އެމެރިކާ ޕްރިމިއަރގެ ކުރިން އެވެންޖަރޒް: އެންޑްގޭމް ލީކްވެއްޖެ
27 އެޕްރީލު 2019 | ހޮނިހިރު 14:54ލީކުވެފައި ވަނީ ޗައިނާގެ ސިނަމާއެއްގައި ރިކޯޑްކޮށްފައިވާ ކޮޕީއެއް
އެވެންޖަރޒް: އެންޑްގޭމްގެ ޕޯސްޓަރެއް
މާވެލްގެ އުފެއްދުމެއް ކަމުގައިވާ އެވެންޖަރޒް ސިލްސިލާގެ އެންމެ ފަހު ފިލްމް "އެވެންޖަރޒް: އެންޑްގޭމް" ގެ އެމެރިކާ ޕްރިމިއަރގެ ކުރިން އެ ފިލްމު ލީކްވެއްޖެއެވެ.
ލީކުވެފައިވާ ކޮޕީއަކީ ޗައިނާގެ ސިނަމާއެއްގައި ކެމެރާއަކުން މީހަކު ރެކޯޑް ކޮށްފައިވާ ކޮޕީއެކެވެ. ފިލްމް ރިލީޒް ކުރުމުގެ ކުރިން، ފިލްމުގެ ވަގަށް ނަކަލު ކޮށްފައިވާ ކޮޕީތައް ލީކުވިޔަ ނުދިނުމަށް މާވެލްގެ ބެލެނިވެރި ކުންފުނި ކަމުގައިވާ ވޯލްޓ ޑިޒްނީއިން ގިނަ މަސައްކަތްތަކެއް ކޮށްފައިވެއެވެ. އެގޮތުން ފިލްމު ރިލީޒްވުމުގެ ކުރިން ނޫސްވެރިންނާއި ފާޑުކިޔުންތެރިންނަށް ވެސް ފިލްމު ދައްކާލާފައެއް ނުވެއެވެ.
ޗައިނާއިން ލީކުވީ ކޮޕީއަކީ ވަރަށް ދަށް ކޮލިޓީއެއްގެ ކޮޕީއެއް ކަމަށް ޓޮރެންޓް ސައިޓްތަކުން ވަނީ ބުނެފައެވެ. މި ކޮޕީގެ އިތުރުން، ރަޝީއާގެ ކުންފުންޏަކުން ސްޕޮންސަރ ކޮށްފައިވާ ކޮޕީއެއް ވެސް އިންޓަނެޓްގައި ދައުރުވަމުންދާ ކަމަށް ވެސް ސައިޓްތަކުން ވަނީ ރިޕޯޓް ކޮށްފައެވެ. މިއީ އެވެންޖަރޒް އެންޑްގޭމްއަށް ދިމާވި ލީކުވުމުގެ ފުރަތަމަ މައްސަލައެއް ނޫނެވެ. މި މަހުގެ ކުރީކޮޅުގައި ވެސް އެ ފިލްމުގެ ކްލިޕެއް ވަނީ އިންޓަނެޓްގައި ލީކުކޮށްލާފައެވެ. ޑިޒްނީއިން ވަނީ ލީކުވީ މަންޒަރުތައް އިންޓަނެޓުން ނަގާފައެވެ.
މާވެލް ސްޓޫޑިއޯޒްގެ ރަސްމީ ޓްވިޓަރ އެކައުންޓުން ވެސް ފިލްމުގެ ޕްލޮޓް ލީކު ނުކޮށްލުމަށް އެދި ފިލްމުގެ ޑިރެކްޓަރުން ކަމުގައިވާ ޖޯ އަދި އެންތޮނީ ރޫސޯ (ދަ ރޫސޯ ބްރަދަރޒް) ސޮއިކޮށްފައިވާ ސިޓީއެއް ޓްވީޓް ކޮށްފައިވެއެވެ.
އެވެންޖަރޒް އެންޑްގޭމްއަކީ މާވެލް ސްޓޫޑިއޯޒްއިން އުފައްދާ 22 ވަނަ ފިލްމެވެ. މިއީ މާވެލްގެ ފިލްމުތަކުން ފެންނަ ގިނަ ކެރެކްޓަރުންގެ ފަހު ފެނިލުންކަމަށް ވެސް އެ ސްޓޫޑިއޯއިން ވަނީ ބުނެފައެވެ. އެމެރިކާގައި މި ފިލްމު ހުކުރު ދުވަހު ރިލީޒްކޮށްފައިވާ އިރު، ބޮކްސް އޮފީހުގައި ބޮޑު ކާމިޔާބީއެއް ހޯދާނެކަމަށް ވަނީ ބެލެވިފައެވެ.
