މާޒިޔާއިން ސެކުލޮސްކީ އަނބުރާ ގެނެސްފި

މާޒިޔާ ސްޕޯޓްސް އެންޑް ރެކްރިއޭޝަނުން އެޓީމުގެ ކުރީގެ ކޯޗު މެސެޑޯނިއާގެ މަރުޖާން ސެކުލޮސްކީ ގެނެސްފިއެވެ.

މާޒިޔާގެ ތާރީހުގައި ވެސް އެޓީމަށް ގެނައި ފުރަތަމަ ބިދޭސީ ކޯޗު ސެކުލޮސްކީ އަނބުރާ އެޓީމަށް އަލުން ގެންނަން ނިންމާފައިވާއިރު، އޭނާ ވަނީ 2017 ވަނަ އަހަރު މާޒިޔާއާ އެކު ކާމިޔާބީތަކެއް ހޯދާފައެވެ.

ސެކުލޮސްކީ މާޒިޔާ ދޫކޮށްލީ 2017 ވަނަ އަހަރުގެ ޕްރިމިއާ ލީގުގެ ވަކި ހިސާބަކުންނެވެ. އޭނާ އެފަހަރު ކްލަބް ދޫކޮށްލީ އެއްބަސްވުމުގައި ބާކީ މަދު ދުވަސްކޮޅެއް އޮއްވައި، އެއްބަސްވުން އާނުކޮށެވެ.

މިދިޔަ ސީޒަނުގައި މާޒިޔާގެ ކޯޗެއްގެ ގޮތުގައި މަސައްކަތް ކޮށްފައި ވަނީ އިސްމާއިލް މަހުފޫޒް (އިންމަ) އެވެ. އޭނާ މި ސީޒަނުގައި ފެނިގެންދާނީ ފުރަތަމަ ޑިވިޝަނަށް އަލަށް ޕްރޮމޯޓްވި ދަ ގްރާންޑޭ ސްޕޯޓްސް ކްލަބުންނެވެ.

މެސެޑޯނިއާ އަށް އުފަން ސެކުލޮވްސްކީ ވަނީ މާޒިޔާގެ ކޯޗުކަމާ ހަވާލުވެ، 2017 ވަނަ އަހަރު އެޓީމަށް ބޮޑު ކުރިއެރުންތަކެއް ހޯދައިދީފައެވެ. އެގޮތުން މާލޭ ލީގު އަދި ޗެރިޓީ ޝިލްޑް އެޓީމަށް ކާމިޔާބު ކޮށްދީ، އޭނާ ވަނީ އެ ކްލަބަށް އޭއެފްސީ ކަޕްގައި ވެސް ރަނގަޅު ނަތީޖާތަކެއް ހޯދައިދީފައެވެ.

ސެކުލޮސްކީގެ ކޯޗުކަމުގައި މާޒިޔާ އިން ކުޅުނު 31 މެޗުގެ ތެރެއިން 19 މެޗުން ވަނީ މޮޅުވެފަ އެވެ. ހަތް މެޗުން ބަލިވިއިރު، ފަސް މެޗު ނިމުނީ އެއްވަރުވެގެންނެވެ.

ކުލޮވްސްކީއަކީ މިޔަންމާގެ ކަލްބުތަކަކަށް ކާމިޔާބު ހޯދައިދިން ކޯޗެކެވެ. އޭނާ ވަނީ މިޔަންމާގެ އަޔެޔަވަދީ އަދި ޔަންގޮން ޔުނައިޓެޑަށް ކާމިޔާބީތަކެއް ހޯދައިދީފަ އެވެ. މިޔަންމާގެ ތާރީހުގައި އެންމެ ކާމިޔާބު ކޯޗަކީ ވެސް ސެކުލޮވްސްކީއެވެ.

ސެކުލޮވްސްކީ ވަނީ ދެ ފަހަރެއްގެ މަތިން އަޔެޔަވަދީ އަށް އިރުޝާދުދީފަ އެވެ. އެ ކްލަބާ ދެ ފަހަރެއްގެ މަތިން ހަވާލުވެ، އޭނާ ވަނީ އަޔެޔަވަދީ އަށް ވިދިވިދިގެން ތިން ސީޒަންގައި މިޔަންމާ ކަޕްގެ ޗެމްޕިއަންކަން ހޯދައިދީފަ އެވެ. 2016 ވަނަ އަހަރު އަހަރު ޔަންގޮން ޔުނައިޓެޑާ ހަވާލުވެ، އޭނާ ވަނީ އެ ކްލަބަށް މިޔަންމާ ނެޝަނަލް ލީގު އަދި މިޔަންމާ ނެޝަނަލް ކަޕްގެ ރަނަރަޕްކަން ހޯދައިދީފަ އެވެ.