ހޮނިހިރު ދުވަހު އެމެރިކާގެ ސެންޑިއޭގޯގެ ސިނަގޮގްއަކަށް ވަދެ ބަޑީގެ ހަމަލާއެއް ދިން މީހާ، އޭނާގެ މައްޗަށް ކުރާ ދައުވާތަށް އިންކާރު ކޮށްފިއެވެ.  

އުމުރުން 19 އަހަރުގެ ޖޯން އަރނެސްޓްގެ މައްޗަށް ތިން ދައުވާއެއް އުފުލާފައިވެއެވެ. އެއީ ގަސްތުގައި މީހަކު މެރުމުގެ ކުށުގެ ދައުވާއާއި، ގަސްތުގައި މީހަކު މަރަން އުޅުމުގެ ދައުވާގެ އިތުރުން، ހުޅުޖެހުމުގެ ދައުވާއެވެ. އަރނެސްޓްގެ މައްޗަށް ގަސްތުގައި މީހަކު މެރުމުގެ ކުށުގެ ދައުވާއާއި، ގަސްތުގައި މީހަކު މަރަން އުޅުމުގެ ދައުވާ ކުރަނީ ސިނަގޮގްއަށް ދިން ހަމަލާ އާއި ގުޅިގެންނެވެ. ހުޅުޖެހުމުގެ ދައުވާ ކުރަނީ މާރިޗު މަހު އޭނާ ހަމަ އެ ސަރަޙައްދުގައި ހުންނަ މިސްކިތެއްގައި ރޯކޮށްލި މައްސަލައެއްގައެވެ.

ދައުވާތަކަށް އިންކާރު ކުރުމުން، މައްސަލަ ބަލާ ފަނޑިޔާރު ވަނީ ޝަރީއަތް ނިމެންދެން ކަފާލާތުގެ ފުރުޞަތާއި ނުލައި އޭނާ ޖަލުގައި ބެހެއްޓުމަށް އަމުރު ކުރައްވާފައެވެ. ފަނޑިޔާރު ވިދާޅުވީ، އޭނާއަކީ އެހެން މީހުންނަށް ހުރި 'ކަށަވަރު ބިރެއް' ކަމަށެވެ.

ސިނަގޮގްއަށް އަރނެސްޓް ދިން ހަމަލާގައި އުމުރުން 60 އަހަރުގެ އަންހެނަކު މަރުވެފައިވާއިރު، އެ ހަމަލާގައި އިތުރު ބައެއް މީހުން ވަނީ ޒަޚަމް ވެފައެވެ.

ފުލުހުން ބުނެފައިވަނީ މައްސަލަ ތަހުޤީޤު ކުރަމުންދިޔައިރު، މުސްލިމުންނާއި، ޔަހޫދީންނާއި ދެކޮޅަށް އަރނެސްޓް ލިޔެފައިވާ ހަރުކަށި، ނިރުބަވެރި ލިޔުންތަކެއް ފެނިފައިވާ ކަމަށެވެ. އަދި އެ ލިޔުންތަކުގައި މިސްކިތް ރޯކޮށްލި ކަމަށް އޭނާ އިއުތިރާފު ވެފައިވާ ކަމަށާއި، އޭނާއަށް ހިތްވަރު ލިބުނީ މިއަހަރު ނިއުޒިލޭންޑްގެ މިސްކިތްތަކަކަށް ބަޑީގެ ހަމަލާދިން ޓެރަރިސްޓްގެ އަމަލުތަކުންކަން އަރނެސްޓްގެ ލިޔުންތަކުން އެނގޭ ކަމަށް ވެސް ފުލުހުން ވަނީ ބުނެފައެވެ.

ކުރިން ކުށެއްކޮށްފައިވާ ކަމުގެ އެއްވެސް ރިކޯޑެއް ނެތް އަރނެސްޓްގެ މައްޗަށް މި ތިން ދައުވާގެ ތެރެއިން ދައުވާއެއް ސާބިތު ވެއްޖެނަމަ ޕެރޯލްގެ ފުރުޞަތާއި ނުލައި އޭނާ އުމުރަށް ޖަލަށް ލާނެއެވެ. ނުވަތަ އޭނާގެ މައްޗަށް މަރުގެ ޙުކުމް އިއްވާނެއެވެ.