2019 ވަނަ އަހަރުގެ ފުޓުބޯޅަ ސީޒަން ހުޅުވުުގެ ރަސްމިއްޔާތު ޝަރަފްވެރިކޮށް ދިނުމަށް އެކްޓިން ޔޫތު މިނިސްޓަރ އަލީ ވަހީދު އިންޑިއާގެ ގައުމީ ފުޓުބޯޅަ ޓީމްއަށް ދައުވަތު އަރުވައިފިއެވެ. 

އެކްޓިން ޔޫތު މިނިސްޓަރ އިންޑިއާގެ ފުޓުބޯޅަ ޓީމަށް  ދައުވަތު އަރުވާފައި ވަނީ ބުދަ ދުވަހު އިންޑިއާގެ އެމްބެސެޑަރ ސަންޖޭ ސުދީރާ އެކު ބޭއްވި ބައްދަލުވުމުގައެވެ. މި ބައްދަލުވުމުގައި އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ބައިވެރިވިއެވެ. 

ފުޓުބޯޅަ ޓީމުގެ އިތުރުން ބޮލީވުޑުގެ ފިލްމީ އަދި މިއުޒިކީ ތަރިން ރާއްޖެ އައުމަށް އެކްޓިން ސްޕޯޓްސް މިނިސްޓަރު އަލީ ވަހީދު ވަނީ ދައުވަތު ދެއްވާފައެވެ.

މި ބައްދަލުވުމުގައި މަޝްވަރާ ކުރެވުނު ކަންތައްތަކުގެ ތެރޭގައި ރާއްޖޭގައި ފުޓްބޯޅައިގެ ފޯރިގަދަކުރުމަށް ކުރެވިދާނެ ކަންކަމާއި، ރާއްޖެ އާއި އިންޑިއާގެ ޒަމާންވީ ހާރިޖީ ގުޅުން އިތުރަށް ހަރުދަނާ ކުރެވިދާނެ ގޮތްތަތަކާމެދު މަޝްވަރާ ކުރެވުނެވެ. 

މި ބައްދަލުވުމުގައި މިނިސްޓަރު އަލީ ވަހީދު ވިދާޅުވީ އިންޑިއާ އާއި ރާއްޖެ އަކީ ފުޓްބޯޅައިގެ ވާދަވެރިންނަށްވެފައި ދެ ގައުމުގެ މެދުގައި އެކުވެރިކަމުގެ މެޗެއް ނުކުޅޭތާ ދުވަސްތަކެއްވެފައިވުމާ އެކު މިއީ ފޯރިގަދަ ކޮށްލާށާއި ގައުމީ ޓީމުގެ ފެންވަރު ވަޒަންކޮށްލަން މުހިއްމު ފުރުސަތަކަށް ވާނެ ކަމަށެވެ. 

އިންޑިއާ އާއި ރާއްޖޭން އެންމެ ފަހުން އެކުވެރިކަމުގެ މެޗެއް ކުޅުނީ 2011 ވަނަ އަހަރު މާލޭގަ އެވެ. އިންޑިއާއި ވާދަކޮށް ފަހަކަށް އައިސް ރާއްޖެ އަށް ދެކުނު އޭޝިއާގެ ފުޓްބޯޅައިގައި ކުރިއަށް ދެވޭ ގޮތް ނުވި ނަމަވެސް ތަށި ހޯދި ދެ ފަހަރު ވެސް އެކަން ކުރީ އިންޑިއާ ބަލިކޮށްފަ އެވެ. އެގޮތުން 2008 ވަނަ އަހަރުގެ ސާފް ޗެމްޕިއަންޝިޕުގެ ފައިނަލުގައި އިންޑިއާ އަތުން 1-0 އިން މޮޅުވިއިރު، މިދިޔަ އަހަރުގެ ސާފް ސުޒުކީ ކަޕުން ވެސް ރާއްޖެ މޮޅުވީ ފައިނަލުގައި 2-0 ގެ ނަތީޖާ އަކުން އިންޑިއާ ބަލިކޮށްގެންނެވެ.

މި އަހަރުގެ ފުޓުބޯލް ސީޒަން ފެށޭނީ މިދިޔަ ސީޒަނުގެ ޕްރިމިއާ ލީގުގެ ޗެމްޕިއަން ޓީސީ ސްޕޯޓްސް ކްލަބާއި މިނިވަން ޗެމްޕިއަންޝިޕުގެ ޗެމްޕިއަން ތ. ތިމަރަފުށްޓާ ދެމެދު ހޯމް އެންޑް އަވޭ އުސޫލުން ކުޅޭ މެޗަކުން ކަމަށް އެފްއޭއެމްއިން މީގެ ކުރިން ބުނެފައިވެއެވެ.