އެންމެ ވަރުގަދަ ޝަހްސިއްޔަތަކީ ކޮރަޕްޝަނާއި ފަސާދަ އަށް ނޫނެކޭ ބުނާ މީހާ: ރައީސް
މި ޤައުމު މިއަދު އޮތް ޙާލަތާމެދު ވިސްނައި ފިކުރު ހިންގަން ފެށުމަށް ރައީސް ގޮވައިލެއްވި
ރައީސް ސޯލިހު ވާހަކަފުޅު ދައްކަވަނީ
މީހެއްގެ ގައިގައި ހުންނަ ޖެހޭ އެންމެ ޢަދުލުވެރި އަދި ރަނގަޅު ގޮތް ކަމުގައި ގަބޫލުކުރާ ޝަޚްސިއްޔަތަކީ، ކޮރަޕްޝަނާއި ޚިޔާނަތާއި ފަސާދައަށް ނޫނެކޭ ބުނުމުގެ ހިތްވަރު ހުންނަ މީހުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް އެހެން ވިދާޅުވީ، ގައުމީ ޔުނިވާސިޓީގެ 2019 ވަނަ އަހަރުގެ ދަސްވެނިވުން ރަސްމިއްޔާތު ޝަރަފްވެރި ކުރައްވައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ، އިންސާނާގެ ޝަހްސިއްޔަތު ބިނާވެގެން އަންނަނީ، އެމީހަކަށް ލިބިހުރި ޢިލްމުގެ ބޭނުން ހިފާ ގޮތެއްގެ މަތީގައި ކަމަށެވެ. ބުރާސްފަތި ދުވަހުގެރޭ ދަސްވެނިވުން ދަރިވަރުންނާއި މުހާތަބު ކުރައްވާ ރައީސް ވިދާޅުވީ، ކޮންމެ ދަރިވަރަކު ވެސް ޢަޒުމް ކަނޑައަޅަންވީ، ތިމާ އުނގެނުނު ޢިލްމުގެ އެހީގައި ތިމާގެ ކިބައިގައި މުޅިން އައު ޝަޚްޞިއްޔަތެއް އުފަން ކުރުވުން ކަމަށެވެ.
''އެއީ އަނެކުންނަށް އޯގާތެރިވެ، ކަމޭހިތާ، އަދި އަނެކުންގެ އިޙްސާސްތައް ދެނެގަނެ، އެހީތެރިކަން ފޯރު ކޮށްދިނުމަށް އިސްނަގާ ޝަޚްޞިއްޔަތެއް. ޙައްޤު ގޮތަކީ، އެންމެ ޢަދުލުވެރި ރަނގަޅު ގޮތް ކަމުގައި ގަބޫލުކުރާ ޝަޚްޞިއްޔަތެއް. އެއީ، ކޮރަޕްޝަނާއި ޚިޔާނަތާއި ފަސާދައަށް ނޫނެކޭ ބުނުމުގެ ހިތްވަރު ހުންނަ ޝަޚްޞިއްޔަތެއް.'' އެމަނިކުފާނު ވިދާޅުވިއެވެ.
މި ޤައުމު މިއަދު އޮތް ޙާލާމެދު ވިސްނައި ފިކުރު ހިންގަން ފެށުމަށް ރައީސް ވަނީ ދަސްވެނިވުނު ދަރިވަރުންނަށް ގޮވާލައްވާފައެވެ. އަދި ގައުމަށްޓަކައި ތިމާއަށް ކޮށްދެވޭނީ ކޮން ކަމެއްތޯ ބަލައި، އެކަމެއް ކޮށްދިނުމަށް އަވަސްވެގަތުމަށް ރައީސް ވަނީ ދަރިވަރުންގެ އަރިހުން އެދިވަޑައިގެންފައެވެ.
