އޯޓިޒަމް ހުންނަ ކުދިން މުއާމަލާތު ކުރުމަށްޓަކައި ޓެކްނޮލޮޖީގެ ބޭނުން ކުރަނީ: އިލްހާމް
އޯޓިޒަމް ދުވަހުގެ މިއަހަރުގެ ޝިއާރަކީ މަދަދު ވެރި ޓެކްނޮލޮޖީ އަމަލީ ބައިވެރިވުން
މޯލްޑިވްސް އޯޓިޒަމް އެސޯސިއޭޝަންގެ ޗެއަޕާރސަން އަދި ފައުންޑަރ އިލްހާމް ހުސައިން
މޯލްޑިވްސް އޯޓިޒަމް އެސޯސިއޭޝަނުން ޓެކްނޮލޮޖީ ބޭނުންކޮށްގެން އޯޓިޒަމް ހުންނަ ކުދިންނަށް މުއާމަލާތު ކުރަން ދަސްކޮށްދީ އަދި އެކުދިންގެ ހުނަރުތައް ކުރިއެރުވުމަށް ޓަކައި ޓެކްނޮލޮޖީ ބޭނުން ކުރަން ފަށާފައިވާ ކަމަށް އެ އެސޯސިއޭޝަންގެ ޗެއަޕާރސަން އަދި ފައުންޑަރ އިލްހާމް ހުސައިން ވިދާޅުވެއްޖެއެވެ.
އަންގާރަ ދުވަހު ހެނދުނު އޯޓިޒަމް ދުވަސް ފާހަގަކުރުމުގެ ގޮތުން ހުޅުމާލެ އޯޓިޒަމް ސެންޓަރުގައި ބޭއްވި ޢާއިލީ ނާސްތާގައި ވާހަކަފުޅު ދައްކަވަމުން އިލްހާމް ވިދާޅުވީ އޯޓިޒަމް ހުންނަ ކުދިންނާއި މީހުންގެ އަސާސީ ހައްގުތައް ލިބިދެވޭނީ އަދި އެމީހުންނަށް މުޖުތަމައުގެ ހިއްސާދާރުންނަށް ވެވޭނީ އެމީހުންނަށް އެހީތެރިވާނެ ޓެކްނޮލޮޖީ ތަކެއް ހެޔޮ އަގެއްގައި އެ ކުދިންނަށް ލިބިދެވިގެން ކަމަށާއި އެކި ހަރަކާތްތަކުގައި އެމީހުންގެ ބައިވެރިވުމަށް އޮތް ހުރަސްތައް ޓެކްނޮލޮޖީގެ އެހީގައި މަދު ކުރެވިގެން ކަމަށެވެ.
"މުޖުތަމައުގެ އެކިއެކި ހަރަކާތްތަކުގައި އޯޓިޒަމް ހުންނަ ކުދިންގެ ބައިވެރިވުމަށް އޮތް ހުރަސް ޓެކްނޮލޮޖީގެ އެހީގައި މަދު ކުރެވިދާނެ. މިގޮތުން ޓެކްނޮލޮޖީގެ އެހީގައި މިފަދަ ކުދިންނަށް މާސްމީޑިއާގައި ބައިވެރިވެވޭނެ ގޮތް ހޯދައި ދިނުމާއި ކަންކަން އަމިއްލައަށް ނިންމުމުގެ ބާރު ލިބިދިނުމާއި ކަންކަން ނިންމުމުގައި އެކި ކުދިންގެ ބަސް ހޯދޭނެގޮތް ގާއިމް ކުރުން މީ ހާސިލް ކުރަން ހުރި ކަންކަން. ނަމަވެސް މިކަންކަން ހާސިލް ކުރުމަށް ހުރި އެންމެ ބޮޑު އެއް ގޮންޖެހުމަކީ ޓެކްޖްނޮލޮޖީގެ އަގު ބޮޑުވުން. މޯލްޑިވްސް އޯޓިޒަމް އެސޯސިއޭޝަނުން މިދަނީ ޓެކްނޮލޮޖީ ބޭނުންކޮށްގެން މިފަދަ ކުދިންނަށް މުއާމަލާތު ކުރަން ދަސްކޮށްދީ އަދި އެކުދިންގެ ހުނަރުތައް ކުރިއެރުވުމަށް ޓަކައި ޓެކްނޮލޮޖީ ބޭނުން ކުރަމުން." އިލްހާމް ވިދާޅުވިއެވެ. އިލްހާމް ވިދާޅުވީ ސެން ކުލާސްތަކުގައި ކިޔަވައިދޭ ޓީޗަރުންނަށް ޚާއްސަ ތަމްރީން ޕްރޮގްރާމެއް މިއަދު ލޯންޗް ކުރެވިގެން ދިޔައިރު މި ޕްރޮގްރާމްގެ ދަށުން 100 ޓީޗަރުން ތަމްރީނު ކުރެވިގެން ދާނެ ކަމަށެވެ.
