ޓޫރިޒަމް ދާއިރާ އަށް ބޭންކުތަކުން 37 ޕަސެންޓު ލޯނު ދޫކުރި
1 މެއި 2019 | ބުދަ 12:07އެކިއެކި ވިޔަފާރިތަކަށް ބޭންކުތަކުން ދޫކުރި ލޯނުގެ މިންވަރަކީ 14 ޕަސެންޓް
މަރުކަޒީ ބޭންކު މޯލްޑިވްސް މޮނިޓަރީ އޮތޯރިޓީ (އެމްއެމްއޭ)
ބޭންކުތަކުން ދޫކޮށްފައިވާ ލޯނުތަކުގެ 37 ޕަސެންޓަކީ ޓޫރިޒަމް ދާއިރާގެ ލޯނު ކަމަށް މަރުކަޒީ ބޭންކު މޯލްޑިވްސް މޮނިޓަރީ އޮތޯރިޓީ (އެމްއެމްއޭ) ގެ އަހަރީ ރިޕޯޓުން ދައްކައިފި އެވެ.
އަމިއްލަ ފަރާތްތަކަށް ދޫކޮށްފައިވާ ލޯނުތަކުގެ ތެރެއިން އެންމެ ގިނަ ލޯނު ޓޫރިޒަމް ދާއިރާއަށް ދޫކޮށްފައި ވާއިރު ޓްއަރިޒަމް ދާއިރާގެ ލޯނުގެ މިންވަރު ވަނީ ހަތް ޕަސެންޓު އިތުރުވެފަ އެވެ.
ގެސްޓް ހައުސް އިމާރާތް ކުރުމަށް ދޫކޮށްފައިވާ ލޯނުގެ އަދަދު މަދުވެފައި ވާއިރު ރިސޯޓުތައް ތަރައްގީ ކުރުމަށާއި މަރާމާތު ކުރުމަށް ދޫކޮށްފައިވާ ލޯނުގެ އަދަދު އިތުރު ވެފައިވަނީ ބޭރު ފައިސާ އިން ދޫކޮށްފައިވާ ލޯނުތައް އިތުރު ވުމުންނެވެ.
އެކިއެކި ވިޔަފާރިތަކަށް ބޭންކުތަކުން ދޫކުރި ލޯނުގެ މިންވަރަކީ 14 ޕަސެންޓެވެ. ހޯލްސޭލް އަދި ރީޓެއިލް ވިޔަފާރިތަކަށް ދޫކޮށްފައިވާ ލޯނުތައް ދަށްވުމާ އެކު ވިޔަފާރިތަކަށް ޖުމުލަ ދޫކުރި ލޯނުގެ މިންވަރު ވަނީ ދެ ޕަސެންޓު ދަށަށް ގޮސްފަ އެވެ.
ކުރީ އަހަރާ އަޅާ ބަލާއިރު އިމާރާތް ކުރުމުގެ ދާއިރާ އަށް ދޫކޮށްފައިވާ ލޯނުތައް 30 ޕަސެންޓު އިތުރުވެފައި ވާއިރު ވިޔަފާރި ބޭންކުންތަކުން ދޫކޮށްފައިވާ ލޯނުގެ 21 ޕަސެންޓަކީ މި ދާއިރާއަށް ދޫކޮށްފައިވާ ލޯނުކަން ފާހަގަ ކޮށްލެވެއެވެ.
މީގެ އިތުރުން މިދިޔަ އަހަރު އަމިއްލަ ފަރުދުންނަށް ލޯނުގެ ގޮތުގައި ބޭންކުތަކުން ދޫކުރި މިންވަރު ވަރަށް ބޮޑަށް އިތުރުވެފައިވެއެވެ. އެގޮތުން، އޭގެ ކުރީ އަހަރާ އަޅާ ބަލާ އިރު އަމިއްލަ ފަރުދުންނަށް ދޫކޮށްފައިވާ ލޯނުގެ މިންވަރު 32 ޕަސެންޓު ވަނީ އިތުރުވެފަ އެވެ.
ރިއަލް އެސްޓޭޓް ތަރައްގީ ކުރުމަށް ދޫކޮށްފައިވާ ލޯނުގެ ނިސްބަތް ހަތް ޕަސެންޓުގަ ހުރިއިރު މިދިޔަ އަހަރު ބޭންކުތަކުން ދޫކޮށްފައިވާ ލޯނުގެ މިންވަރު ވަނީ 10 ޕަސެންޓު އިތުރުވެފަ އެވެ.
