ބަދަލުހިފުމުގެ ހަމަލާއެއްގެ ބިރާއެކު ލަންކާގައި ހުކުރު ނަމާދު ޖަމާއަތް ނުހެދުމަށް އިލްތިމާސްކޮށްފި
26 އެޕްރީލު 2019 | ހުކުރު 07:55ފުލުހުންގެ ސިޓީވަނީ ސޯޝަލް މީޑިއާގައިވެސް އާއްމުކޮށްފައި
ސަމާލުވުމަށް ބޮޑަށް އެދިފައިވަނީ ސޫފީންގެ މިސްކިތްތަކަށް
ސްރީ ލަންކާގެ މުސްލިމުންނަށް އަމާޒުކޮށް ހަމަލާއެއް ދީފާނެ ކަމުގެ ބިރަށް ހުކުރު ދުވަހުގެ, ހުކުރު ނަމާދަށް ޖަމާއަތަށް ނުދިއުމަށް ފުލުހުން އިލްތިމާސްކޮށްފިއެވެ.
ފުލުހުން ބުނީ އާދީއްތަ ދުވަހު ދިން ހަމަލާތަކުގެ ފަހަތުގައި ހުރިކަމަށް ތުހުމަތުކުރާ މުހައްމަދު ޒަހްރާން އަށް ތަބާވާ ބަޔަކު ސޫފީންގެ މިސްކިތްތަކަށް އަމާޒުކޮށް ބޮމުގެ ހަމަލާތަކެއް ދޭން ރާވާކަމަށް ބެލވޭކަމަށެވެ.
ޓައުން ހޯލް ގައި ހުންނަ މަޝްހޫރު ދާވަތަގަހާ މިސްކިތްވެސް ހިމެނޭގޮތުން މިފަދަ މިސްކިތްތަކުގެ ސަލާމަތީ ކަންކަންވަނީ ވަރުގަދަކުރެވިފައެވެ.
ހުކުރުގެ ޖަމާއަތް ނުހެދުމަށް އިލްތިމާސްކޮށް ފުލުހުން ނެރެފައިވާ ސިޓީވެސްވަނީ ސޯޝަލް މީޑިއާގައި ޢާމުކޮށްފައެވެ.
އާދީއްތަ ދުވަހު ސްރީ ލަންކާގެ ތިން ޗަރޗަކަށާއި ތިން ހޮޓަލަކަށް އެކުއެކީގައި ދީފައިވާ ހަ ހަމަލާގެ އިތުުރުންވެސް އިތުރު ހަމަލާތައް ދީފައިވާއިރު މި ހުކުރަކީ އެ ހަމަލާތަކަށްފަހު އައި މުސްލިމުންގެ މިފަދަ ފުރަތަ އެއްވުމެވެ.
ހުކުރު ދުވަހުގެ ފަތިސް ނަމާދުގެ ކުރިންވަނީ ހުކުރު ނަމާދުގެ ޖަމާއަތަށް ނުދިއުމަށް އިލްތިމާސްކޮށްފައެވެ.
