"އެމެރިކާސް ގޮޓް ޓެލެންޓް" ޑާސީ ލިން ކާމިޔާބުކޮށްފި

މަޤުބޫލް ރިއަލިޓީ ޝޯ "އެމެރިކާސް ގޮޓް ޓެލެންޓް" ގެ 12 ވަނަ ސީޒަނުގެ ޗެމްޕިއަންކަން ޑާސީ ލިން ހޯދައިފިއެވެ.

އުމުރުން 12 އަހަރުގެ ޑާސީ މި ޝޯގެ އެއްވަނަ ހޯދާފައިވާއިރު އޭނާވަނީ އޮޑިޝަންގައި "ގޯލްޑެން ބަޒާ" އެއް ހޯދައި ވަގުތުން ގެނެސްދިން ޝޯތަކުން ވެސް ޖާގަ ހޯދާފައެވެ. ޑާސީ އަކީ އޭނާގެ އަޑު ބަދަލުކޮށްގެން ވާހަކަދެއްކުމުގެ ހުނަރު ލިބިފައިވާ ވެންޓްރިލޮކުއިސްޓެކެވެ. ޑާސީ ހުނަރު ދައްކާލުމުގައި އަބަދުވެސް ޕަޕެޓެއް ބޭނުންކުރެއެވެ.

ފައިނަލްގައި ޑާސީ ދައްކާލި ހަރަކާތުގައި "އެމެރިކާސް ގޮޓް ޓެލެންޓް" ގެ ސީޒަން 2 ގެ ޗެމްޕިއަން ޓެރީ ފެކްޓާވެސް ވަނީ ބައިވެރިވެފައެވެ. ފައިނަލްގައި ޑާސީއާ ދެކޮޅަށް ވާދަކޮށްފައިވަނީ ލަވަކިޔުންތެރިންނާއި ޑާންސް ގްރޫޕްތަކެވެ. މި ޝޯގެ ދެވަނަ ހޯދާފައިވަނީ ލަވަކިޔުންތެރިއެއް ކަމުގައިވާ އެންޖެލިކާ ހޭލްއެވެ. އަދި ތިންވަނައަށް ހޮވިފައިވަނީ ޑާންސް ގްރޫޕެއް ކަމަށްވާ ލައިޓް ބެލެންސްއެވެ.

މި ޝޯގެ ޗެމްޕިއަންކަން ލިބުމާއެކު ޑާސީއަށް އިނާމެއްގެ ގޮތުން ވަނީ އެއް މިލިއަން ޑޮލަރު ލިބިފައެވެ.

"އެމެރިކާސް ގޮޓް ޓެލެންޓް"ގެ 12 ވަނަ ސީޒަނުގައި ޖަޖުންގެ ގޮތުގައި ހަރަކާތްތެރިވެފައި ވަނީ ސައިމޮން ކޮވެލްއާ ހެއިޑީ ކްލަމްއާ ހައުވީ މެންޑެލްގެ އިތުރުން މެލް ބީއެވެ.

މިދިޔަ ސީޒަނުގައި މި ޝޯގެ ޗެމްޕިއަންކަން ހޯދާފައިވަނީ 12 އަހަރުގެ ލަވަކިޔުންތެރިއެއް ކަމަށްވާ ގްރޭސް ވެންޑަވާލްއެވެ.