މުގައްރަރު އިސްލާހްކުރުމަށް ނަޝީދު ގޮވާލައްވައިފި

މިހާރު ދަރިވަރުންނަށް ކިޔަވައިދޭ މުގައްރަރު އިސްލާހު ކުރުމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.

އަންގާރަ ދުވަހު ރައީސް ނަޝީީދު ކުރެއްވި ޓުވީޓެއްގައި ވިދާޅުވެފައި ވަނީ ދީނުގެ ނަމުގައި މިހާރު ހިންގަމުން ދާ ކަންކަން ބަލައި ރާއްޖޭގެ މުސްތަގްބަލް ސަލާމަތްކުރުމަށް މިވަގުތު އެންމެ ބޭނުންވާ އެއްކަމަކީ ރާއްޖޭގެ މަދަރުސާތަކުގެ މުގައްރަރު އިސްލާހުކުރުން ކަމަށެވެ. އަދި ދަރިވަރުންގެ ފޮތްތަކުގައި ރުޅިވެރިކަމާއި ނަފްރަތު އުފައްދާ ވާހަކަތައް މާ ގިނަ ކަމަށް ރައީސް ނަޝީދު ވަނީ ފާހަގަކުރައްވާފައެވެ.

Advertisement

ނަޝީދު ކުރެއްވި ޓުުވީޓުގައި އެޑިއުކޭޝަން މިނިސްޓަރ އައިޝަތު އަލީ ޓެގު ކުރައްވާފައިވެއެވެ.

ރާއްޖޭގެ ބައެއް ދިވެހިން ސީރިޔާއަށް ހަނގުރާމައިގައި ބައިވެރިވުމަށް ދާއިރުގައި އެކަމަށް މަގުފަހިކޮށް މީހުންނަށް ހަރުކަށި ވިސްނުމުގެ ނަސޭހަތްދިނުމުގެ އިތުރުން އެ މީހުން ސީރިޔާއަށް ފޮނުވުމަށް ވެސް ރާއްޖޭގައި ބަޔަކު އެހީތެރިވާ ކަމަށް ނަޝީދު ކުރިން ވަނީ ވިދާޅުވެފައެވެ.

ދިވެހި އާއިލާތަކާ އެކު ރާއްޖެއިން ފިލައިގެން އެތައް ބަޔަކު ސީރިއާގެ ދާހިލީ ހަނގުރާމައިގައި ބައިވެރިވުމަށް ވަނީ ގޮސްފައެވެ. އޭގެ ތެރެއިން ބައެއް މީހުންގެ ފިރިން މަރުވެ، އަނބިން ވަނީ ހުވަފަތްވެފައެވެ. އަދި ހުވަފަތްވި ދިވެހި އަންހެނުން އެހެން މީހުންނާ އިނދެ، ކުދިން ލިބިފައިވާއިރު، އެ މީހުން ކައިވެނި ކުރި ބައެއް ފިރިން ވެސް ހަނގުރާމައިގައި މަރުވެ، ތުއްތު ކުދިން ވަނީ ޔަތީމުވެފައެވެ.