ލަންކާގައި ތިބި ރޮހިންޖާ މުސްލިމުންނަށް ޙަމަލާދިން ފުލުހަކު ހައްޔަރުކޮށްފި
8 އޮކްޓޯބަރު 2017 | އާދީއްތަ 08:01ހާމުދުރުން އައިސް ރޮހިންޖާ އާއިލާ ބޭރުކޮށްލިއިރު، ފުލުހުން ތިބީ ބަލަން
ބުޑިސްޓް ހާމުދުރުން އދގެ ސޭފް ހައުސިން ރޮހިންޖާ އާއިލާ ނެރޭއިރު ފުލުހުން ބަލަހައްޓައިގެން
އަވަށްޓެރި ލަންކާގައި އދގެ ސޭފް ހައުސްއެއްގައި ތިބި ރޮހިންޔާ ދަރިކޮޅަށް ނިސްބަތްވާ މިޔަންމާ މީހުން ސޭފް ހައުސް ނެރެ، އެމީހުންނަށް ހަމަލާދިނުމުގައި ބައިވެރިވި ފުލުހަކު ފިލައިގެން އުޅުމަށް ފަހު އަމިއްލައަށް ފުލުހުންނާއި ހަވާލުވުމުން އޭނާ ހައްޔަރު ކޮށްފިއެވެ. 40 އަހަރުގެ މި ފުލުސް މީހާ އަކީ ޔޫއެން ސޭފް ހައުސް ކައިރިއަށް އެއްވި ލަންކާގެ ހައްދުފަހަނައަޅާފައިވާ ބުޑިސްޓް ހާމުދުރުންނާއި ބައިވެރިވެ، އެގޭގައި ދިރިއުޅުނު ރޮހިންޖާ އާއިލާ ގެއިން ނެރެލުމުގައި ބައިވެރިވި ފުލުހެކެވެ. މިފުލުސް މީހާގެ އިތުރު މައްސަލަތަކެއްވެސް ލަންކާގެ ޕާނަދުރަ ސަރަހައްދުގެ މެޖިސްޓްރޭޓް ކޯޓުގައިވަނީ ފައިލް ކޮށްފައެވެ. އެއީ މިސްކިތަކަށް ހަމަލާދިނުމާއި އެސަރަހައްދުގެ އަންހެން ކުދިންގެ ސްކޫލެއްގެ ޕްރިންސިޕަލަށް ހަމަލާދިނުމުގެ މައްސަލައެކެވެ. އޭނާ އަމިއްލައަށް ފުލުހުންނާއި ހަވާލުވީ ފިލައިގެން އުޅޭތާ ހަފްތާއެއްހާ ދުވަސްފަހުންނެވެ.
ސެޕްޓެމްބަރު ފަހުކޮޅު ހިނގި މިޙާދިސާގައި ރޮހިންޖާ އާއިލާ ނެރުމަށް ބުޑިސްޓް ހާމުދުރުން މަސައްކަތްކުރިއިރު ބައެއް ފުލުހުން އެކަމުގައި ބައިވެރިވިއެވެ. އަދި އެއްވެސް ވަރަކަށް އެކަމާ އަޅައިނުލައި، ފުލުހުން އެތަނުގައި ތިއްބެވެ.
ބުޑިސްޓް ހާމުދުރުންނާއި އާއްމުންގެ ބަޔަކު ވެގެން ހަމަލާދީ ގެއިން ނެރެލި ރޮހިންޖާ އާއިލާއަކީ މިޔަންމާގެ ސިފައިންގެ އަނިޔާވެރިކަމުން ސަލާމަތްވުމަށް ބޯޓެއްގައި ދާން އުޅެނިކޮށް ބެހިގެން ލަންކާ ކަނޑުގެ ސަރަހައްދަށް ވަން ބައެކެވެ. އަދި އެމީހުން ތިބީ ރެފިއުޖީންގެ ގޮތުގައި އދގެ ބެލުމުގެ ދަށުގައެވެ. މިހާދިސާއަށް ފަހު އދގެ ރެފިއުޖީންނާއި ބެހޭ އިދާރައިން ވަނީ ކަންބޮޑުވުން ފާޅުކޮށްފައެވެ.
