އިދިކޮޅު ފަރާތްތަކަށް މަޖިލީހުގެ މެޖޯރިޓީ ލިބުމަކީ މިގައުމުގައި ވައްކަމާއި ޚިޔާނާތާއި ފަސާދަ އިޔާދަ ވުމަށް ދެވޭ ފުރުސަތެއް ކަމަށް އެމްޑީޕީގެ ޓިކެޓްގައި ވިލިފުށި ދާއިރާއަށް ވާދަކުރަށްވާ ކެނޑިޑޭޓް ހަސަން އަފީފުގެ ކެމްޕެއިން ޖަލްސާގައި ވާހަކަ ދައްކަވަމުން އޭނާ ވިދާޅުވެއްޖެ އެވެ.

ވިލިފުށީގައި ހޮނިހިރު ދުވަހު ބޭއްވި ކެމްޕެއިން ޖަލްސާގައި ވާހަކަ ދައްކަވަމުން އަފީފު ވިދާޅުވީ ރައީސް އިބްރާހިމް މުހައްމަދު ސޯލިހު ރައްޔިތުންނަށް ވެވަޑައިގެންފައިވާ ވައުދުތައް ފުއްދޭނީ އެޖެންޑާ 19 ކާމިޔާބު ކުރެވިގެން ކަމަށާއި އެ އެޖެންޑާ ކާމިޔާބު ކުރެވޭނީ އެމްޑީޕީގެ މެޖޯރިޓީ އޮންނަ މަޖިލީހެއް ދިވެހި ރައްޔިތުން ހޮވައިގެން ކަމަށެވެ.

ކުރީގެ ސަރުކާރުން ކަންތައް ކުރިގޮތް މާޒީގެ ތެރެއިން ދިވެހި ރައްޔިތުން ދެކެފައިވާ ކަމަށާއި ދެން އެދުވަސްތައް އިޔާދަވާން އެއްވެސް ދިވެހި ދަރިޔަކު ނޭދޭ ކަމަށް އޭނާ ވިދާޅުވިއެވެ. 

" ޔާމީނުގެ ސަރުކާރަށް ވެރިކަމާއި ރައްޔިތުންގެ މަޖިލީހާއި ހުރިހާ އާރަކާއި ބާރެއް ރައްޔިތުން ދިނުމުން ފެށީ ވައްކަން ކުރަން. ދެންވެސް އެމީހުންނަށް އެ ފުރުސަތު ދީފިއްޔާ އެމީހުން ކުރާނީ ވައްކަން. އެހެންކަމުން މިފަދަ ހަޑި މުޑުދާރު އަމަލްތަކުން ސަލާމަތް ވާން ބޭނުން ވާނަމަ އެމްޑީޕީއަށް މެޖޯރިޓީ ލިބުން މުހިންމު. އަޅުގަނޑުމެން އިންތިޒާރު ކުރަނީ އަންނަ އެޕްރީލް މަހުގެ 6 ވަނަ ދުވަހު ރަން ރީދޫ ކުލައިން މިގައުމު ޖަރީކުރުމަކީ މިއަދު ހުރިހާ ދިވެހި ރައްޔިތުން ކުރަންޖެހޭ ކަމެއް." އަފީފު ވިދާޅުވިއެވެ.

އަންނަ އެޕްރީލް މަހުގެ 6 ވަނަ ދުވަހު ދިވެހި ރައްޔިތުން އެކުއެކީ ނުކުމެ އެމްޑީޕީއަށް އަދި އެމްޑީޕީގެ ތިލަފަތަށް ވޯޓް ދޭނެ ކަމާއި މެދު ޝައްކު ނުކުރާ ކަމަށް ކުރީގައި ގިަނަ އަހަރުތަކެއް ވަންދެން މަޖިލީހުގެ މެންބަރުކަން ކުރައްވާފައިވާ އަފީފު ވިދާޅުވިއެވެ.

.