އިންތިހާބުގައި އެމްޑީޕީން ހޯދި ކާމިޔާބީ އަށް ރައީސް މައުމޫނު މަރުހަބާ ވިދާޅުވެއްޖެ
ރައީސް ނަޝީދު ހޯއްދެވި ކާމިޔާބީއަށް މަރުހަބާ ދަންނަވާފައިވޭ
ކުރީގެ ރައީސް މައުމޫނާއި، ކުރީގެ ރައީސް ނަޝީދު
ހޮނިހިރު ދުވަހު ބޭއްވި މަޖިލިސް އިންތިހާބުގައި އެމްޑީޕީން ހޯދި ކާމިޔާބީއަށް ކުރީގެ ރައީސް މައުމޫނު އަބްދުލް ޤައްޔޫމު މަރުހަބާ ވިދާޅުވެއްޖެއެވެ.
ބުދަ ދުވަހު ރައީސް މައުމޫނު ކުރެއްވި ޓްވީޓެއްގައި ވިދާޅުވީ، ރައީސް ނަޝީދަށް ފޯނުން ގުޅުއްވައި ނަޝީދާއި، އެމަނިކުފާނުގެ ޕާޓީން ހޯދި ކާމިޔާބީއަށް މަރުހަބާ ދަންނަަވާފައިވާ ކަމަށެވެ.
ރައީސް މައުމޫނު އެހެން ވިދާޅުވެފައިވާއިރު، ރައްޔިތުންގެ މަޖިލިސް އިންތިހާބަށް ނުފޫޒު ފޯރުވި ކަމަށް ރައީސް މައުމޫން ވިދާޅުވި ކަމަށް ބުނެ ބައެއް މީޑިއާތަކުން ރިޕޯޓް ކުރި ވާހަކަތައް ދޮގުކޮށް، އެ މަނިކުފާނާއި އެމްއާރްއެމް އިން ވެސް އިންތިހާބުގެ ނަތީޖާ ބަލައިގަންނަ ކަމަށް އެމްއާރްއެމް އިން ވަނީ ބުނެފައެވެ.
ނިމިދިޔަ ރައްޔިތުންގެ މަޖިލިސް އިންތިހާބުގައި ރައީސް މައުމޫންގެ ތާއީދާ އެކު ވާދަކުރެއްވި ބޭފުޅުންގެ ތެރެއިން ގޮނޑި ކާމިޔާބު ކުރެވުނީ އެއްމެ މެމްބަރަކަށެވެ. އެގޮތުން ގޮނޑި ކާމިޔާބު ކުރެއްވީ ނިލަންދޫ ދާއިރާއަށް ވާދަކުރެއްވި އަބްދުލް މުހުސިން ހަމީދް (ޖޭފޯ) އެކަންޏެވެ. އަދި ވަގުތީ ނަތީޖާތައް ދައްކާގޮތުން އެމްޑީޕީން ވަނީ 65 ގޮނޑި ކާމިޔާބު ކޮށްފައެވެ.