އަދި ބެލެނިވެރިންގެ ޓްރޭއިނިން ޕްރޮގްރާމެއް ފެށިގެންދާނެ ކަމަށް އެސެންޓަރުން މައުލޫމާތު ދެއެވެ
މީގެ އިތުރުން ރާއްޖޭގެ އެކިއެކި ކަންކޮޅުތަކުގައި ދިރިއުޅޭ ބައެއް ކުދިންގެ އޯޓިޒަމް ހުރިތޯ ބެލުމަށް ނުވަތަ ނެތްކަން ޔަގީން ކުރުމަށް ބޭނުންވާ ފަރާތްތަކަށް ޚާއްސަކޮށްގެން ހިލޭ ސްކޫރީން ޕްރޮގްރާމެއް އިފްތިތާހު ކުރެވި މިހާތަނަށް 48 ކުއްޖަކު ވަނީ މި ސްކްރީން ގައި އެންރޯލް ކުރެވިފައެވެ.
" 2010 ވަނަ އަހަރު މޯލްޑިވްސް އޯޓިޒަމް އެސޯސިއޭޝަން ވުޖޫދު ވުމަށް ފަހު އަޅުގަނޑުމެން މިދަނީ މުޖުތަމައުގައި އޯޓިޒަމް ހުންނަ ކުދިން އަދި އެމީހުންގެ ބައިވެރިވުން އިތުރު ކުރުމާއި ފަރުވާއަށް މަގުފަހި ކުރުމަށް ގޮވާލާ އަދި އޯޓިޒަމާއި ބެހެގޮތުން ހޭލުންތެރިކަން އިތުރު ކުރުމަށްޓަކައި ވަރަށް ފުރިހަމަ މަސައްކަތްތަކެއް ވޭތިވެ ދިޔަ އަހަރު ތަކުގައި އަޅުގަނޑުމެންނަށް ވަނީ ކުރެވިފައި. އަދި އޯޓިޒަމް ހުންނަ ކުދިން އަދި މީހުންގެ ހައްގުތައް ހޯދައި ދިނުމަށްވެސް ވަރަށް ގިނަ މަސައްކަތްތަކެއް ވަނީ ކުރެވިފައި. އޯޓިޒަމް ހުންނަ ކުދިންނަށް ބޭނުންވާ އެކިއެކި ތެރަޕީ އަދި އެޑިއުކޭޝަނަލް ޕްރޮގްރާމްތައް ރާއްޖޭގައި އެއް ފުރާޅެއްގެދަށުން ފޯރުކޮށްދޭ ހަމައެކަނީ ތަނަކީ އޯޓިޒަމް ސެންޓަރ." އިލްހާމް ވިދާޅުވިއެވެ.
މިއަދުގެ ހަފްލާގައި އޯޓިޒަމް ކުދިން ވަނީ ހަފްލާގައި ބައިވެރިވެ ވަޑައިގެން މެހެމާނުންނަށް ހަދިޔާ ދިނުމުގެ އިތުރުން ދުވަހާއި ގުޅޭ ކޭކެއް ވެސް ފަޅާފައެވެ.
އޯޓިޒަމް ދުވަހުގެ މިއަހަރުގެ ޝިއާރަކީ "މަދަދު ވެރި ޓެކްނޮލޮޖީ އަމަލީ ބައިވެރިވުން" އެވެ.
