ބީއެމްއެލް ' ވާއު ކިޑްސް ރަން މިއަދު ބާއްވައިފި
27 އެޕްރީލު 2019 | ހޮނިހިރު 07:511200 ކުދިން ދުވުމުގައި ބައިވެރިވެފައިވޭ
މިއަދު ހުޅުމާލޭގައި ބޭއްވުނު ދުވުމުގެ ތެރެއިން
ބޭންކް އޮފް މޯލްޑިވްސް (ބީއެމްއެލް) އާއި ޓޯޓަލް ފިޓްނަސް ގްރޫޕް ( ޓީއެފްޖީ) އާ ގުޅިގެން ''ވާއު ކިޑްސް ރަން 2019'' މިއަދު ބާއްވައިފިއެވެ.
ހޮނިހިރު ދުވަހުގެ ހެނދުނު ހުޅުމާލޭގައި ބޭއްވި ދުވުމާއި ބެހޭ ގޮތުން މައުލޫމާތު ދެއްވަމުން ބީއެމްއެލްގެ ޕަބްލިކް ރިލޭޝަންސް އޮފިސަރު މުހައްމަދު ސައީދު ވިދާޅުވީ މި ހަރަކާތަށް ބޮޑު ތަރުހީބެއް ލިބިގެން ދިޔަކަމަށާއި އެގޮތުން 1200 ކުދިން ދުވުމުގައި ބައިވެރިވެފައިވާކަމަށެވެ. 4 އުމުރު ފުރާއަކަށް ބަހާލައިގެން ކުރިޔަށް ގެންދިޔަ މި ހަރަކާތުގައި ބެލެނެވެރިންނާއެކު 900 ކުދިން ދުވުން ފުރުހިމަކޮށްފައިވެއެވެ. މި އަހަރުގެ ރޭހުގައި ހަތަރު އަހަރާއި ހަ އަހަރާ ދެމެދުގެ ގްރޫޕާއި ހަ އަހަރާއި އަށް އަހަރާ ދެމެދުގެ ގުރޫޕާއި އަށް އަހަރާއި 10 އަހަރާ ދެމެދުގެ ކުދިން ދުވާފައިވަނީ ބެލެނިވެރިންނާ އެކު އެވެ. ނަމަވެސް އުމުރުން 10 އަހަރާއި 13 އަހަރާ ދެމެދުގެ ކުދިން ދުވެފައިވަނީ ބެލެނިވެރިން ނުލަ އެވެ. 300 ކުދިން ވަނީ މި އުމުރުފުރައިގައި އެކަނި ދުވުން ނިންމާފައެވެ.
ވައު ކިޑްސް ރަން ގެ ތެރެއިން
''ވައު ކިޑްސް ރަން'' އަކީ ކޮންމެ އަހަރަކު ވެސް ވަރަށް ހިތްގައިމު އުފާވެރި މާހައުލެއްގައި ކުދިންނާއި ބެލެނިވެރިން ބައިވެރިވެގެން ބާއްވާ ވަރަށް ހާއްސަ ހަރަކާތެކެވެ. ދުވުމުގެ މައިގަނޑު މަގްސަދަކީ ދުޅަހެޔޮ ސިއްހަތެއްގައި ހުރުމަށް ހަރަކާތްތެރިވެ އުޅުމުގެ މުހިއްމުކަން ބުނެދީ ކުދިންނާއި ބެލެނިވެރިން އެކަމަށް އަހަލުވެރިކުރުމެވެ.
މިއީ ބީއެމްއެލް އިން ކިޑްސް ރަން ބާއްވި ހަތަރުވަނަ އަހަރެވެ. ބީއެމްއެލް އިން ދަނީ އިޖްތިމާއީ ޒިންމާގެ ދަށުން މި ފަދަ ގިނަ ހަރަކާތްތަކެއް ހިންގަމުންނެވެ. އެގޮތުން މި ދިޔަ ފެބްރުއަރީ މަހު ''ބީއެމްއެލް ސްޓާފް ޗެރިޓީ' ރަން ' ބާއްވައި މޯލްޑިވްސް ތެލެސީމިއާ ސޮސައިޓީ އަށް ބީއެމްއެލް އިން ވަނީ 80،000 ރުފިޔާ ހަދިޔާ ކޮށްފައެވެ.
