ލަންކާގައި ކާފިއު އިއުލާންކޮށް، ސޯޝަލް މީޑިއާތައް ބްލޮކް ކޮށްފި

ބޮމުގެ ހަމަލާތަކާއި ގުޅިގެން ސްރީލަންކާގައި ކާފިއު އިއުލާންކޮށް، ސޯޝަލް މީޑިއާތައް ބްލޮކް ކޮށްފިއެވެ.

ލަންކާގައި ކާފިއު އިއުލާން ކޮށްފައިވަނީ އިރުއޮއްސި 6:00 އިން ފެށިގެން މާދަމާ ހެނދުނު 6:00 އަށެވެ.

މީގެ އިތުރުން ހޯމަ ދުވަހާއި އަންގާރަ ދުވަސް ބަންދު ކަމަށް ވެސް ވަނީ ކަނޑައަޅާފައެވެ. އަދި ހަމަލާތަކާއި ގުޅިގެން ސުކޫލްތައްވެސް ވަނީ ބަންދުކޮށްފަ އެވެ.

ސްރީލަންކާގައި ބޮން ގޮއްވާލި ސަރަހައްދުތަކުގެ އަދަދު މިހާރު ވަނީ 8 އަރާފަ އެވެ. އެންމެ ފަހުން އެގައުމަށް ބޮމުގެ ހަމަލާ ދީފައިވަނީ ޑަމަޓަގޮޑާގައި ހުންނަ ހައުސިން ކޮންޕްލެކްސެއްގައެވެ.

ލަންކާއަށް ދެމުންދާ ބޮމުގެ ހަމަލާގައި މިހާތަނަށް 185 އަށް ވުރެ ގިނަ މީހުން މިހާތަނަށް މަރުވެފައިވާއިރު 450 އަށް ވުރެ ގިނަ މީހުން ވަނީ ޒަޚަމްވެފައެވެ.

އޭގެއިތުރުން ހަމަލާތަކާއި ގުޅިގެން ލަންކާގައި ސޯޝަލް މީޑިއާތައް ބްލޮކްކޮށްފައިވާކަން ސަރުކާރުން ވަނީ ހާމަކޮށްފަ އެވެ. އަދި ސޯޝަލް މީޑިއާތައް ބްލޮކްކުރީ ގިނަ ކަންތައްތަކަކަށް ބެލުމަށްފަހު އެ ސަރުކާރުން ބުނެފައިވެއެވެ.