މެޖިސްޓްރޭޓްކަން ކުރުމަކީ ދެކޭ ހުވަފެނެއް: ސުޢޫދު

ރާއްޖޭގެ ރަށެއްގައި މެޖިސްޓްރޭޓެއްގެ މަޤާމު އަދާކުރުމަކީ ދެކޭ ހުވަފެނެއް ކަމަށް ކުރީގެ ބަންޑާރަ ނައިބު އަދި ތަޖުރިބާކާރު ޤާނޫނީ ވަކީލު އަލްއުސްތާޛް ހުސްނުއްސުޢޫދު ވިދާޅުވެއްޖެއެވެ.

ރާއްޖޭޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަންގެ ރައީސްކަން ވެސް ކުރައްވާ ސުޢޫދު ވިދާޅުވީ، އެ ކޮމިޝަންގެ މަސައްކަތް ނިމުމުން، ބޮޑަށް މަސައްކަތް ކުރައްވާނީ ފޮތް ލިޔުއްވުމާއި، އުނގަންނައިދިނުމުގެ އިތުރުން ޤާނޫނީ ވަކީލުކަން ކޮށްދިނުމުގައި ކަމަށެވެ.

އެ މަސައްކަތް އެހެން ކުރި ނަމަވެސް މެޖިސްޓްރޭޓް ކަމަކީ ވަރަށް ކުރައްވާހިތްވާ ކަމެއް ކަމަށް ވިދާޅުވެ، ސުޢޫދު ވަނީ ޅ އަތޮޅު، ބ އަތޮޅު ނުވަތަ އަރިއަތޮޅުގެ ރަށެއްގައި މެޖިސްޓްރޭޓްކަން ކުރުމަށް އެދިލައްވާކަން ހާމަކުރައްވާފައެވެ. އަދި ޚާއްސަކޮށް ޅ. އޮޅުވެލިފުށީގެ މެޖިސްޓްރޭޓްކަން ކުރެއްވުމަށް ސުޢޫދު ވަނީ ޝައުޤުވެރިކަން ހާމަކުރައްވާފައެވެ.

ސިވިލް ކޯޓުގެ ގާޒީކަން ވެސް ކުރިން ކުރައްވާފައިވާ ސުއޫދު ވިދާޅުވީ، ޤާނޫނީ ދާއިރާގެ އެންމެ ފުރިހަމަ ތަޖުރިބާއެއް ލިބޭނީ އެންމެ ދަށު ކޯޓުގައި މަސައްކަތް ކޮށްގެން ކަމަށް ދެކިލައްވާ ކަމަށާއި، އެމަނިކުފާނަކީ ޤާނޫނީ ދާއިރާ ދިރާސާ ކުރައްވައި ފޮތް ލިޔުއްވާ ބޭފުޅެއް ކަމުން، އެންމެ ގިނަ ކަންކަން ދަސްވާނީ ޝަރީޢަތްކުރާ ދަށު ކޯޓެއްގައި މަސައްކަތް ކުރައްވައިގެން ކަމަށް ޤަބޫލުކުރައްވާ ކަމަށެވެ.

ޤާނޫނީ ދާއިރާއިން ގިނަ ދިރާސާތަކެއް ކުރައްވައި، ޤާނޫނީ އެކި މައުލޫޢުތަކަށް ގިނަ ފޮތްތަކެއް ލިޔުއްވާފައިވާ ސުޢޫދަކީ ރާއްޖޭގެ ޖުޑީޝަރީ އިސްލާޙުކުރުމަށް އެންމެ ބޮޑަށް ބާރުއަޅުއްވާ، އެކަމަށް ގިނަ މަސައްކަތްތަކެއް ކުރައްވާ ބޭފުޅެކެވެ.