީ ޤާނޫނު އަސާސީ ބަދަލުކޮށްގެން ނޫނީ ނުކުރެވޭ ކަމެއްކަން މަހުފޫޒް ފާހަގަކުރެއްވި އެވެ.
"ޤާނޫނު އަސާސީއަށް ބަދަލު ގެންނަންޖެހޭ ކަމަށް އެބޭފުޅުން ވިދާޅުވެ، އެއްވެސް ފަރާތަކަށް އިލްތިމާސް އެއްވެސް ނުކުރައްވާ. މިކަމުގައި ތިމަންނަމެންނަށް އެހީތެރިވެދެން. އެހެން ބަޔަކު ކުރަންޖެހޭ މަސައްކަތެއް ވެސް އެޔަކު ނެތް. ޤާނޫނުތަކެއް ހަދާ ވާހަކަ އެބަހުރި. ޤާނޫނު އަސާސީއަށް ބަދަލު ގެންނަވާ ވާހަކަދައްކަވާފައި އެބަހުރި. އެހެންވީމަ އަޅުގަނޑު މި ދަންނަނީ ސުޕްރީމް ކޯޓުގެ ފަނޑިޔާރުންނަށް ކޮންމެވެސް ވަރަކަށް ކަންކަން އޮޅިވަޑައިގެންފަ ތިއްބެވިހެން ވެސް އެބަ ހީވެޔޭ."
މަހުފޫޒް ވިދާޅުވީ، ސުޕްރީމް ކޯޓުގެ ފަނޑިޔާރުން އެގޮތުގައި ބައިތިއްބަންޖެހޭނެ ކަމަށް ގިނަ ރައްޔިތުން ގަބޫލުނުކުރާ ކަމަށާއި ސުޕްރީމް ކޯޓުގެ ފަނޑިޔާރުން ދުރަށް ވަޑައިގަންނަވަންޖެހޭ ކަމަށެވެ.
މަހުފޫޒް ވިދާޅުވީ ސުޕްރީމް ކޯޓުން އެކުލަވާލި 20 ނުކުތާގެ މަގުޗާޓުގައި ހިމަނާފައި ވަނީ ކުރަންޖެހޭ ކަންތައްތަކެއްގެ ބަދަލުގައި ނިކުންނާނެ ނަތީޖާތަކެއް ކަމަށެވެ. އަދި އެއީ މަގުޗާޓެއް އެކުލަވާލަން ޖެހޭ ގޮތް ނޫން ކަމަށް ވިދާޅުވެ މަހުފޫޒް ވިދާޅުވީ ތަފްސީލްކޮށް ކުރާނެ މަސައްކަތްތަކެއް ފެންނަން ހުންނަން ޖެހޭނެ ކަމަށެވެ.
"ސުޕްރީމް ކޯޓުގެ ފަނޑިޔާރަކީ އެހެން އެއްވެސް މީހެއްގެ މައްޗަށް އަމުރެއް ކުރެވޭނެ މީހެއް ނޫން. ފަނޑިޔާރުންނަށް ނުފޫޒް ނުފޯރުވުމަށް ޤާނޫނު އަސާސީގައި ކޮށްފައި މި އޮންނަ އަމުރަކީ ސަރުކާރާއި އާންމު ރައްޔިތުންނާއި، ރައްޔިތުންގެ މަޖިލީހަށް އެކަނި ނިސްބަތްވާ އެއްޗެއް ނޫން. އެއް ފަނޑިޔާރަކު އަނެއް ފަނޑިޔާރަށް ވެސް ނުފޫޒު ފޯރުވައިގެން ނުވާނެ. އެހެންކަމުން ފަނޑިޔާރަކު ކުރާކަމެއް މޮނިޓާރކޮށް އެކަންކަން ބަދަލުކުރުމުގެ ބާރު ސުޕްރީމް ކޯޓަށް ލިބޭ ހަމައެކަނި ހާލަތަކީ ދަށު ކޯޓުން ނުވަތަ ހައި ކޯޓުގެ ފަނޑިޔާރުން ތިއްބަވަިއގެން ނިންމަވާފައިވާ މައްސަލައެއް ސުޕްރީމް ކޯޓުގައި އިސްތިއުނާފްކުރެވޭ ހާލަތު" މަހްފޫޒް ވިދާޅުވިއެވެ.
