މުޒާހިރީންނާއި ދެމެދު ހިނގި ހަމަނުޖެހުންތަކުގައި ސޫދާނުގެ ސަލާމަތީ ބާރުތަކަށް ނިސްބަތްވާ ހަ މީހަކު މަރުވެފައިވާ ކަމަށް އެ ޤައުމުގައި މިހާރު ވެރިކަންކުރަމުންދާ އަސްކަރީ ކައުންސިލުން ބުނެފިއެވެ.
އަންގާރަ ދުވަހު ސޫދާނުގެ އިންތިގާލީ އަސްކަރީ ކައުންސިލުން ބުނީ، ސޫދާނުގައި ކުރިއަށްދާ މުޒާހަރާތައް ކޮންޓްރޯލް ކުރުމަށް އެ ޤައުމުގެ އެކި ސަރަޙައްދުތަކުގައި ހަރަކާތްތެރިވަމުންދިޔަ ސަލާމަތީ ބާރުތައް ނިސްބަތްވާ ހަ މީހުން މިހާތަނަށް މަރުވެފައިވާ ކަމަށެވެ. އަދި ސަލާމަތީ ބާރުތަކާއި މުޒާހިރީންނާ ދެމެދު ހޯމަ ދުވަހު ހިނގި ހަމަނުޖެހުންތަކުގައި، ސަލާމަތީ ބާރުތަކަށް ނިސްބަތްވާ 16 މީހަކަށް އެކިވަރުގެ އަނިޔާތައް ވެސް ލިބިފައިވާ ކަމަށް އެ ކައުންސިލުން ވަނީ ބުނެފައެވެ.
ހޯމަ ދުވަހުގެ ހަމަނުޖެހުންތަކާ ގުޅިގެން ސަލާމަތީ ބާރުތަކަށް ނިސްބަތްވާ މީހުންނަށް އަނިޔާ ލިބުނު އިރު، މުޒާހަރާގައި ބައިވެރިވި ގިނަ ބަޔަކަށް ވެސް ހޯމަ ދުވަހު ވަނީ އަނިޔާވެފައެވެ.
ސޫދާނުގެ ސަރުކާރު ވައްޓާލައި، އިންތިގާލީ ގޮތުން ސަރުކާރު ހިންގުމާއި އަސްކަރިއްޔާއިން ހަވާލުވެފައިވާއިރު، އެ ޤައުމުގެ ކުރީގެ ސަރުކާރާއި ދެކޮޅަށް މުޒާހަރާއަށް ނުކުތް މީހުން މިހާރު ދަނީ އަސްކަރީ ސަރުކާރު އުވާލައި މަދަނީ ސަރުކާރެއް ޤާއިމް ކުރުމަށް ގޮވާލައި މުޒާހަރާ ކުރަމުންނެވެ.
