އެމްޑީޕީގެ ލީޑާޝިޕުން، މަޖިލީހުގެ ރައީސް ކަމުގެ މަގާމަށް ވަކި ބޭފުޅަކު ދެއްކުމުން، އެ މަގާމަށް ޝައުގުވެރިކަންފާޅު ކުރި އެމްޑީޕީގެ މަޖިލިސް މެމްބަރުންގެ ހައްގަށް އުނިކަން އަންނަ ކަމަށް އަލިފުށީ ދާއިރާގެ މެމްބަރު މުހައްމަދު ރަޝީދު ހަސަން (ބިގޭ) ވިދާޅުވެއްޖެއެވެ.

ބިގޭ އެހެން ވިދާޅުވެފައި ވަނީ މަޖިލީހުގެ ރައީސް ކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހޮއްވެވުމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާއި އެ ޕާޓީގެ ޗެއާޕާސަން ހަސަން ލަތީފު މަސައްކަތްޕުޅު ކުރައްވަމުން ގެންދަވަނިކޮށެވެ.

ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަފުޅު ދައްކަވަމުން އަލިފުށީ ދާއިރާގެ ގޮނޑިއަށް ދެ ވަނަ ދައުރަށް އިންތިހާބުވެވަޑައިގެންނެވި ބިގޭ ވިދާޅުވީ ވާދަވެރިކަން އޮތް ވަގުތެއްގައި އެންމެ ސުލްހަވެރި އިންސާފުވެރި ގޮތަކީ ޕާޓީގެ ލީޑާޝިޕުން ވަކި ބޭފުޅެއްގެ މަސްލަހަތު އިސްކުރުމުގެ ބަދަލުގައި ހުރިހާ ބޭފުޅުންގެ ހައްގުތައް ހިމާޔަތްކޮށް ދިނުން ކަމަށެވެ.

''އެހައްގުތައް ހިމާޔަތް ކޮށްދެވޭނެ ކަމަަށް އަޅުގަނޑަށް ދެކެނީ ސިއްރު ވޯޓެއް ގޮތަށް އޭތި ގޮސްގެން، ލީޑާޝިޕުން ވަކި ބޭފުޅަކު ދައްކާ ކަމަށް ވަންޏާ، އެކަމަށް ޝައުގުވެރިކަން ހުންނަ ބޭފުޅެއްގެ ހައްގަށް އުނިކަމެއް އެބަ އާދޭ. '' ބިގޭ ވިދާޅުވިއެވެ.

ބިގޭ ވިދާޅުވީ މަޖިލީހުގެ ރައީސް ކަމުގެ މަގާމަށް މީހަކު ހޮވުމަށްޓަކައި އެންމެ ބޮޑަށް އިސްކަން ދެނީ  އެކުވެރިކަމާ މަސްލަހަތަށް ކަމަށެވެ. 

މީގެ އިތުރުން ބިގޭ ވިދާޅުވީ މަޖިލިސްގެ ރައީސް ކަމަށް ޝައުވެރިވާނަމަ އެންމެ ރަނގަޅު ގޮތަކީ އަމިއްލައަށް ޝައުގުވެރިކަންފާޅު ކުރުން ކަމަށާއި، އެކަން ޕާޓީގެ ތެރެއިން މިހާރު ފެންނަ ކަމަށެވެ.

މަޖިލިސްގެ ރައީސްކަމާއި، ނައިބް ރައީސްކަމަށް ބޭފުޅަކު އައްޔަންކުރުމަށް ފުރުސަތު ލިބުނު ފުރަތަމަ ފަހަރުކަން ފާހަގަކުރައްވައި ބިގޭ ވިދާޅުވީ މިހާރު ތިބި މެންބަރުންނާއި އަލަށް އިންތިޚާބުވި ބޭފުޅުންނާއެކު ޝައުގުވެރިކަން އަމިއްލައަށްފާޅުކުރާއިރު އެބޭފުޅުން އެއްވެސް ހައްގަކަށް އުނިކަން ނާންނަ ގޮތަށް ޕާޓީގެ ލީޑަރ ޝިޕުން ފުރުސަތު އޮންނަންޖެހޭ ކަމަށެވެ.

''އަޅުގަނޑު އަމިއްލައަށް ދެކެނީ ރައްޔިތުން މަޖިލިސްގެ ރައީސްކަމަކީ އެއީވަރަށް ޒިންމާ ބޮޑު މަގާމަކާ ހަވާލުވެވަޑައިގަންނަވާ ބޭފުޅެކޭ. އަޅުގަނޑުމެންނަށް ފެނިގެން ހިގައްޖެ މިދިޔަ މިހާރު މިހިނގާދާ 18 ވަނަ ރައްޔިތުންގެ މަޖިލިސްގެ ރިޔާސަތުގައި އިންނެވިއިރުގަ މަޖިލިސްގައި ވޯޓަށް އަހާނެ މާހައުލެއް ނެތުނީމަ އަތް ހިއްލާގެން ވެސް ވޯޓަށް އަހާ ހިސާބަށް ކަންތައްތައް ދިޔަތަން.'' ބިގޭ ވިދާޅުވިއެވެ.

ބިގޭ ވިދާޅުވީ ކަންކަން ބޮއްސުންލައިގެންދަނީ އިންސާފާ ހަމަތަކާ އުސޫލުން ބޭރުން ކަންތައްތައް ކުރަންޖެހުމުން ކަމަށާއި، 19 ވަނަ މަޖިލިސްގެ ތެރެއިން އެމަންޒަރު ދެކެން ބޭނުންނުވާ ކަމަށެވެ. އަދި މަޖިލިސްގެ ރައީސްއަކަށް ހޮއްވަވަން ބޭނުންވަނީ އިންސާފާ ހަމަތަކާ ގަބޫލުކޮށް އެހަމަތަކާ އިންސާފުގެ ތެރެއިން މަޖިލިސް ކުރިއަށް ގެންގޮސްދޭނެ ބޭފުޅެއް ކަމަށެވެ.

މަޖިލީހުގެ ރައީސް ކަމަށް ޝައުގުވެރިކަންފާޅު ކުރައްވާފައިވާ ބޭފުޅުންނަކީ އެމްޑީޕީ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމާއި، އެމްޑީޕީ ޕާލަމެންޓްރީ ގްރޫޕުގެ ޑެޕިއުޓީ ލީޑަރު ރޮޒައިނާ އާދަމާއި، މެދުހެންވޭރު ދާއިރާގެ މެމްބަރު އަލީ އާޒިމާއި، ވިލުފުށީ ދާއިރާގެ ގޮނޑި ކާމިޔާބު ކުރެއްވި ހަސަން އަފީފާއި، މަރަދޫ ދާއިރާގެ މެމްބަރު އިބްރާހިމް ޝަރީފުގެ އިތުރުން މިނިވަން މެމްބަރެއްގެ ގޮތުގައި މަޖިލީހަށް ވާދަ ކުރައްވައި ކާށިދޫ ދާއިރާގެ ގޮނޑި ކާމިޔާބު ކުރެއްވި އަބްދުﷲ ޖާބިރެވެ.