ކޯރަމް ހަމަނުވެގެން މަޖިލިސް ޖަލްސާ ގަޑިއަށް ނުފެށުނު!

ރައްޔިތުންގެ މަޖިލީހުގެ ޖަލްސާ ކޯރަމް ހަމަނުވެގެން ފެށުން ލަސްކުރަން ޖެހިއްޖެއެވެ.

މަޖިލީހުގެ ރިޔާސަތުން ވިދާޅުވެފައި ވަނީ މަޖިލީހުގެ ޖަލްސާ ދެން ފަށާނީ 9:30 ގައި ކަމަށެވެ. މަޖިލީހުގެ ޖަލްސާތައް ފަށާ ގަނޑިއަކީ 9:00 އެވެ.މަޖިލީހުގެ ރިޔާސަތުން ވަނީ ޖަލްސާ ފެށުމަށް ބޭނުންވާ ކޯރަމް ހަމަވާތޯ 9:10 ވަންދެން މަޑުކޮށްފައެވެ.

ފާއިތުވި ދެ ދުވަހުގެ މަޖިލިސް ޖަލްސާ ވެސް ކޯރަމް ހަމަނުވެގެން ފެށުނީ ކަނޑައެޅިފައިވާ ގަނޑިއަށް ވުރެ ލަހުންނެއެވެ.

މަޖިލިސް ޖަލްސާ ފެށުމަށް ބޭނުންވާ ކޯރަމަކީ 22 މެމްބަރުންނެވެ.

ބުދަ ދުވަހުގެ ޖަލްސާއަށް އެޖެންޑާކޮށްފައި ވަނީ ކޮމިޓީތަކުން ދިރާސާކޮށް ނިންމާފައިވާ، ކޮމިޓީތަކުގެ ރިޕޯޓްތަކެވެ.

ކޮމިޓީން ނިންމާ ޖަލްސާއަށް އެޖެންޑާކޮށްފައިވާ ރިޕޯޓްތަކުގެ ތެރޭގައި ހިމެނެނީ ރައީސުލްޖުމްހޫރިއްޔާގެ ނައިބުކަން ކޮށްފައިވާ މީހަކަށް ދޭންޖެހޭ ރައްކާތެރިކަމުގެ ބިލު ދިރާސާ ކުރެއްވުމަށް ހޮއްވެވި ވަގުތީ ކޮމިޓީން އެ ބިލު ދިރާސާ ކުރައްވައި ނިންމެވިގޮތުގެ ރިޕޯޓާއި، މާލިއްޔަތު ކޮމިޓީން ދިރާސާކޮށްފައިވާ 101 އޮޑިޓް ރިޕޯޓްގެ ތެރެއިން 29 އޮޑިޓް ރިޕޯޓެއެވެ.