ދިގު އިންތިޒާރަކަށް ފަހު ''ބާރަތު''ގެ ޓްރެއިލާ ރިލީޒްކޮށްފި

އެކްޓަރ ސަލްމާން ޚާން ވަނީ އޭނާގެ އަންނަން އޮތް ފިލްމް "ބާރަތު" ގެ ޓްރެއިލާ ހިއްސާކޮށްފައެވެ.

ތިން މިނެޓް އެގާރަ ސިކުންތުގެ ދިގު މި ޓްރެއިލާގައި ''ބާރަތު''ގެ ވާހަކަ ކިޔައިދެއެވެ. ''ބާރަތު'' އަކީ މި ފިލްމްގައި ސަލްމާން އަށް ދީފައިވާ ނަމެވެ. އަދި އެ ނަމުގައި މުޅި ހަޔާތް ހޭދަކުރަމުންދާތަން ދައްކުވައިދެއެވެ.

މި ފިލްމްގައި ސަލްމާން އަދާކުރަނީ އޭނާގެ ގައުމާއި އާއިލާ ދެކެ ލޯބިވާ އާދައިގެ ދިރިއުޅުމެއް އުޅޭ މީހެއްގެ ރޯލެވެ.

މި ފިލްމްގައި ސަލްމާންގެ ބައްޕަގެ ރޯލުން ފެނިގެންދާނީ ޖެކީ ޝްރޯފްއެވެ.

ސަލްމާން ވަނީ މީގެ ކުރިން ''ބާރަތު''ގައި އޭނާ ފެނިގެންދާ ތަފާތު ފަސް ގޮތް ބެލުންތެރިންނާ ހިއްސާކޮށްފައެވެ. ސަލްމާންގެ ހަޔާތުގެ 60 އަހަރެއް ދައްކުވައިދޭ މި ފިލްމްގައި 1964 ވަނަ އަހަރު ދައްކުވައިދޭއިރު ސަލްމާން އަދާކުރަނީ ސަރުކަސް އާރޓިސްޓެއްގެ ރޯލެވެ. އެހެންގޮސް 2010 ވަނަ އަހަރު ދައްކުވައިދެނީ ސަލްމާންގެ އުމުރުން 70 އަހަރެވެ.

މި ފިލްމްގައި ސަލްމާން ޚާންއާ އެކު ލީޑް ރޯލުން ފެނިގެންދާނީ ކެޓްރީނާ ކެއިފް، ދިޝާ ޕަޓާނީ، ތައްބޫ، ޖެކީ ޝްރޯފް، ސުނިލް ގްރޯވާ އެވެ.

"ބާރަތު" ރިލީޒް ކުރުމަށް ހަމަޖެހިފައި ވަނީ އަންނަ ޖޫން މަހުގެ 5 ގައެވެ.