އައިޖީއެމްއެޗުގައި ވެސް ރޯދަމަހު މަސައްކަތް ކުރަންޖެހޭ ގަޑި ހަތަރު ގަޑިއިރަށް ބަދަލު ކޮށްފި
1 މެއި 2019 | ބުދަ 06:56މަސައްކަތް ކުރަން ޖެހޭ ރަސްމީ ގަޑިއަކީ ހެނުދުނު 9:00 އިން ފެށިގެން މެންދުރު 1:00 އަށް
އައިޖީއެމްއެޗް
އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗު) ގައި ކުރިއަށް އޮތް ރަމަޟާން މަހު މަސައްކަތް ކުރަންޖެހޭ ރަސްމީ ގަޑި ހަތަރު ގަޑިއިރަށް ބަދަލު ކޮށްފިއެވެ.
މީގެ ކުރިން ޑޮކްޓަރުންނާއި ނަރުހުންގެ އާ އޮނިގަނޑު އެކުލަވައިލި އިރު ރަމަޟާން މަހު އެ ހޮސްޕިޓަލުގައި މަސައްކަތް ކުރަންޖެހޭ ރަސްމީ ގަޑި ކަމަށް ކަނޑައަޅާފައި އޮތީ ހަ ގަޑިއިރެވެ. އެހެން ނަމަވެސް އައިޖީއެމްއެޗުން އަންގާރަ ދުވަހު ނެރުނު ސަރކިއުލާގައި ބުނެފައި ވަނީ ރަމަޟާން މަހުގެ ފުރަތަމަ ދުވަހުން ފެށިގެން ޝައްވާލު މަހުގެ 7 ވަނަ ދުވަހާ ހަމައަށް އެ ހޮސްޕިޓަލުގެ ރަސްމީ ގަޑިއަކީ ހެނުދުނު 9:00 އިން ފެށިގެން މެންދުރު 1:00 އަށް ކަމަށެވެ.
އެ ސަރކިއުލާގައި ވާގޮތުން ސްޕެޝަލިސްޓް ޑޮކްޓަރުންނާއި ދަތުގެ ޑޮކްޓަރުން މަސައްކަތް ކުރަންޖެހޭ ގަޑިއަކީ ހަތަރު ގަޑިއިރު ކަމަށާއި މެޑިކަލް އޮފިސަރުންނާއި ދިވެހި ނަރުހުން މަސައްކަތް ކުރަންޖެހެނީ 6 ގަޑިއިރަށް ކަމަށެވެ. އެހެން ނަމަވެސް މެޑިކަލް އޮފިސަރުންނަށާއި ނަރުހުން ހަތަރު ގަޑިއިރަށް ވުރެ އިތުރަށް ހިނގާ ދެ ގަޑިއިރު ބަލަނީ އިތުރުގަޑީގެ މަސައްކަތެއްގެ ގޮތުގައި ކަމަށާއި އިތުރުގަޑީގެ މަސައްކަތްތަކަށް ފައިސާ ދޭނެ ކަމަށް އެ ސަރކިއުލާގައި ވެއެވެ. މިއީ މީގެ ކުރީގެ ރޯދަ މަސްތަކުގައި ވެސް އަމަލުކުރަމުން އައި ގޮތެވެ.
އައިޖީއެމްއެޗުގެ ސީއީއޯ އިބްރާހިމް ސަލީމް ސޮއި ކުރައްވާ ނެރެފައިވާ ސަރކިއުލާގައި ބުނެފައި ވަނީ ރަމަޟާން މަހާއި ޝައްވާލު މަހުގެ 7 ވަނަ ދުވަހުގެ ނިޔަލަށް އެ ހޮސްޕިޓަލުގައި މަސައްކަތް ކުރަންޖެހޭ ގަޑިތައް ހަތަރު ގަޑިއިރަށް ބަދަލު ކުރީ އަޅުކަން ކުރުމަށް ގިނަ ވަގުތު ދިނުމުގެ ބޭނުމުގައި ކަމަށެވެ. އަދި މަސައްކަތް ކުރަންޖެހޭ ވަގުތު ހަތަރު ގަޑިއިރަށް ބަދަލު ކުރި ކަމުގައި ވިއަސް އެ ހޮސްޕިޓަލުން ދޭންޖެހޭ އެއްވެސް ޚިދުމަތަކަށް ބުރޫ ނާރާނެ ކަމަށް ވަނީ ބުނެފައެވެ.
އައިޖީއެމްއެޗަކީ 24 ގަޑިއިރު ޚިދުމަތް ދޭ ހޮސްޕިޓަލަކަށް ވާތީ ރަމަޟާން މަހު ޝިފްޓް ޑިއުޓީ އަދާކުރާ އެހެން މުއައްޒަފުން ވެސް މަސައްކަތް ކުރަން ޖެހޭނީ ހަތަރު ގަޑިއިރު ވަންދެންނެވެ.
މަސައްކަތްކުރަންޖެހޭ ރަސްމީ ގަޑިއަކީ ހަތަރު ގަޑިއިރު ކަމަށް އައިޖީއެމްއެޗުން ކަނޑައަޅާފައި މި ވަނީ ސަރުކާރުގެ އެހެން ސިވިލް ސާވިސް މުވައްޒަފުންނަށް ރޯދަ މަހު ހަތަރު ގަޑިއިރު މަސައްކަތްކުރަންޖެހިފައި ނަރުހުންނާއި ޑޮކްޓަރުންނަށް އިތުރު ގަޑީގެ ފައިސާ ނުލިބޭ ގޮތަށް ހަ ގަޑިއިރު މަސައްކަތްކުރަންޖެހޭ ގޮތަށް ވަޒީފާއާ ބެހޭ އޮނިގަނޑުގައި ހިމަނާފައިވާތީ އެކަމާ މެދު ނަރުހުންގެ ކަންބޮޑުވުންތައް ފާޅުކުރުމަށް މަޝްވަރާތަކެއް ކުރެވެމުން ދަނިކޮށެވެ.
މި ރަމަޟާން މަހާއި ޝައްވާލު މަހުގެ 7 ވަނަ ދުވަހުގެ ނިޔަލަށް ސަރުކާރުގެ އޮފީސްތަކުގެ ރަސްމީ ގަޑިއަކީ ވެސް ހެނުދުނު 9:00 އިން ފެށިގެން މެންދުރު 1:00 އަށް ކަމަށް ރައީސް އޮފީހުން ވަނީ ކަނޑައަޅާފައެވެ.
