ރައީސް ޔާމީންގެ އެކައުންޓް ފްރީޒްކުރުމުގެ އިތުރު އަމުރެއް، އެކައުންޓްތައް އަދިވެސް ފްރީޒްކޮށްފައި!
1 އެޕްރީލު 2019 | ހޯމަ 04:22މިހާރު އޮތް އަމުރަކީ ކުރިން ނެރުނު އަމުރު މާރޗް 12 ވަނަ ދުވަހަށް ހަމަވާތީ ފުލުހުން ހޯދާފައިވާ އިތުރު އަމުރެއް
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް
ޚިޔާނާތާއި ކޮރަޕްޝަންގެ ތުހުމަތުތަކާ ގުޅިގެން ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީންގެ އެކައުންޓްތައް ފްރީޒްކުރުމަށް ކްރިމިނަލް ކޯޓުން ނިމިގެންދިޔަ އަހަރުގެ ޑިސެމްބަރު މަހު ނެރުނު އަމުރު އާދީއްތަ ދުވަހު ހައިކޯޓުން ބާޠިލްކުރި ނަމަވެސް، އޭގެ ފަހުން ނެރެފައިވާ އެފަދަ އެހެން އަމުރެއް ވެސް އޮތްކަން ރާއްޖެއެމްވީއަށް ކަށަވަރުވެއްޖެއެވެ.
މަޢުލޫމާތު ލިބިފައިވާ ގޮތުގައި މިހާރު އޮތް އަމުރަކީ އެންމެ ފުރަތަމަ ކްރިމިނަލް ކޯޓުން ނެރުނު އަމުރު މާރޗު މަހުގެ 12 ވަނަ ދުވަހަށް ހަމަވާތީ ފުލުުހުން ހޯދި ދެ ވަނަ އަމުރެކެވެ. ހައި ކޯޓުން ބާތިލުކޮށްފައި ވަނީ ފުރަތަމަ ނެރުނު އަމުރެވެ. އެ އަމުރު ސުޕްރީމް ކޯޓުގައި ދައުލަތުގެ ފަރާތުން އިސްތިއުނާފްކުރާނެކަން ވަނި އެނގިފައެވެ.
މިކަމާ ގުޅޭ ގޮތުން ފުލުހުން ތަފްޞީލް ހާމަ ނުކުރި ނަމަވެސް، ރައީސް ޔާމީންގެ އެކައުންޓްތައް ފްރީޒްކުރުމަށް ޑިސެމްބަރު މަހު ނެރުނު އަމުރު ހައިކޯޓުން ބާޠިލްކުރުމާ ގުޅިގެން ކުރަންޖެހޭ ކަންކަން ކުރަމުންދާ ކަމަށް ފުލުހުން ވަނީ ބުނެފައެވެ.
ފަހުން ހޯދާފައިވާ މި އަމުރު ހައި ކޯޓުގައި އިސްތިޢުނާފުކުރިކަން ނުވަތަ ނޫންކަން ރައީސް ޔާމީންގެ ޤާނޫނީ ވަކީލުންގެ ޓީމުން އަދި ހާމަކޮށްފައެއް ނުވެއެވެ.
ޑިސެމްބަރު މަހުގެ 13 ވަނަ ދުވަހު ނެރުނު އަމުރާ ގުޅިގެން ރައީސް ޔާމީންގެ ނަމުގައި ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) ގައި ހުޅުވާފައިވާ އެކައުންޓްތައް ފްރީޒް ކުރިއިރު އެ އެކައުންޓްތަކުގައި ޖުމްލަ 100 މިލިއަން ރުފިޔާ އަށް ވުރެ ގިނަ ރުފިޔާ ހުރިކަން ފުލުހުން ވަނީ ހާމަކޮށްފައެވެ.
ހައިކޯޓުން އާދީއްތަ ދުވަހު ކްރިމިނަލް ކޯޓުގެ އަމުރު ބާޠިލްކޮށް ދޫކޮށްލާފައި ވަނީ ރައީސް ޔާމީންގެ ނަމުގައި މޯލްޑިވްސް އިސްލާމިކް ބޭންކް (އެމްއައިބީ) ގައި ހުޅުވާފައިވާ އަށް އެކައުންޓެވެ.
