"މީ ލޯތްބަކީ" ގެ ޓްރެއިލާ ރިލީޒް ކޮށްފި

އަންނަ އެޕްރީލް މަހުގެ 5 ވަނަ ދުވަހު އޮލިމްޕަހުގައި އެޅުވުމަށް ހަމަޖެހިފައިވާ ދިވެހި ފިލްމް "މީ ލޯތްބަކީ" ގެ އޮފިޝަލް ޓްރެއިލާ ރިލީޒް ކޮށްފި އެވެ.

ޑާކްރެއިން އެންޓަރޓެއިންމަންޓް އިން އުފައްދާފައިވާ މި ފިލްމްގެ ޓްރެއިލާ މި ހަފްތާ ތެރޭގައި ރިލީޒް ކޮށްފައިވާއިރު ފިލްމް ޓިކެޓް ވެސް މިހާރު ވަނީ އޮލިމްޕަހުގައި ވިއްކަން ފަށާފައެވެ.

މީ ލޯތްބަކީއަކީ ބެލުންތެރިން ހެތްވާލާނެ ފަދަ ތަފާތު ކޮމެޑީ ފިލްމެއް ކަމަށާއި ޑާކްރެއިންގެ އެހެން ފިލްމްތަކާ މުޅިން ތަފާތު ފިލްމެއް ކަމަށް މި ފިލްމްގެ ޕްރޮޑިއުސަރ މުހައްމަދު އަލީ (މޯގާ) ބުންޏެވެ.

މީ ލޯތްބަކީގައި މަޝްހޫރު ގިނަ ފަންނާނުންތަކެއް ފެނިގެންދާއިރު ލީޑް ރޯލުން ފެނިގެންދާނީ ޖުމައްޔިލް އަދި އައްޒަ އެވެ.

މި ފިލްމްގެ ފުރަތަމަ ޕްރޮމޯޝަނަލް ލަވަ ވެސް މިހާރު ވަނީ ރިލީޒް ކޮށްފައެވެ.

މީގެ ދުވަސްތަކެއް ކުރިން މަޝްހޫރު ޓްރިއޯ ބޭންޑުން ކިޔާފައިވާ "އޭ މަންޖެ" ކަވަރ ސޯންގެއް ގޮތަށް އަލުން މިފަހަރު މި ފިލްމަށް ކިޔަދީފައި ވަނީ ފަތޯ، ފުބޫ އަދި އަމާން އެވެ.

އެ ގޮތުން މި ފިލްމްގެ ޕްރޮމޯޝަނަލް ލަވައެއް ގޮތުގައި މިފަހަރު މި ލަވަ ގެނެސްދީފައިވާ ގޮތް މާ ފުރިހަމަ ކަމަށް ގިނަ ބަޔަކު ދަނީ ކޮމެންޓް ކުރަމުންނެވެ.

ޑާކް ރެއިންގެ އެންމެ ފަހުން ބެލުންތެރިންނަށް ފެނިފައިވާ ފިލްމަކީ "ވާށޭ މަށާއެކީ" އެވެ. މި ފިލްމަކީ މިހާތަނަށް އޮލިމްޕަހުގައި އެންމެ ގިނަ ހައުސްފުލް ޝޯތަކެއް އަޅުވާފައިވާ އެއް ފިލްމެވެ.