ގުރައިދޫ ބަނދަރުގެ ބޮޑުބައެއް ހަލާކުވެ، މަސްވެރިންނަށް ދަނީ ބޮޑެތި ގެއްލުންތަކެއް ލިބެމުން: ކައުންސިލް
15 އެޕްރީލު 2019 | ހޯމަ 07:08ކަނޑުގައި މަސްވެރިންގެ ދޯނިތައް އަޅަންޖެހޭ
ތ. ގުރައިދޫގެ ބަނދަރުގެ ތޮށިގަނޑުން ބައެއް ވެއްޓި ނުރައްކަލާ ކުރިމަތިވެފައި. -- ފޮޓޯ: ރާއްޖެ އެމްވީ
ތ. ގުރައިދޫ ބަނދަރުގެ ބޮޑު ބައެއް ބޭނުން ނުކުރެވޭ ކަމަށާއި، މަސްވެރިންނަށް ބޮޑެތި ގެއްލުންތައް ވަމުން އަންނަ ކަމަށް އެރަށުގެ ކައުންސިލުން ބުނެފިއެވެ.
އާބާދީގައި 2000 ވުރެ ގިނަ މީހުން ދިރިއުޅޭ ގުރައިދޫގެ ބަނދަރުގެ އެތެރެ ތޮށިގަނޑުގެ ދަށުން ވެލިގަނޑު ދަމައިގެން ގޮސް، ދޯނިފަހަރު ބަނދަރުކޮށް، ލަފާފުރުމުގައި ދަތިތަކާ ވަނީ ކުރިމަތިވެފައެވެ.
ރާއްޖެއެމްވީއަށް މައުލޫމާތު ދެއްވަމުން ގުރައިދޫ ކައުންސިލަރު ނައުފަލް ހަސަން ވިދާޅުވީ ބަނދަރުގެ ހަތަރުބައިގެ ތެރެއިން ތިންބައި ހަލާކުވެފައިވާ ކަމަށާއި، ބަނދަރު ބޭނުން ނުކުރޭ ކަމަށެވެ. ނައުފަލް ވިދާޅުވީ ތޮށިގަނޑުގެ ދަށުން ވެލިގަނޑު ދަމައިގެންގޮސް އާންމު ރައްޔިތުންނަށް އެކަމުގެ ނުރައްކާތެރިކަން ފޯރާފައިވާ ކަމަށެވެ. އަދި ވިދާޅުވީ މިހާރު ބޭނުން ކުރެވެނީ ހަމައެކަނި ހުރަސް ތޮށި ކަމަށެވެ.
ގުރައިދޫއަކީ މަސްވެރި ރަށެއްކަން ފާހަގަކުރައްވައި ނައުފަލް ވިދާޅުވީ ބަނދަރު ހަލާކުވުމުގެ ސަބަބުން އެންމެ ބޮޑަށް ދަތިތަކާ ކުރިމަތިލާން ޖެހެނީ މަސްވެރިންނަށް ކަމަށެވެ. އަދި ބައެއް ފަހަރަށް ދޯނިތައް ކަނޑުގައި އަޅައިގެން ތިބެންޖެހޭ ކަމަށާއި، ފުރަން ބޭނުންވާ ވަގުތު ނުފުރި ލަސްވާ ކަމަށެވެ.
''މިހާރު ބަނދަރު އޮތް ހާލަތުން އަޅާފަ ބޭއްވޭނީ އެންމެ މަސްދޯންޏެއް. ދެން ހަމަ ހުރިހާ ދިމާލެއް ވެސް އެހާލަތުގަ. ރައްކާތެރިއެއްނުވާނެ'' ނައުފަލް ވިދާޅުވިއެވެ.
ނައުފަލް ވިދާޅުވީ ބަނދަރުގެ ހާލަތާ މެދު ރައްޔިތުން ކަންބޮޑުވުން ފާޅުކުރަމުން އަންނަތާ އެތައް ދުވަސް ފާއިތުވެގެން ގޮސްފި ކަމަށާއި، މިމައްސަލަ ކުރީގެ ރައީސް ޔާމީންގެ ސަރުކާރުގެ ސަމާލުކަމަށް ވެސް ގެނެސްފައިވާ ކަމަށެވެ. ނަމަވެސް އެއްބާރުލުން ލިބިފައިވާ ނުވާ ކަމަށް އޭނާ ވިދާޅުވިއެވެ.
މީގެ އިތުރުން ނައުފަލް ވިދާޅުވީ މިސަރުކާރުގެ ސަމާލުކަމަށް މި މައްސަލަ ގެނެސްފައިވާ ކަމަށާއި، އަދި ވަކި ޖަވާބެއް ނުލިބޭ ކަމަށެވެ. ބަނދަރު މާރާމާތުކުރެވި ރައްޔިތުންގެ މިކަންބޮޑުވުންތަކަށް މިސަރުކާރުން ހައްލު ހޯއްދަވައިދެއްވާނެ ކަމަށް އުންމީދު ކުރާ ކަމަށް އޭނާ ވިދާޅުވިއެވެ.
ގުރައިދޫގެ އުތުރު ފަރާތުގައި ހަދާފައިވާ 800 ފޫޓުގެ ބަނދަރެކެވެ.
