މެލޭޝިއާގެ ކުރީގެ ބޮޑު ވަޒީރު ނަޖީބު ރައްޒާގުގެ އަނބިކަނބަލުން ރަސްމާ މަންސޫރުގެ މައްޗަށް ކޮރަޕްޝަނުގެ އާ ދައުވާއެއް އުފުލައިފި އެވެ.
ރަސްމާގެ މައްޗަށް އެންމެ ފަހުން ތުހުމަތުކޮށްފައި ވަނީ މެލޭޝިއާ ސަރުކާރުން ހިންގި ސޯލާ ޕަވާ ޕްރޮޖެކްޓެއް ހިންގަން ހޯދައިދޭ މަތިން ކުންފުންޏަކުން ރިޝްވަތުގެ ގޮތުގައި ފަސް މިލިއަން ރިންގިޓް (1.2 މިލިއަން ޑޮލަރު)ގެ ރިޝްވަތު ނެންގެވި ކަމަށެވެ. އެ ކުންފުނިން ރިޝްވަތު ނެންގެވި ކަމަށް ރަސްމާގެ މައްޗަށް ކޮށްފައިވާ ތުހުމަތަށް އޭނާ ވަނީ އިންކާރު ކުރައްވާފައެވެ.
ކުއާލަ ލަމްޕޫރުގައި ނޫސްވެރިންނާ ވާހަކަ ދައްކަވަމުން ރަސްމާ ވިދާޅުވީ އެކަމަނާ އާއި ފިރިކަލުންގެ މައްޗަށް ކުރާ ކޮރަޕްޝަނުގެ ތުހުމަތު ރައްޔިތުން މިހާރު ގަބޫލުނުކުރާ ކަމަށެވެ.
1އެމްޑީބީގެ ޚިޔާނާތުގެ 2.6 ބިލިއަން ރިންގިޓް (628 މިލިއަން ޑޮލަރު) ވަނީ ނަޖީބުގެ އަމިއްލަ އެކައުންޓަށް ޖަމާކޮށްފަ އެވެ. 1އެމްޑީބީ ޚިޔާނާތާ ގުޅޭ 42 މައްސަލައެއްގައި ނަޖީބުގެ މައްޗަށް ދައުވާ ކުރެއެވެ. އަދި އަނބިކަނބަލުން ރަސްމާގެ މައްޗަށް ކޮރަޕްޝަންގެ 20 މައްސަލައެއްގައި ދައުވާކޮށްފައި ވެއެވެ. އަދި ވެރިކަން ބަދަލުވުމަށް ފަހު ކުރިޔަށް ގެންދިޔާ ރޭޑުތަކުގައި މެލޭޝިއާ ފުލުހުން ވަނީ ނަޖީބާއި ރަސްމާއާ ގުޅުން ހުރި 273 މިލިއަން ޑޮލަރުގެ އަގު ހުރި ތަކެތި އެ ފަރާތުގެ ބެލުމުގެ ދަށަށް ގެންގޮސްފައެވެ. ވެރިކަމުގައި ރަސްމާ ފާހަގަކުރެވިގެން ގޮސްފައި ވަނީ އަގުބޮޑު ދިރިއުޅުމެއް އުޅުއްވި ކަނބަލެއްގެ ގޮތުގައެވެ. އެ ގޮތުން ގިނަ ގައުމުތަކަކަށް ދަތުރުކުރެއްވުމާއި އަގު ބޮޑު ހެދުންތަކާއި ގަހަނާއި ގަޑިތަކާއި ދަބަސްތަކާއި އެ ނޫން ވެސް އެތައް ސާމާނެއް އެކަމަނާ ހޯއްދަވަމުން ގެންދެވީ ވަރަށް ފާޅުކަން ބޮޑު ގޮތެއްގައެވެ.
