ރައްޔިތުންގެ މަޖިލީހުގެ ޖަލްސާ ކޯރަމް ހަމަނުވެގެން ފެށުން ލަސްކުރަން ޖެހިއްޖެއެވެ.

މަޖިލީހުގެ ރިޔާސަތުން ވިދާޅުވެފައި ވަނީ މަޖިލީހުގެ ޖަލްސާ ދެން ފަށާނީ 11.00 ގައި ކަމަށެވެ. މަޖިލީހުގެ ޖަލްސާތައް ފަށާ ގަނޑިއަކީ 9:00 އެވެ.މަޖިލީހުގެ ރިޔާސަތުން ވަނީ ޖަލްސާ ފެށުމަށް ބޭނުންވާ ކޯރަމް ހަމަވޭތޯ ދެ ފަހަރަށް މަސައްކަތް ކޮށްފައެވެ. އެގޮތުން 9.30 ގައި ފެށުމަށް މަސައްކަތް ކޮށްފައިވާއިރު، 10 ޖެހިއިރުވެސް ޖަލްސާ ފެށުމަށް ވަނީ މަސައްކަތް ކޮށްފައެވެ.

މި ހަފްތާގެ މަޖިލިސްގެ ހުރިހާ  ޖަލްސާއެއް ވެސް ފަށާފައިވަނީ ކަނޑައެޅިފައިވާ ގަނޑިއަށް ވުރެ ލަހުންނެވެ.

މަޖިލިސް ޖަލްސާ ފެށުމަށް ބޭނުންވާ ކޯރަމަކީ 22 މެމްބަރުންނެވެ.

ބުދަ ދުވަހުގެ ޖަލްސާއަށް އެޖެންޑާ ކޮށްފައިވަނީ މަޖިލީހުގެ ރައީސްގެ މޭޒުން ހުށަހަޅާ ކަންތަކުގެ ތެރެއިން ފަނޑިޔާރުންގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމަށް ފަހު އެ ބިލުގެ އިބްތިދާއީ ބަހުސް ކުރިއަށް ގެންދިއުމުގެ ފުރުސަތު ދިނުމަށްޓަކައި، ވޯޓަށް އެހުމެވެ.

 މީގެ އިތުރުން މަޖިލީހަށް ތައާރަފް ކުރަންޖެހޭ ބިލްތަކުގެ ތެރެއިން ޖަލްސާއަށް އެޖެންޑާ ކޮށްފައިވަނީ ވިލުފުށީ ދާއިރާގެ މެމްބަރު ރިޔާޒް ރަޝީދު ހުށަހަޅުއްވާފައިވާ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލާއި، ވެލިދޫ ދާއިރާގެ މެންބަރު ޢަބްދުالله ޔާމީން ހުށަހަޅުއްވާފައިވާ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމެވެ.

 އިބްތިދާއީ ބަހުސްގެ ގޮތުގައި ބަހުސް ކުރުމަށް އެޖެންޑާ ކޮށްފައިވަނީ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލެވެ.