ދުލެއް ނުކުރާނަން- ރައީސް ވެސް ބައިވެރިވެވަޑައިގަންނަވާ!
"ދުލެއް ނުކުރާނަން" ހޭޝްޓެގް ލިޔުއްވާ ރައީސް އިބްރާހިމް މުހައްމަދު ސޯލިހު ވަނީ ޓްވީޓް ކުރައްވާފައި
ރައީސް ސާލިހު
ބްލޮގާ ޔާމީން ރަޝީދު އަނިޔާވެރި ގޮތަކަށް މަރާލިތާ މިއަދަށް ދެ އަހަރު ފުރޭއިރު އެކަމާ ގުޅުވައިގެން ބާއްވާ ހިނގާލުމުގައި ރައީސް އިބްރާހިމް މުހައްމަދު ސާލިހު ބައިވެރިވެ ވަޑައިގަންނަވާނެ ކަމަށް ރައީސް އޮފީހުން ބުނެފިއެވެ.
ޔާމީންގެ ހަނދާން އާކޮށް އިންސާފު ހޯދައިދިނުމަށް އެދި ގޮވާލާ ހިނގާލުމުގައި ރައީސް ބައިވެރިވެވަޑައިގަންނަވާ އިރު، "ދުލެއް ނުކުރާނަން" ހޭޝްޓެގް ލިޔުއްވާ ރައީސް އިބްރާހިމް މުހައްމަދު ސޯލިހު ވަނީ ޓްވީޓް ކުރައްވާފައެެވެ. އަދި ގިނަ ބަޔަކު ދަނީ އެ ޓްވީޓާ މެދު ހިތްހަމަޖެހުން ފާޅުކޮށް ރައީސަށް ޝުކުރު ދަންނަވަމުންނެވެ.
"ދުލެއް ނުކުރާނަން" އެ ޝިއާރަކީ ޔާމީން ރަޝީދަށް އިންސާފު ހޯދުމަށް ކުރާ ކެމްޕެއިންގެ ޝިއާރެކެވެ. އެ ޝިއާރު އުފެދިގެން އައިސްފައި ވަނީ ވެސް ޔާމީން ރަޝީދުގެ ޓްވީޓްތަކުންނެވެ.
"ދުލެއް ނުކުރާނަން" ލިޔުއްވާ ރައީސް ޓްވީޓް ކުރެއްވާފައިވާއިރު، ގެއްލުވާލާފައިވާ ނޫސްވެރިޔާ އަދި ބްލޮގަރ ޔާމީން ރަޝީދުގެ އިތުރުން އެފަދަ ލާއިންސާނީ ގޮތްތަކަށް މަރާލާފައިވާ މީހުންގެ މައްސަލަތައް ބަލައި ކުށްވެރިވާ މީހުން އިންސާފުގެ ކުރިމައްޗަށް ގެނައުމަށް ރައީސް ސާލިހު ވަނީ ވައުދުވެވަޑައިގަންނަވާފައެވެ.
ޔާމީން މަރާލާފައި ވަނީ 2017 ވަނަ އަހަރުގެ އޭޕްރީލް މަހުގެ 23 ވަނަ ދުވަހުގެ ރޭ ދަންވަރުގެ ވަގުތެއްގައި އޭނާ ވަޒީފާ އަދާކުރާ އޮފީހުގައި އުޅުމަށް ފަހު އޭނާ ދިރިއުޅޭ ގެއަށް ވަންތަނުންނެވެ. އަނިޔާވެރި ގޮތަކަށް އޭނާ މަރައިލައިފައި އޮއްވާ ފެނުނީ އޭނާ ދިރިއުޅެމުން ދިޔަ މ. ސްޕެޓިއުލާގޭގެ ސިޑި ގޮޅި ކައިރިންނެވެ.
