ބިދޭސީއަކު ރަހީނުކޮށް ފައިސާތަކެއް ފޭރިގަންނަން އުޅުނު ބަޔަކު ހައްޔަރުކޮށްފި

ބިދޭސީއަކު ރަހީނުކޮށް ފައިސާތަކެއް ފޭރިގަންނަން އުޅުނު ބަޔަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލް ވިދާޅުވީ ބުދަ ދުވަހުގެރޭ ދަންވަރުު ފުލުހުން ޕެޓްރޯލް ކުރަމުން ދަނިކޮށް، 02:50 ހާއިރު ބިދޭސީއަކު ރަހީނުކޮށްގެން އުޅޭކަމުގެ މައުލޫމާތު ލިބިފައިވާ ކަމަށެވެ. އަދި ރަހީނުކޮށްފައިވާ ބިދޭސީ މީހާގެ ރަހުމަތްތެރިޔަކަށް ގުޅާ 40،000 ރުފިޔާ ދިނުމަށް ޑިމާންޑްކޮށް، މި ފައިސާ ކެންގަރޫ ކިޑްސް ކައިރި އަށް ބަލާ އައި ވަގުތު ބިދޭސީއަކު ވަނީ ހައްޔަރު ކޮށްފައި ކަމަށް ފުލުހުން ބުންޏެވެ.

ފުލުހުން ބުނީ މި ބިދޭސީ މީހާ ހައްޔަރުކުރުމަށް ފަހު ރަހީނުކޮށްފައިވާ ބިދޭސީ މީހާ ދެއްކުމަށް ފުލުހުން އެންގުމުން ނިކަގަސްމަގުގައި ހުންނަ ގޯޅިއެއްގެ ތެރޭގައި ރަހީނު ކޮށްފައިވާހުރި ބިދޭސީއަކު ހޯދާފައިވާ ކަމަށެވެ.

ފުލުހުން ބުނީ މި މައްސަލައިގައި އިތުރަށް މައުލޫމާތު ސާފު ކުރުމުން މި އަމަލު ހިންގުމުގައި ހަތް ވަރަކަށް ދިވެހިން ބައިވެރިވެފައިވާ ކަމަށާއި ރަހީނު ކޮށްފައި ހުރި ބިދޭސީ މީހާގެ ގައިގައި ތަޅައި އަނިޔާކޮށް މާރާމާރީ ހިންގުމަށް ފަހު ދެ މޯބައިލް ފޯނާއި ކަރުގައި އަޅާފައި އޮތް ފަށާއި ތަޅުދަނޑިފައްޗެއް ފޭރިގެންފައިވާ ކަމަށް މައުލޫމާތު ލިބޭ ކަމަށެވެ. އަދި ރަހީނުކޮށްފައިހުރި ސަރަހައްދަށް ދިޔަ ވަގުތު މި އެންމެން ފިލާފައިވާކަމަށް ފުލުހުން ބުންޏެވެ.

ރަހީނުކޮށްފައިހުރި ބަންގްލަދޭޝް މީހާގެ އުމުރަކީ 29 އަހަރު އެވެ.

ފުލުހުން ބުނީ އެ މައްސަލަ ސީރިއަސް އެންޑް އޯގައިނައިޒް ކްރައިމް ޑިޕާޓްމެންޓް އިން ދަނީ ތަހުޤީޤްކުރަމުން ކަމަށެވެ.