ދިވެހިބަހާއި އުރުދޫބަސް ކުރިއެރުވުމާ މެދު މުހިންމު މަޝްވަރާތަކެއް ކޮށްފި
ބަހުގެ އެކަޑަމީން ވަނީ ދިވެހި ބަހުގެ އައު ލަފްޒު ހެދުމުގެ އުސޫލު އާންމު ކޮށްފަ
ދިވެހިބަހާއި އުރުދޫބަސް ކުރިއެރުވުމާ މެދު ބޭއްވި މަޝްވަރާ ބައްދަލުވުން
ދިވެހިބަހާއި އުރުދޫބަސް އިތުރަށް ކުރިއެރުވުމާ މެދު މުހިންމު މަޝްވަރާތަކެއް ކޮށްފިއެވެ.
ދިވެހި ބަހުގެ އެކަޑަމީން ކޮށްފައިވާ ޓްވީޓެއްގައި ބުނީ ޕާކިސްތާން އެކެޑަމީ އޮފް ލެޓަރސްގެ އިސްވެރީންނާއި، އުރުދޫގެ ބަހަވީ ތަޖުރިބާކާރުންނާއި، މަޝްހޫރު ބައެއް ޅެންވެރީންގެ އިތުރުން ލިޔުންތެރީން ދިވެހިބަހުގެ އެކެޑަމީގެ ވަފުދާ ބައްދަލު ކުރައްވައި ދިވެހިބަހާއި އުރުދޫބަސް އިތުރަށް ކުރިއެރުވުމާ މެދު މުހިންމު މަޝްވަރާތަކެއް ކޮށްފައިވާ ކަމަށެވެ.
ބަހުގެ އެކަޑަމީން ދިވެހި ބަސް ކުރިއަރުވާ އާލާ ކުރުމަށްޓަކައި ތަފާތު ގިނަ މަސައްކަތް ތަކެއް ކުރައްވައެވެ. އެގޮތުން ސްކޫލު ކުދިންނަށް އަމާޒުކޮށްގެން ވެސް ގިނަ މުބާރާތްތަކަކާއި ހަރަކާތްތަކެއް ކުރިއަށް ގެންދެއެވެ.
މީގެ އިތުރުންވެސް މިހާރު ބަހުގެ އެކަޑަމީން ވަނީ ދިވެހި ބަހުގެ އައު ލަފްޒު ހެދުމުގެ އުސޫލު އާންމު ކޮށްފައެވެ. 12 ނުގުތާއެއްގެ މައްޗަށް އެކުލެޥޭ އެ އުޞޫލުގެ މައިގަނޑު މަޤްޞަދަކީ އައު ލަފްޒު ހެދުމުގައި ތަބާވާ ޢިލްމީ ހަމަތަކާއި ގޮތްތައް ކަނޑައަޅާ ބަޔާންކުރުން ކަމަށް ދިވެހި ބަހުގެ އެކަޑަމީން މަޢުލޫމާތު ދެއެވެ.
އަދި ދިވެހިބަހަށް އިސްކަން ދިނުމުގެ ޤާނޫނެއް ފާސްކޮށްފައިވާއިރު އެޤާނޫނުގެ ދަށުން ދިވެހި ބަހުގެ ދުވަހުގެ ގޮތުގައި ކޮންމެ އަހަރެއްގެ ވެސް އޭޕްރީލް މަހުގެ 14 ވަނަ ދުވަސް އަންނަނީ ފާހަގަ ކުރަމުންނެވެ
ދިވެހި ބަހުގެ އެކަޑަމީއަކީ ކުރިގެ ރައީސް މުހައްމަދު ނަޝީދުގެ ސަރުކާރުން 2011 ވަނަ އަހަރު އުފެއްދެވި އިދާރާއެކެވެ.
