ޔޫކްރެއިންގައި އާދީއްތަ ދުވަހު ބާއްވާ ރިޔާސީ އިންތިޚާބުގެ ފުރަތަމަ ބުރުގެ ވޯޓުލުމަށް ތައްޔާރުވެއްޖެއެވެ.
މިހާރުގެ ރައީސް ޕެޓްރޯ ޕްރުޝެންކޯ ދެވަނަ ދައުރަކަށް ނުކުންނަވާފައިވާއިރު ހައިރާންކުރުވަނިވި ގޮތަކަށް ކުރީގައި އުޅުއްވަނީ ކޮމިޑިއަން ވްލޮޑިމީރް ޒެލެންސްކީއެވެ.
މި ދެ ކެންޑިޑޭޓުންނާއި ކުރީގެ ބޮޑުވަޒީރު ޔޫލިއާ ޓިމޮޝެންކޯ ވެސް ކެމްޕެއިންގައި ގެންދަވަނީ ޔޫރަޕަށް ތާއީދު ކުރައްވައި ވާހަކަ ދައްކަވަމުންނެވެ.
ރަޝިއާ ފިކުރަށް ތާއީދުކުރާ އެއްވެސް ކެންޑިޑޭޓެއް އިންތިޚާބީ ރޭހުގެ ކުރީ ސަފުގައި ނެތެވެ.
އާދީއްތަ ދުވަހު ބާއްވާ އިންތިޚާބުގައި އެއްވެސް ކެންޑިޑޭޓަކަށް 50 އިންސައްތަ ވޯޓް ލިބިވަޑައިނުގެންފި ނަމަ މި ބުރުގައި އެންމެ ގިނަ ވޯޓް ހޯއްދަވާ ދެ ކެނޑިޑޭޓަކު އޭޕްރީލް މަހުގެ 21 ވަނަ ދުވަހު ބާއްވާ ބުރުގައި ވާދަކުރައްވާނެއެވެ.
މި އިންތިޚާބުގެ ވޯޓްކަރުދާހުގައި 39 ކެނޑިޑޭޓެއްގެ ނަން އޮންނައިރު އިންތިޚާބު ކާމިޔާބުކޮށްފާނެ ކަމަށް ބެލެވި ރޭހުގެ ކުރީގައި އޮތީ ތިން ކެންޑިޑޭޓެކެވެ.
ސޯވިއެޓް ޔޫނިއަންގެ ކުރީގެ މެމްބަރެއްގެ ގޮތުގައި އޮތް ޔޫކްރެއިންގައި ރައީސްކަމުގެ މަގާމުގައި ހުންނަވާ ބޭފުޅަކަށް ސަލާމަތީ ކަންކަމާ ގުޅޭގޮތުންނާއި ދީފާއީ ދާއިރާއިން އަދި ޚާރިޖީ ސިޔާސަތު ކަނޑައެޅުމުގެ ބާރު ލިބިވަޑައިގަންނަވާއިރު އެ ގަމުގެ ރިޔާސީ ނިޒާމު ބެލެވިފައި އޮންނަނީ ސެމީ ޕްރެޒިޑެންޝަލް ނިޒާމެއްގެ ގޮތުގައެވެ.
