ހަމަލާދިން ނުވަ މީހުންގެ ތެރެއިން އަށް މީހުން ދެނެގަނެވިއްޖެ: ލަންކާ ފުލުހުން

އާދީއްތަ ދުވަހު ލަންކާގައި ހަށި ގޮއްވައިގެން ދިން ބޮމުގެ ހަމަލާތަކުގައި ބައިވެރިވި ނުވަ މީހުންގެ ތެރެއިން އަށް މީހެއްގެ ވަނަވަރު ދެނެގަނެވިފައިވާ ކަމަށް ލަންކާ ފުލުހުން ބުނެފިއެވެ.

މީޑިއާތަކަށް މައުލޫމާތު ދެއްވަމުން ލަންކާ ފުލުހުންގެ ތަރުޖަމާނު ރުވާން ގުނަސޭކަރަ ވިދާޅުވީ، އެ މީހުންގެ ވަނަވަރު ދެނެގަނެވިފައި ވަނީ ކްރިމިނަލް އިންވެސްޓިގޭޝަންސް ޑިޕާޓްމަންޓުން ކުރިޔަށް ގެންދިޔަ ތަހުގީގުގައި ކަމަށެވެ. މި އަށް މީހުންގެ ތެރެއިން އެކަކީ އަންހެނެއް ކަމަށް ވެސް އޭނާ ވިދާޅުވިއެވެ.

މިހާތަނަށް މި ހަމަލާތަކާއި ގުޅިގެން 60 މީހުން ހައްޔަރުކުރެވިފައިވާ އިރު، އެތަނުން 32 މީހަކު ތިބީ ސީއައިޑީގެ ބެލުމުގެ ދަށުގައި ކަމަށް ރުވާން ފާހަގަކުރެއްވިއެވެ. ހައްޔަރު ކުރެވުނު މީހުންގެ ތެރެއިން ހަތަރު މީހަކު ތިބީ ޓެރަރިސްޓް އިންވެސްޓިގޭޝަން ޑިވިޝަން (ޓީއައިޑީ) ގެ ބެލުމުގެ ދަށުގައެވެ. ހަމަލާގެ ޒިންމާ އައިސިސްއިން ނަގާފައިވާ އިރު، ލަންކާ ފުލުހުން ބުނެފައި ވަނީ މި ހަމަލާތައް ދިނުމުގައި ބައިވެރިވީ ލަންކާގައި ހަރަކާތްތެރިވާ ނެޝަނަލް ތައުހީދު ޖަމާއަތް (އެންޓީޖޭ) އަދި ޖަމިއްޔަތުލް މިއްލަތު އިބްރާހިމް (ޖޭއެމްއައި) ނަމަކަށް ކިޔާ ދެ ޖަމާއަތުގެ ހަނގުރާމަވެރިން ކަމަށެވެ.

ލަންކާގެ ތިން ފައްޅިއަކާއި ހަތަރު ހޮޓަލަކަށް ރާވައިގެން ދިން ހަމަލާތަކުގައި ދެބެން ބައިވެރިވެފައިވާ އިރު، އެތަނުން އެކެއްގެ މާބަނޑު އަންހެނުން ވަނީ ތުހުމަތު ކުރެވޭ މީހެއްގެ ގެ ބަލަން ފުލުހުން ވަން ގަޑީގައި އޭނާގެ ތިން ދަރިން ތިއްބާ ބޮމެއް ގޮއްވާލައިގެން އަމިއްލައަށް މަރުވެފައެވެ. މި ދެބެންނަކީ މުއްސަންދި އާއިލާއަކަށް ނިސްބަތްވާ ދެ މީހުން ކަމަށް ވެސް ލަންކާގެ މީޑިއާތަކުން ވަނީ ރިޕޯޓްކޮށްފައެވެ.

އާދިއްތަ ދުވަހު ދިން ހަމަލާތަކުގައި މަރުވި މީހުންގެ އަދަދު މިހާރު 359 އަށް އަރާފައިވާ އިރު، އަދިވެސް ލަންކާ ފުލުހުން މަސައްކަތް ކުރަމުން ގެންދަނީ އިތުރު ހަމަލާތަކެއް ދީފާނެ ކަމުގެ އިންޒާރު ލިބިފައި ވުމާ އެކު ތައްޔާރީ ހާލަތެއްގައެވެ. ބޮމުގެ ހަމަލާތަކުގައި މަރުވި މީހުންގެ ތެރޭގައި 45 ކުޑަކުދިން ހިމެނެއެވެ.