މާލެއަށް ކުރި ވިއްސާރައިގައި ބޮޑު ދިދަ ހަލާކުވެ، ދިދަ ބާލައިފި
ދިދަ ހެދުމަށްފަހު، ދިދަ އަލުން ނަގާނެކަމަށް އެމްއެންޑީއެފުން ބުނޭ
ގައުމީ ދިދަ އައްސާފައި ހުންނަ ދަނޑި - ދިދަ ހަލާކުވުމުގެ ސަބަބުން ދިދަ ވަނީ ނަގާފައި
މާލެއަށް އާދިއްތަ ދުވަހުގެ ރޭ (މިރޭ) ކުރި ވިއްސާރާގައި ޖުމްހޫރީ މައިދާނުގައި ހުންނަ ބޮޑު ދިދަ ހަލާކުވެ، ދިދަ ބާލައިފި އެވެ.
އެމްއެންޑީއެފްގެ މީޑިޔާ އޮފިޝަލް ކެޕްޓަން އިބްރާހިމް އާޒިމް ވިދާޅުވީ، ދިދަ ބާލާފައިވަނީ އިރުއޮއްސުނު އިރު އާއި ކޮޅިގަނޑެއްގައި ދިދަ ހަރުކޮށްފައިވާ ވާގަނޑު ހަލާކުވުމުގެ ސަބަބުން ކަމަށެވެ. އަދި ދިދަ ހެދުނުހާ އަވަހަށް ނަގާނެ ކަމަށްވެސް އޭނާ ވިދާޅުވި އެވެ.
އެމްއެންޑީއެފް އިން މިހެން ބުނެފައިވާ އިރު މާލޭ ސަރަހައްދަށް ހޮނިހިރު ދުވަހުގެ އިރު އޮއްސުނީސް ސުރެ އަންނަނީ ވަރަށް ބޯކޮށް ވާރޭ ވެހި، ވިއްސާރަ ކުރަމުންނެވެ. ވައި ގަދަވުމުގެ ސަބަބުން އާއްމުންގެ ބައެއް ތަކެއްޗަށް ގެއްލުންތަކެއްވެސް ވަނީ ލިބިފަ އެވެ.
ރާއްޖޭގެ މޫސުމާ ބެހޭ ގައުމީ އިދާރާ އިން ވަނީ ޔެލޯ އެލާޓް ނެރެފަ އެވެ. އެގޮތުން، ޔެލޯ އެލާޓް ނެރެފައިވަނީ ނ އަތޮޅުން ފެށިގެން ވ އަތޮޅު ހިމެނޭ ސަރަހައްދަށެވެ. އިރުއޮއްސުނު އިރު އައި ކޮޅިގަނޑާއި ގުޅިގެން މާލޭ އައި ހުޅުމާލެއައި އަދި މާލެ އައި ވިލިމާލެއައި ދެމެދު ދުއްވަމުންދާ ފެރީތައްވެސް މެދުކަނޑާލި އެވެ. އެހެންނަމަވެސް ފަހުން ވަނީ ފެރީގެ ހިދުމަތް ފަށާފަ އެވެ.
ރާއްޖެއަށް މިކުރާ ވިއްސާރައިގައި ކަނޑުދަތުރު ކުރާ ފަރާތްތަކުންވެސް ސަމާލުވުމަށް ކަމާ ގުޅޭ އިދާރާތަކުން ވަނީ އިލްތިމާސްކޮށްފަ އެވެ.
