ރިބެރީ އަލްސާދްއަށް ސޮއިކުރުމާ ގާތަށް

ބަޔާން މިއުނިކަށް ކުޅެމުން އަންނަ ފްރާންސްގެ ވިންގާ ފްރޭންކް ރިބެރީ ގަތަރުގެ އަލް ސާދްއަށް ސޮއިކުރުމާ ގާތަށް ގޮސްފައިވާ ކަމަށް ރިޕޯޓްތައް ބުނެފިއެވެ.

ކިކާއިން ބުނީ، އުމުރުން 36 އަހަރުގެ ރިބެރީ މި ސީޒަނަށް ފަހު ބަޔާން ދޫކޮށްލަން ނިންމާފައިވާ ކަމަށާއި، އޭނާ ބަދަލުވާނީ އަލްސާދްއަށް ކަމަށެވެ.

އަލް ސާދްއަކީ ބާސެލޯނާއަށް ކުރިން ކުޅުނު ސްޕެއިންގެ މިޑްފިލްޑަރ ޒަވީވެސް ކުޅެމުން އަންނަ ކްލަބެވެ. އެގޮތުން ކުރިޔަށް އޮތް ސީޒަނުގައި ޒަވީ އާއި ރިބެރީ އެއް ޓީމަކުން ފެނުމަކީ ވަރަށް ކައިރި ކަމެކެވެ.

ބަޔާންއާއެކު ރިބެރީ ހަދާފައިވާ އެއްބަސްވުން ހަމަވާނީ މި ސީޒަނަށްފަހުއެވެ. އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ.

މީގެކުރިން ގަލަސަތަރާއި އަދި މާސޭއަށް ކުޅެފައިވާ ރިބެރީ ބަޔާންއަށް ބަދަލުވީ 2007 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 420 މެޗުގައި 122 ލަނޑު ކާމިޔާބު ކޮށްފައެވެ.

ބަޔާންއާއެކު 8 ލީގު ތަށި ކާމިޔާބު ކޮށްފައިވާ ރިބެރީ ވަނީ ޖަރުމަން ކަޕް ފަސް ފަހަރު، ޖަރުމަން ސުޕަ ކަޕް ހަތަރު ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަ ކަޕް އެއްފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބު ކޮށްފައެވެ.

ފްރާންސް ގައުމީ ޓީމާއެކު ފީފާ ވޯލްޑް ކަޕްގެ ދެވަނަ 2006 ވަނަ އަހަރު ހޯދާފައިވާ ރިބެރީ ވަނީ ގައުމީ ޓީމަށް ކުޅުނު 81 މެޗުގައި 16 ލަނޑު ކާމިޔާބު ކޮށްފައެވެ.

ފްރާންސްގެ އެންމެ މޮޅު ކުޅުންތެރިޔާގެ މަގާމު ތިން ފަހަރު ހޯދާފައިވާ ރިބެރީ ވަނީ ޔުއެފާގެ އެންމެ މޮޅު ކުޅުންތެރިޔާގެ މަގާމު އެއްފަހަރު އަދި ފީފާ ބެލޮންޑޯގެ ތިންވަނަ އެއްފަހަރު ހޯދާފައެވެ. އަދި އޭނާ ވަނީ 2013 ވަނަ އަހަރު ބޭއްވުނު ވޯލްޑް ކަޕްގެ ގޮލްޑެން ބޯލް ވެސް ހޯދާފައެވެ.