އަދިވެސް ހަމަލާ ދީފާނެ، ސަމާލުވޭ: އެމެރިކާގެ ސްޓޭޓް ޑިޕާޓްމަންޓް
މަރުވި މީހުންގެ އަދަދު 290 އަށް އަރާފައިވާ ކަމަށް ފުލުހުން ބުނޭ
އިއްޔެ ލަންކާއަށް ދިން ހަމަލާތަކުގެ ތެރެއިން
އާދީއްތަ ދުވަހު ލަންކާގެ އެކި ސަރަހައްދަށް ދިން ބޮމުގެ ހަމަލާތަކާއި ގުޅިގެން އަދިވެސް އިތުރު ހަމަލާތައް ދީފާނެ ކަމަށާއި ހަމަލާތައް ދިނުމަށް މަސައްކަތް ކޮށްފާނެ ކަމަށް އެމެރިކާގެ ސްޓޭޓް ޑިޕާޓްމަންޓުން ބުނެފިއެވެ.
އެމެރިކާގެ ސްޓޭޓް ޑިޕާޓްމަންޓުން ވަނީ ހަމަލާތައް ދީފާނެތީ އެކަމަށް ސަމާލުވެ ތިބުމަށް އިލްތިމާސް ކޮށްފައެވެ.
ލަންކާގެ އެތައް ސަރަހައްދަކަށް އާދީއްތަ ދުވަހު ހަމަލާތައް ދީ މަރުވި މީހުންގެ އަދަދު 290 އަށް އަރާފައިވާ ކަމަށް އެގައުމުގެ ފުލުހުން ވަނީ ބުނެފައެވެ. އެހަމަލާތަކުގައި އަނިޔާ ލިބުނު މީހުންގެ އަދަދު ގާތްތަނޑަކަށް 500 އަށް އަރައެވެ. ފުލުހުން ބުނެފައިވަނީ ބޮން ގޮއްވުމުގެ ހަމަލާއާއި ގުޅިގެން މިހާތަނަށް 24 މީހަކު ހައްޔަރު ކޮށްފައިވާ ކަމަށެވެ.
އާދީއްތަ ދުވަހު ލަންކާގެ އަށް ސަރަހައްދަކަށް ބޮމުގެ ހަމަލާ ދިނުމަށް ފަހު އިތުރު ތަންތަނަށް ހަމަލާ ދިނުމަށް ހަމަލާދޭން އުޅުނު މީހުން މަސައްކަތް ކުރިއެވެ. ލަންކާ އެއާޕޯޓާއި ކައިރިން ހަފޫޓްގެ ޕީޕީސީ ހޮޅިއެއްގެ ތެރޭގައި ހަދާފައިވާ ބޮމެއް ނުވަތަ (އައިއީޑީ) ލަންކާގެ ފުލުހުންނަށް ފެނުނީ އާދީއްތަ ދުވަހުގެ ރޭގައެވެ. އެބޮން ވަނީ ރައްކާތެރި ހިސާބަކަށް ގެންގޮސް ފަހުން ނައްތާލާފައެވެ.
ލަންކާގެ ޑިފެންސް މިނިސްޓަރ ރުވާން ވިޖޭވަރުދަނަ ވިދާޅުވީ އެ ގައުމުގައި ހަރަކާތްތެރިވާ ހަރުކަށި ވިސްނުމުގެ ގުރޫޕްތަކާ ދެކޮޅަށް ހަރުކަށި ފިޔަވަޅު އަޅުއްވާނެ ކަމަށާއި އެ ކަންތައްތައް ހުއްޓުވާނެ ކަމަށެވެ.
ލަންކާގެ ސަރުކާރުން ބުނެފައި ވަނީ އާދީއްތަ ދުވަހު ދީފައިވާ އަށް ހަމަލާގެ ތެރެއިން ގިނަ ހަމަލާއަކީ އަމިއްލަ ގައިގައި ބޮން ހަރުކޮށްގެން ދީފައިވާ ހަމަލާތަކެއް ކަން ކަށަވަރު ކޮށްފައެވެ. އަދި އެހަމަލާ ދިނުމުގައި ބައިވެރިވެފައި ވަނީ އެއް ގްރޫޕަކަށް ނިސްބަތްވާ މީީހުން ކަމަށާއި އެއީ މަދު ބަޔަކު ވެގެން ދިން ހަމަލާތަކެއް ކަމަށް ވަނީ ބުނެފައެވެ.
މިހަމަލާތަކާއި ގުޅިގެން މުޅި ލަންކާގެ ސެކިއުރިޓީ ވަނީ ވަރުގަދަ ކޮށްފައެވެ.
