ވަކި ބަޔަކަށް މެޖޯރިޓީ ހޯދައިދޭކަށް ނޫޅެން: ޝަރީފްް
5 އެޕްރީލު 2019 | ހުކުރު 17:59އިންތިހާބުގައި ނަތީޖާ ފާޅުކޮށްދޭނީ އިންސާފުވެރިކަމާއި، އަދި އަމާނަތްތެރިކަމާއެކުގައި
އިލެކްޝަންސް ކޮމިޝަންގެ ރައީސް އަހުމަދު ޝަރީފް
ހޮނިހިރު ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވަކި ބަޔަކަށް މެޖޯރިޓީ ހޯދައިދިނުމަށް މަސައްކަތް ނުކުރައްވާކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެ އެވެ.
ކޮމިޝަންގެ ރައީސް ޝަރީފް އެފަދައިން ވިދާޅުވީ، މަޖިލީސް އިންތިހާބާއި ގުޅޭގޮތުން ބޭއްވި މައުލޫމާތު ދިނުމުގެ ބައްދަލުވުމުގައި ޓުވިޓަރ މެދުވެރިކޮށް އާންމު ފަރުދަކު ކުރި ސުވާލަށް ޖަވާބުދެއްވަމުންނެވެ. ޓުވިޓަރ މެދުވެރިކޮށް، ކުރި އެ ސުވާލުގައި ބުނެފައިވަނީ އިލެކްޝަންސް ކޮމިޝަންގެ ރައީސް ޝަރީފް އުފާވަނީ އެމްޑީޕީއަށް މެޖޯރިޓީ ލިބުމުންތޯ އެވެ.
ޝަރީފް ވިދާޅުުވީ އަމަލުކުރަމުންގެންދަނީ ޤާނޫނުގައި ކަނޑައަޅާފައިވާ ގޮތުގެ މަތިން ކަމަށެވެ. ޤާނޫނުގައި ކަނޑައަޅާފައިވާ މުއްދަތުގައި ހުރިހާކަމެއްވެސް ޤާނޫނުގައި ބުނެފައިވާގޮތުގެ މަތިން ކޮށްފައިވާނެކަމަށް ޝަރީފް ވިދާޅުވި އެވެ.
"ވަކި ބަޔަކަށް މެޖޯރިޓީ ހޯދައިދިނުމަށް، ވަކި ބަޔަކަށް މެޖޯރިޓީ ފެސިލިޓޭޓް ކޮށްދިނުމަށް، އަދި ވަކި ބަޔަކަށް ލިބުމުން އުފާވުން އެއީ އަޅުގަނޑުމެން ބޭނުންވާގޮތެއް ނޫން. އަދި އަޅުގަނޑުމެން އެކަހަލަ ކަމަކަށް ހިޔާލުވެސް ފާޅުކޮށްފައެއް ނޯންނާނެ. އަދި އަޅުގަނޑުމެން އެކަހަލަ ކަމަކަށް ވަކި ބަޔަކަށް މެޖޯރިޓީ ލިބިއްޖެއްޔާ ރަނގަޅުތޯ ސުވާލުކޮށްފިނަމަ އެއަކަށް ޖަވާބުދޭކަށްވެސް ބޭނުމެއް ނޫން"
ޝަރީފް ވިދާޅުވީ އާއިލީ ބައެއް ބޭފުޅުންވެސް އިންތިހާބަށް ކުރިމަތިލައްވާފައިވާކަމަށާއި، ނަމަވެސް އެއްވެސް ކެނޑިޑޭޓަކާއި މެދު ތަފާތުކުރުން ނުގެންގުޅުއްވާނެ ކަމަށެވެ. އަދި ރައްޔިތުން ނިންމާ ނިންމުން ނަތީޖާގެ ގޮތުގައި އިއުލާންކުރަމުންގެންދާނެކަމަށް ޝަރީފް ވިދާޅުވި އެވެ.
"އަޅުގަނޑުމެން އިންތިހާބުގައި ނަތީޖާ ފާޅުކޮށްދޭނީ އިންސާފުވެރިކަމާއި، އަދި އަމާނަތްތެރިކަމާއެކުގައި"