އެކައުންޓް ފްރީޒްކުރުމަށް ފުރަތަމަ ނެރުނު އަމުރު، ރައީސް ޔާމީންގެ ފަރާތުން ހައިކޯޓުގައި އިސްތިޢުނާފުކުރީ ކްރިމިނަލް ކޯޓުގެ އަމުރަކީ ޖިނާއީ އިޖުރާއާތުގެ ގާނޫނާއި ގާނޫނުއަސާސީއާ ހިލާފަށް ނެރެފައިވާ އަމުރެއް ކަމަށް ބުނެއެވެ. އެ އަމުރު ބާޠިލްކޮށް، ހައިކޯޓުން ނެރުނު އަމުރުގައި ބުނެފައިވަނީ، ކްރިމިނަލް ކޯޓުން ރައީސް ޔާމީންގެ އެކައުންޓްތައް ފްރީޒްކުރުމަށް އަމުރުކޮށްފައި ވަނީ ޖިނާއީ އިޖުރާއާތުގެ ޤާނޫނުގެ 72 ވަނަ މާއްދާ އާއި 73 ވަނަ މާއްދާގައި ކަންކުރުމަށް ކަނޑައަޅާފައިވާ ތަރުތީބާ ޚިލާފަށް ކަމަށެވެ.
އެގޮތުން މިފަދަ މައްސަލަތަކުގައި އެކައުންޓް ފްރީޒްކުރުމުގެ ކުރިން އެކައުންޓް މޮނިޓަރ ކުރުމުގެ އަމުރަކަށް އެދެން ޖެހޭއިރު، ދައުލަތުން އެފަދައިން އެދިފައި ނުވާ ކަމާއި، މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓުން ފުލުހުންނަށް ފޮނުވާފައިވާ ސިޓީގައި ބަޔާންކޮށްފައިވަނީ ބޭންކް އޮފް މޯލްޑިވްސް (ބީއެމްއެލް) ގައިވާ އެކައުންޓަކާއި ގުޅޭ މައްސަލައެއް ނަމަވެސް، އެ މައްސަލައާއި މޯލްޑިވްސް އިސްލާމިކް ބޭންކް (އެމްއައިބީ) ގައި ހުޅުވާފައިވާ 8 އެކައުންޓާއި ގުޅޭގޮތް ސާބިތުވާފަދަ ހެއްކެއް ހުށހެޅިފައި ނެތްކަން ހައިކޯޓުގެ އަމުރުގައި ވަނީ ފާހަގަކޮށްފައެވެ.
ރައީސް ޔާމީންގެ އެކައުންޓްތައް ފްރީޒް ކުރުމަށް ކްރިމިނަލް ކޯޓުން އަމުރުކޮށްފައި ވަނީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރސީ) މެދުވެރިކޮށް ކުއްޔަށް ދޫކުރި ރަށްތަކާއި ފަޅުތަކާއި ގުޅިގެން ދައުލަތަށް ލިބެންޖެހޭކަމަށް ބެލެވޭ ގިނަ ޢަދަދެއްގެ ފައިސާ ރައީސް ޔާމީންގެ ނަމުގައި ހުޅުވާފައިވާ އެކައުންޓަކަށް ޖަމާކޮށްފައިވާކަމަށް ތުހުމަތުކުރެވޭ މައްސަލައާ ގުޅިގެން، މިކަމާ ގުޅުން ހުރި ފައިސާ ނުހިފައްޓައިފި ނަމަ، އެފައިސާ އިން މާލީ މަންފާއެއް ހޯދުމަށް ފުރުޞަތު ހުޅުވިފައި އޮންނާނެ ކަމަށް ބެލެވޭތީ އާއި ދައުލަތަށް ލިބެންޖެހޭ ފައިސާ ގެއްލިގެން ހިނގައިދާނެކަމުގެ ފުރުޞަތު އޮތްކަމަށް ތަޙްޤީޤަށް ފެންނާތީ އެކަމަށް ދައުލަތުން އެދުމުންނެވެ.
