ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުގެ 40 ދާއިރާއެއްގެ ވަގުތީ ނަތީޖާ އިލެކްޝަންސް ކަމިޝަނުން އިއުލާންކޮށްފިއެވެ.

ކުރީގެ އިންތިޚާބުތަކާ ހިލާފަށް މި ފަހަރު އިންތިޚާބުގެ ފޮށިތަކުގެ ނަތީޖާ ވަކިވަކިން އިއުލާނު ކުރުމުގެ ބަދަލުގައި އިއުލާނުކުރީ ކޮންމެ ދާއިރާއެއްގެ ޖުމުލަ ނަތީޖާއެވެ. ނަމަވެސް ހުރިހާ ފޮއްޓެއްގެ ވަގުތީ ނަތީޖާ އެ ކޮމިޝަންގެ ވެބްސައިޓުން ފެންނާނެކަމަށް އިލެކްޝަނުން ބުނެފައިވެއެވެ. 

އިލެކްޝަންސް ކޮމިޝަނުން ބުނީ 40 ދާއިރާގެ ނަތީޖާއަށްފަހު ބާކީ ނަތީޖާތައް މިރޭގައިވެސް އިއުލާންކުރާނެކަމަށެވެ.

މި ފަހަރުގެ އިންތިޚާބުގައި މަޖިލީހުގެ 87 ދާއިރާއަށް 386 ކެންޑިޑޭޓުން ވާދަކުރިއިރު، ވޯޓުލުމުގެ ހައްގު ލިބިގެންވާ 264،442 މީހުންގެ ތެރެއިން 80 ޕަސެންޓް މީހުން ވޯޓްލިއެވެ. 

މިހާތަނަށް ގުނުނު ވޯޓު ފޮށިތަކުގެ ނަތީޖާއިން ދައްކާ ގޮތުން އާ މަޖިލީހުގެ ސްޕަ މެޖޯރިޓީ އެމްޑީޕީން ވަނީ ނަގައިފަ އެވެ. މިއީ ބަރުލަމާނީ ހަޔާތުގައި އެއް ޕާޓީއަކަށް މަޖިލީހުގެ ސުޕަމެޖޯރިޓީ ލިބުނު ފުރަތަމަ ފަހަރުއެވެ. މަޖިލީހުގައި މިހާރު ތިއްބެވި ގިނަ އަދަދެއްގެ މެމްބަރުންނަށް އިންތިޚާބުގައި ވަނީ ނާކާމިޔާބީ ލިބިވަޑައިގެންފަ އެވެ.