ޑރ. އިޔާޒުގެ ރައްދު ޝިދާތާ އަށް: ގައުމެއްގެ އެންމެ އިސްވެރިޔަކަށް އަންހެނަކު ހުރުން އިސްލާމް ދީން ހުއްދައެއް ނުކުރޭ
22 އެޕްރީލު 2019 | ހޯމަ 17:56ގައުމެއްގެ އެންމެ އިސްވެރިއަކަށް އަންހެނަކު ހުރުން އިސްލާމްދީން ހުއްދައެއް ނުކުރޭ: ޑރ. އިޔާޒް
ރައްޔިތުންގެ މަޖިލިސް
މަޖިލީހުގެ ރިޔާސަތުން އަންހެން ބޭފުޅަކު ފެނުމަކީ ދުނިޔެއަށް ދެއްކޭނެ ނަމޫނާއެއް ކަމަށް ވިދާޅުވެ މިނިސްޓަރ އޮފް ޖެންޑަރ ފެމެލީ އެންޑް ސޯޝަލް ސާރވިސަސް ޝިދާތާ ޝަރީފް ކުރައްވާފައިވާ ޓްވީޓަކަށް ރާއްޖޭގެ މަޝްހޫރު ދީނީ އިލްމުވެރިޔާ ޑރ މުހައްމަދު އިޔާޒު ރައްދު ދެއްވައިފިއެވެ.
މިނިސްޓަރ ޝިދާތާ އާދިއްތަ ދުވަހު ކުރައްވާފައިވާ ޓްވީޓެއްގައި ވިދާޅުވެފައި ވަނީ 19 ވަނަ ރައްޔިތުންގެ މަޖިލީހުގެ ރައީސް ނުވަތަ ނައިބުރައީސްގެ މަގާމުގައި އަންހެން މެންބަރަކު ފެނިގެން ދިއުމަކީ ބައިނަލްއަގުވާމީ ދުނިޔެއަށް ދެއްކޭ ނަމޫނާއެއް ކަމަށެވެ.
މި ޓްވީޓަށް ރައްދު ދެއްވަމުން ޑރ. އިޔާޒު ވިދާޅުވީ ރާއްޖޭގެ ރައީސުލް ޖުމްހޫރިއްޔާ އާއި ނައިބު ރައީސް ނެތް ހާލަތެއްގައި ގައުމާ ހަވާލުވާނީ މަޖިލީހުގެ ރައީސް ކަމަށާއި އަދި ގައުމެއްގެ އެންމެ އިސްވެރިއަކަށް އަންހެނަކު ހުރުން އިސްލާމްދީން ހުއްދަ ނުކުރާ ކަމަށެވެ.
ޑރ. އިޔާޒް މިހެން ވިދާޅުވެފައިވާ އިރު މަޖިލީހުގެ ރައީސް ކަމަށް އައްޑޫ މީދޫ ދާއިރާގެ މެންބަރު އަދި އެމްޑީޕީ ޕާލަމެންޓްރީ ގްރޫޕުގެ ޑެޕިއުޓީ ލީޑަރު ރޮޒައިނާ އާދަމް ވަނީ މަޖިލީހުގެ ރައީސް ކަމަށް ޝައުގުވެރިކަން ފާޅުކުރައްވާފައެވެ. އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ މަޖިލީހުގެ ނައިބު ރައީސް ކަމަށް ގެނައުމަށް ގިނަ ބަޔަކު ދަނީ ހިޔާލުފާޅުކުރަމުންނެވެ.
