ނޫރަށް ފަހު ނޫސްވެރިންނަށް ކުރާ އިޚުތިރާމް އިތުރުވެއްޖެ: ސޮނާކްޝީ

ސޮނާކްޝީ ސިންހަގެ އެންމެ ފަހުގެ ފިލްމު "ނޫރް" އަށް ފަހު، ނޫސްވެރިންނަށް ކުރާ ޢިޚުތިރާމް އިތުރުވެގެން ގޮސްފައިވާ ކަމަށް އޭނާ ބުނެފިއެވެ.

ޕާކިސްތާނުގެ ލިޔުންތެރިޔާ، ސަބާ އިމްތިއަޒްގެ "ކަރާޗީ، ޔޫ އާރ ކިލިންގ މީ" އަށް ބިނާކޮށް ތައްޔާރުކޮށްފައިވާ މި ފިލްމުގައި ސޮނާކްޝި ކުޅެފައިވަނީ މުމްބާއީގައި ހަރަކާތްތެރިވާ ޒުވާން ނޫސްވެރިއެއްގެ ރޯލެވެ.

މި ފިލްމުގެ ޓްރެއިލަރ ލޯންޗް ކުރުމަށް ބޭއްވި ޙަފްލާގައި ވާހަކަ ދައްކަމުން ސޮނާކްޝި ބުނީ، ފިލްމުގެ މަސައްކަތް ކުރަމުން ދިޔައިރު ނޫސްވެރިންގެ ދިރިއުޅުން އިހުސާސް ކުރެވުނު ކަމަށާއި، އޭގެ ސަބަބުން ނޫސްވެރިންނަށް ކުރާ އިޚުތިރާމް އިތުރުވެގެން ގޮސްފައިވާ ކަމަށެވެ. އަދި ކުރިއަށް އޮތް ތާނގައި ނޫސްވެރިންގެ ސުވާލުތަކަށް ބީރު ކަންފަތެއް ނުދީ ވޭތޯ ބަލާނެ ކަމަށް ވެސް އޭނާ ވަނީ ބުނެފައެވެ. އަދި ނޫސްވެރިން އުނދަގޫ ސުވާލު ކުރާ ސަބަބު މިހާރު ވިސްނޭ ކަމަށާއި، އެކަމަށް ވެސް އިޚުތިރާމް ކުރަން ދަސްވެއްޖެ ކަމަށް އޭނާ ވަނީ ބުނެފައެވެ.

އޭޕްރީލް މަހުގެ 21 ވަނަ ދުވަހު ރިލީޒް ކުރުމަށް ނިންމާފައިވާ މި ފިލްމުގައި ސޮނާކްޝީއާ އެކު ހަރަކާތްތެރިވާނީ، ކަނާން ގިލް އާއި ޝިބާނީ ޑާންޑޭކަރެވެ.